Árbók Hins íslenzka fornleifafélags - 2014, Side 171

ÁRBÓK FORNLEIFAFÉLAGSINS170
þá tók Byggðasafnið við safngripum sem Muna- og minjanefnd bæjarins
hafði haft á sínum snærum. Aðkoma Byggðasafnsins að Minjahúsinu breyttist
og hvorki safnstjóra þess né Kristjáni var skemmt. Aldamótaárið 2000 var
samkomulagið við Kristján framlengt og aftur árið 2001. Fyrra samkomulagið
hljóðaði upp á styrk gegn því að hann hefði umsjón með Minjahúsinu13
en hið síðara upp á að hann fengi styrk og aðgangseyri að sýningunum í
húsinu en að safnstjóri Byggðasafns Skagfirðinga tæki við umsjón hússins.14
Mönnum var orðið ljóst að um eiginlegt samstarf milli þessara safna yrði varla
að ræða. Enn var þó reynt því árið 2002 gerði Sveitarfélagið Skagafjörður
samning við Kristján um að hann fengi inni í Minjahúsinu til 2004 gegn því
að hann annaðist gæslu á sýningum í húsinu. Safnstjóri Byggðasafnsins átti að
hafa yfirumsjón með húsinu. Ákvæði um starfslok Kristjáns voru hin sömu
og fyrr nema að nafn Sauðárkróksbæjar breyttist í Sveitarfélagið Skagafjörður.
Kristján fékk aðgangseyri að sýningunum og 450 þús. kr. styrk að auki.15
Þegar þarna var komið sögu var staða Byggðasafnsins orðin verulega erfið
gagnvart einkasafnaranum sem vildi halda sínu striki. Byggðasafnið setti upp
og opnaði sýningar á úr-, tré- og járnsmíðaverkstæðum af Króknum árið 2002
og jók kvaðir á sýningagæslumanninn.16 Safngæslan gekk ágætlega en ljóst
var að gefendur sem töldu sig vera að færa safninu á Sauðárkróki muni áttuðu
sig ekki á að um einkasafn var að ræða, sem eðlilegt var. Hvorki almenningur
né meiri hluti pólitískt kjörinna fulltrúa gerðu yfirhöfuð greinarmun á
Minjasafni Kristjáns Runólfssonar og Byggðasafni Skagfirðinga. Í hugum
flestra var Byggðasafnið gamli bærinn í Glaumbæ og það sem þar var til sýnis.
Fólk áttaði sig almennt ekki á breyttum starfsháttum Byggðasafnsins fyrr en
líða tók á fyrsta áratug 21. aldar. Þrátt fyrir að safnið hefði sett upp nokkrar
sýningar með öðrum og fyrir aðra snemma á tíunda áratug 20. aldar og breytt
starfsaðferðum sínum að flestu leyti.
Árið 2004 var ljóst að breyta þurfti starfsháttum í Minjahúsinu m.a. vegna
þess að Byggðasafnið þarfnaðist geymslurýmis og var horft á Minjahúsloftið
í því skyni. Byggðasafnsgeymslan hafði áður verið í leiguhúsnæði.17
Við þær vangaveltur varð Kristjáni ljóst að starfsemi Byggðasafnsins yrði
fyrirferðameiri í húsinu en nokkru sinni. Honum fannst hann svikinn og
13 Sv.Sk. Samkomulag, 2000. Kristján Runólfsson við Sveitarfélagið Skagafjörð. Án dagsetningar.
14 Sv.Sk. Samkomulag, 1. maí 2000-1.maí 2001. Sveitarfélagið Skagafjörður og Kristján Runólfsson
15 Sv.Sk. Samkomulag milli Sveitarfélagsins Skagafjarðar og Kristjáns Runólfssonar, 21.01.2002.
16 http://www.glaumbaer.is/static/files/Skjol/12-arsskyrsla-4-.pdf. Ársskýrsla 2012, bls. 19. Skoðað 22.
mars 2013. Eitt þessara verkstæða var tekið í hús 1997.
17 http://www.glaumbaer.is/static/files/Skjol/12-arsskyrsla-4-.pdf. Ársskýrsla 2012, bls. 20. Skoðað 22.
mars 2013.