Iðjuþjálfinn - 01.01.2019, Page 70

70
Guðrún Árnadóttir II Grein 2019 Málþing LSH Box 1
Notkun þjónustuferlis MOHO og þróun þjónustu iðjuþjálfa á Kleppi
Auður Hafsteinsdóttir, Erna Sveinbjörnsdóttir, Halldóra Sif Sigurðardóttir, Selma Ragnheiður
Klemensdóttir og Sólveig Dögg Alfreðsdóttir

Inngangur: Mikil framþróun hefur orðið í íhlutun og þjónustu iðjuþjálfa á Kleppi frá árinu 2008
til dagsins í dag með aukningu stöðugilda iðjuþjálfa. Í dag starfa átta iðjuþjálfar á Kleppi sem
sinna öllum fimm legudeildunum, Batamiðstöð og teymum göngudeildar nema bipolar teymi.
Iðjuþjálfar í geðendurhæfingu á Kleppi styðjast við hugmyndafræði Líkansins um iðju mannsins
(MOHO). Hugmyndafræði MOHO leggur áherslu á að vinna með vilja, vana, umhverfi og getu til
að framkvæma, til að vera virkur þátttakandi í samfélaginu og hentar það vel, ásamt
íhlutunarleiðum OTIPM, í þjónustu iðjuþjálfa í geðendurhæfingu á Kleppi.
Markmið: Yfirfara þjónustuyfirlitstöflu sem iðjuþjálfar á Kleppi þróuðu árið 2014 ásamt því að
útbúa tímalínu á framþróun í þjónustu og íhlutun iðjuþjálfa á Kleppi frá árinu 2008.
Aðferð: Farið var yfir þjónustuyfirlitstöflu og hún uppfærð miðað við starfsemina í dag. Haldnir
voru fundir þar sem farið var yfir sögu og breytingar iðjuþjálfunar frá árinu 2008 til dagsins í
dag.
Niðurstöður: Með aukningu á stöðugildum iðjuþjálfa hefur verið lögð áhersla á fagleg og
markviss vinnubrögð og skráningu. Iðjuþjálfar vinna meira í raun aðstæðum úti í samfélaginu og
huga betur að klínískri, skjólstæðingsmiðaðri íhlutun og fylgja eftir meðferðaráætlunum.

Ályktanir: Með tilkomu þjónustuyfirlitstöflu hefur fagímynd iðjuþjálfa eflst ásamt markvissari
þjónustu.