Heilbrigðisskýrslur - 01.12.1992, Side 69

Sérstakir héraðslæknar hafa verið starfandi í Reykjavík og frá 1991 í
Norðurlandshéraði eystra. I öðrum héruðum hefur einn heilsugæslulækna
héraðanna verið skipaður til héraðslæknisstarfa, þar sem ekki hefur fengist
fjárveiting til reksturs sérstaks embættis héraðslæknis.
Héraðslæknar skulu vera sérstakir ráðunautar heilbrigðisstjórnarinnar um
hvaðeina er við kemur heilbrigðismálum héraðs þeirra. Þeir skulu fylgjast með að
framfylgt sé lögum og reglum um heilbrigðismál í héraðinu. í umboði
heilbrigðisráðuneytis skulu þeir hafa umsjón með heilbrigðisstarfi í sjúkrahúsum,
heilsugæslustöðvum og annars staðar sem slíkt starf fer fram. Þá skulu þeir annast
samræmingu heilbrigðisstarfs í héraði.
6.2.2.2 Héraðshjúkrunarfræðingar
Frá 1990 hafa lögin um heilbrigðisþjónustu gert ráð fyrir að ráðherra skipaði til
fjögurra ára í senn héraðshjúkrunarfræðinga í Reykjavíkurhéraði, Reykjaneshéraði
og Norðurlandshéraði eystra. Annars staðar er ráðherra heimilt að skipa einn af
starfandi heilsugæsluhjúkrunarfræðingum héraðshjúkrunarfræðing til fjögurra ára.
Verkefni héraðshjúkrunarfræðinga skal vera að starfa með héraðslækni og vera
ráðgefandi um og fylgjast með hjúkrun í héraðinu, aðstoða við skipulagningu og
samræmingu hjúkrunarstarfs og við ráðningu hjúkrunarfræðinga og annars
hjúkrunarfólks á heilsugæslustöðvum. Þetta lagaákvæði hefur enn ekki komist í
framkvæmd þar sem fjárveitingar hafa ekki fengist.
6.2.2.3 Heilbrigðismálaráð
I hverju læknishéraði skal starfa heilbrigðismálaráð skipað héraðslækni,
héraðshjúkrunarfræðingi og einum fulltrúa tilnefndum af stjórn hverrar
heilsugæslustöðvar og sjúkrahúss í héraðinu. Ráðherra skal skipa ráðinu formann
til fjögurra ára.
Verkefni heilbrigðismálaráðs eru:
1- Eftirlit með heilbrigðismálum í héraði í umboði heilbrigðisráðuneytis og
landlæknis.
2. Gerð tillagna og áætlana um framgang og forgang verkefna á sviði
heilbrigðismála í héraði.
3. Skipulagning á starfi heilbrigðisstofnana í héraði eftir því sem
heilbrigðisráðuneytið ákveður.
Reglugerð hefur verið sett um heilbrigðismálaráð (nr. 225/1978). Reglugerðin
getur þó ekki talist nema að hluta gild því frá því að hún var sett hefur samsetning
ráðsins breyst.
6.2.3 Heilsugæslustöðvar og sjúkrahús
Lög um heilbrigðisþjónustu gera ráð fyrir að í læknishéruðum landsins séu
annars vegar heilsugæslustöðvar til að annast heilsugæslu og hins vegar sjúkrahús.
Heilsugæsla er skilgreind í lögunum sem heilsuverndarstarf og allt lækningastarf
sem unnið er vegna heilbrigðra og sjúkra sem ekki dveljast á sjúkrahúsum.
65