Fréttablaðið - 24.11.2022, Side 48

Húsnæðisverð fer síhækkandi
og síðasti ársfjórðungurinn
er gjarnan krefjandi með
tilheyrandi álagi. Það getur
verið snúið að finna tíma
til að taka til þegar draslið
virðist vaxa út úr veggjunum.
Hér eru lausnir til að fegra
heimilið með sem minnstri
fyrirhöfn og fæstum krónum.
ninarichter@frettabladid.is
Heimilið þjónar hlutverki sem
griðastaður, hvíldarstaður og
skemmtistaður. Í heimsfaraldri
varð heimilið meira að segja í
mörgum tilfellum vinnustaður. Á
veturna eyðum við oftar en ekki
meiri tíma heima við en aðra tíma
ársins. Því er einfaldlega bráðnauð-
synlegt að heimilið sé eins þægilegt
og skemmtilegt og hægt er, sérsniðið
að þörfum þínum og þinna.
Áramót eru tilvalinn tími til að
endurnýja, breyta og bæta. Þar
sem margir eru uppteknir við störf,
leik og félagslíf í desember er alveg
gráupplagt að hressa upp á heimilið
áður en jólaskrautið fer upp.
Það þarf ekki að vera dýrt að
glæða hversdaginn lífi á ný og það
er alltaf ódýrara að breyta en flytja!
Oft geta litlar breytingar gert helling
og hleypt gleðinni aftur inn í gamalt
og þreytt rými. Við lítum á nokkur
dæmi. n
Verslaðu á nytjamörkuðum
Nytjamarkaðir eru sannkallaðar fjársjóðskistur.
Það getur verið gott að ákveða áður en lagt er
af stað hvað það er sem þú telur þig vanta. Þá er
ágætt að hafa í huga hvaða litir passa inn í rýmið,
hvers konar áferð þú ert að leita að og í hvaða
stærð hlutirnir eiga helst að vera. Þannig verður
leitin á nytjamarkaðinum markvissari og tími þinn
nýtist betur. Þú getur gúgglað nytjamarkaði sem
eru allnokkrir á höfuðborgarsvæðinu, og svo má
nýta Facebook-grúppur sem bjóða upp á verslun
með notaða hluti.
Það er ódýrara að
breyta en að flytja
Skiptu um lýsingu
Bætt lýsing er ein auðveldasta leiðin til að gjör-
breyta rýminu. Hvort sem þú stefnir að því að
skapa afslappandi eða hressandi áhrif, eru margar
leiðir til að lýsa. Litur á lýsingunni er eitt lykilatriði
sem margir fara flatt á, og köld lýsing á ekki alltaf
við. Lýsingin er ekki bara spurning um peru eða
ljósabúnað heldur er staðsetning líka mikilvæg.
Starfsfólk í ljósaverslunum er boðið og búið að
aðstoða þig og einnig er hægt að komast langt
á síðum eins og YouTube, þar sem hægt er að
fræðast og fá ráðgjöf án þess að borga krónu. Þá
er ekki svo galið að hafa málin á herberginu við
höndina þegar þú velur ný ljós í rýmið.
Skipuleggðu heimilið
Ef heimilið er á kafi í drasli er
gott að byrja á því að greina
hvers konar hlutir það eru sem
búa til drasl, og kaupa síðan
geymslulausnir undir þá sömu
hluti, ef maður þarf að eiga þá
áfram. Ef allir hlutir eiga sér
vísan stað, þá þarf aldrei að
vera drasl. Margar verslanir
bjóða alls konar sniðugar og
smart geymslulausnir sem
geta reddað þér úr draslvíta-
hringnum og meira að segja
fegrað heimilið í leiðinni.
Bættu við smá lit
Litir á veggina er önnur leið til að snarbreyta útliti
og andrúmslofti herbergis með lítilli fyrirhöfn og
tilkostnaði. Það er hægt að stækka og minnka her-
bergið og nánast breyta löguninni á rýminu með
litum. Það er ekki nauðsynlegt að mála alla veggina
í sama lit. Hægt er að mála karma, kanta og setja
upp litaða lista og skreytingar. Málningarverslanir
bjóða oft upp á þjónustu og bæklinga sem geta
aðstoðað við að fá hugmyndir. Þumalputtareglan
er að dökkir litir gefi tilfinningu fyrir smærra rými
og ljósir litir stækki það. Það er þó ekki þar með
sagt að forðast beri dökka liti með öllu, og þeir
geta verið afskaplega fallegir á réttum stöðum til
að skapa hlýju og notalegt andrúmsloft. Þá er hægt
að mála hálfan vegginn í einum lit og efri hlutann í
öðrum. Gömul hús geta notið sín vel og hreinlega
blómstrað í réttu litavali. Við mælum með að fá
ráðgjöf fagfólks varðandi rétta blöndu og gljástig
og hlusta á góða hljóðbók á meðan málað er.
Gefðu gömlum mublum nýtt líf
Það þarf ekki alltaf að kaupa nýtt. Það er hægt að
láta sprautulakka eldri mublur og bólstra gamla
sófa. Nýir hnúðar og handföng á skúffur, skápa og
innréttingar geta gert ótrúlega mikið. Til dæmis
geta hversdagslegar eldhúsinnréttingar fengið
nýtt líf með þessum hætti, rétt eins og ljót peysa
getur orðið flott með nýjum hnöppum.
40 Lífið 24. nóvember 2022 FIMMTUDAGURFRÉTTABLAÐIÐLÍFIÐ FRÉTTABLAÐIÐ 24. nóvember 2022 FIMMTUDAGUR