Fréttablaðið - 04.02.2021, Qupperneq 24

Á Vetrarhátíð í ár verður lögð áhersla á útilistaverk og ljós­listaverk og er Ljósaslóðin
því nú í lykilhlutverki. Rúmlega
tuttugu ljóslistaverk munu lýsa
leiðina og verður þeim varpað á
byggingar, glugga og húsasund öll
kvöld hátíðarinnar frá klukkan 18
til 21.
Svipuð slóð milli ára
Ljósaslóðin er unnin í samvinnu
við hátíðina List í ljósi sem farið
hefur fram á Seyðisfirði um árabil.
Rætt var við Sesselju Hlín Jónasar­
dóttur, en hún er stofnandi Listar
í ljósi.
„Við erum búin að vera í sam­
starfi við Reykjavíkurborg síðast­
liðin fjögur ár og þetta er í annað
sinn sem ég hjálpa við að hanna
Ljósaslóð. Vetrarhátíðin er búin að
vera í gangi ansi lengi og það hefur
alltaf verið lögð mikil áhersla á
útilistaverk.“
Sesselja segir skipuleggjendur
reyna að hafa gönguna með svip­
uðu sniði á milli ára. „Þetta hefur
aðeins verið að mótast undanfarin
ár en við erum dálítið búin að vera
að einbeita okkur að því að vera
með svipaða eða sömu slóð ár eftir
ár, þannig að fólk læri að þekkja
hana.“
En þrátt fyrir að slóðin sé svipuð
segir Sesselja verkin sjálf vera eins
fjölbreytt og þau eru mörg. „Í þess­
ari slóð geturðu séð alls kyns verk
eftir alls konar listafólk. Öll verkin
eru lýst á einhvern hátt og þau eru
mjög mismunandi.“
Sjónlist fyrir alla
Hátíðin í ár er að einhverju leyti
frábrugðin, líkt og flestir viðburðir
undanfarna mánuði. „Sýningin má
náttúrulega ekki vera jafn lengi
uppi. Vanalega hefur hún fengið að
standa til klukkan 23 eða rúmlega
það, en í ár verður hún bara til níu.
Þannig að við missum smá tíma
í myrkrinu og þurfum að byrja
aðeins fyrr. Það er svona það helsta
en við auðvitað aðlögumst bara
nýjum tímum.“
Sesselja segir Ljósaslóð vera
fyrir alla og ráðleggur fólki að ná
sér í kort áður en haldið er af stað.
„Þetta er sjónlist fyrir alla og það
er hægt að fara inn á vefsíðuna
og finna kortið þar ásamt öllum
upplýsingum um listaverkin og
listamennina. Ég mæli hiklaust
með því að fólki nái sér í kortið og
verði með það í göngunni. Svo eru
líka skilti fyrir framan hvert verk
þannig að þú getur líka lesið þér til
um viðkomandi verk.“
Sesselja segir áríðandi að hlúa að
hátíð sem þessari og þá sérstaklega
í ár. „Það er eitthvað svo fallegt við
það að fagna ljósi og auðvitað bara
mikilvægt fyrir okkur af því að það
er svo mikið myrkur á veturna,
ekki síst hjá okkur sem búum úti á
landi. Svo á tímum sem þessum er
líka mikilvægt að vera með hátíðir
sem gerast utandyra og gera fólki
kleift að njóta á sínum tíma, sínum
hraða og með sínu fólki – án þess
að vera hrætt um að smitast.“
Ringlaðir áhorfendur
Þegar Sesselja er spurð að því hvort
það sé eitthvert ákveðið augnablik
sem standi upp úr rifjar hún upp
skondna uppákomu. „Við vorum
einu sinni með opnunar atriði hjá
Hallgrímskirkju og það mættu svo
of boðslega margir, mun fleiri en
við bjuggumst við. Það átti sem
sagt að opna hátíðina í beinni
útsendingu en svo gerist það að
áhorfendur stóðu á einni snúrunni
sem tengdist varpanum þannig að
það kom hljóð en engin mynd, það
var skelfilegt og ég hélt að ég yrði
ekki eldri,“ segir hún og hlær.
„Það er klárlega það eftirminni­
legasta. Ég sagði við Gumma, sem
skipulagði gönguna lengi vel, eftir
á: Aldrei aftur skal ég vera í beinni.
Það var smá pínlegt en sem betur
fer náðum við að redda því mjög
fljótt. Þetta opnunaratriði var þá
bara hálft en ekki heilt og áhorf­
endur voru frekar ringlaðir yfir
þessu öllu saman.“
Þetta hafi verið lærdómsrík
reynsla. „Maður lærir af þessu,
ég mun allavega aldrei nokkurn
tímann aftur skilja eftir óvarða
línu,“ segir Sesselja létt í bragði og
bætir við að hún þurfi sem betur
fer ekki að hafa áhyggjur yfir sams
konar uppákomu í ár.
„Það verður ekkert opnunar­
atriði í ár vegna ástandsins. Við
viljum reyna að hafa ákveðið
flæði til að koma í veg fyrir að fólk
safnist saman. Fólk þarf annars
ekkert að gera, bara mæta, rölta
um og skoða. Ég mæli með að bíða
þar til rökkvar þannig að verkin
njóti sín alveg upp á hundrað.“
Er eitthvað sem þú mælir sér-
staklega með?
„Ég er ótrúlega spennt fyrir öllu,
þetta verður ákaflega skemmtileg
slóð í ár og ég mæli bara með því
að fólk nái í kortið og gefi sér tíma
til að skoða þetta allt. Þetta er allt
svo rosalega ólíkt að það er eigin­
lega ekki hægt að gera upp á milli.“
Dagskrá Vetrarhátíðar 2021 og
kortið má nálgast á vetrarhatid.is.
Á tímum sem
þessum er líka
mikilvægt að vera með
hátíðir sem gerast utan-
dyra og gera fólki kleift
að njóta á sínum tíma,
sínum hraða og með sínu
fólki – án þess að vera
hrætt um að smitast.
Ljósaslóðin í lykilhlutverki þetta árið
Á fimmtudaginn hefst Ljósaslóð en þar gefst gestum Vetrarhátíðarinnar kostur á að njóta vel val-
inna listaverka á skemmtilegri gönguleið sem hefst við Hallgrímskirkju og endar hjá Ráðhúsinu.
Sesselja Hlín Jónasardóttir, stofnandi seyðfirsku listahátíðarinnar List í ljósi, ásamt Hilmari Guðjónssyni en þau eru meðal þeirra sem koma að skipulagningu Ljósaslóðar í ár. FRÉTTABLAÐIÐ/ERNIR
4 KYNNINGARBLAÐ 4 . F E B R ÚA R 2 0 2 1 F I M MT U DAG U RVETRARHÁTÍÐ