Skessuhorn - 30.11.2022, Side 14
MIÐVIKUDAGUR 30. NÓVEMBER 202214
Þær Hulda Margrét Brynjars-
dóttir og Marta Karen Kristjóns-
dóttir hafa tekið höndum saman og
skipulagt jóganámskeið sem verða
kennd á Akranesi á nýju ári. Þær eru
báðar jógakennarar og segist Hulda
hafa fundið fyrir mikilli eftirspurn
eftir jógatímum á Akranesi undan-
farið en tímarnir verða kenndir í sal
Sjúkraþjálfunar Akraness að Suður-
götu 126. Jóga er stór hluti af lífi
þeirra beggja og segja má að þær
séu eins konar yin og yang í sinni
jógaiðkun, þar sem Hulda hefur
nýtt sér jóga til að leita inn á við,
hægja á og finna styrkinn sem býr
í mýktinni. Marta hefur hins vegar
fundið sjálfa sig í kröftugu jógaflæði
og er að sögn mikill eldur.
Kveikjan að Jógaveru
Hulda hafði í nokkurn tíma hugsað
sér að bjóða upp á jóganámskeið á
Akranesi en vantaði einhvern með
sér í það sem gæti vegið upp á móti
hennar orku, og boðið upp á kröft-
ugri tíma. Þegar þær Marta kynnt-
ust svo fyrr á þessu ári má segja að
jógað hafi tengt þær saman en það
var líka ákveðinn samnefnari að þær
bjuggu báðar í Hvalfjarðarsveit.
Hulda bar því hugmynd sína, um
jóganámskeið, undir Mörtu sem
stökk strax á vagninn. Hún hafði
nýlega eignast barn og var því, að
sögn, búin að vera í ákveðinni með-
göngubúbblu í nokkurn tíma en var
tilbúin til að brjótast út úr henni og
iðka aftur jóga af krafti.
Styrkurinn í mýktinni
Hulda er ættuð úr Ólafsfirði en hún
fæddist á Akureyri og flutti á Akra-
nes fimm ára gömul. Hún byrj-
aði strax að æfa fótbolta og spil-
aði með ÍA allt þar til hún flutti til
Noregs 2018. Hún segir að áhugi
sinn á jóga hafi kviknað fyrst þegar
hún, ásamt stelpunum í fótbolt-
anum, var skikkuð í jógatíma með-
fram venjulegum æfingum. „Fót-
boltinn er svolítil harka og það er
ýmislegt sem ég hef getað nýtt mér
úr honum út í lífið. Þegar við mað-
urinn minn flytjum svo til Noregs
með börnin okkar tvö árið 2018
upplifum við miklu meira hæglæti
þar heldur en við þekktum hér á
Íslandi. Þar sprettur eiginlega upp
jógaáhuginn minn, því þar náði
ég að hægja á mér og finna minn
styrk,“ segir Hulda sem ákvað
þegar hún flutti heim 2021 að skrá
sig í jógakennaranám.
Nú 10. desember næstkom-
andi mun Hulda útskrifast úr
jógakennaranámi hjá Yogavin
undir handleiðslu Ástu Arnar-
dóttur jógakennara og eiganda
Yogavin. „Þar er farið mjög djúpt
ofan í andleg fræði jóga og and-
lega iðkun. Og það er svolítið það
sem mig langar að koma með inn
í mínum tímum, þ.e. styrkurinn í
mýktinni. Það þarf ekki alltaf að
vera að hamast og keppast heldur
er hægt að öðlast gríðarlega mik-
inn styrk í gegnum mýktina.“
Hulda er í stjórn Fyrstu fimm
sem er félag sem berst fyrir bætt-
ari kjörum fyrir barnafjölskyldur.
Hún á og rekur einnig fyrirtækið
Leið að uppeldi þar sem hún hjálpar
foreldrum að innleiða virðingaríka
uppeldisfræði og hæglæti. „Þetta
snýst um að hægja á, að börnin fái
meiri tíma og fjölskyldur séu meira
saman. Börn eru mikið í vistun í dag
og með alls konar prógram í gangi
þannig að það að búa til innra rými
sem er ákveðin ró og getur þá skilað
sér inn í fjölskyldulífið, það er hugs-
unin,“ segir Hulda og bætir brosandi
við að hún sé líklega ekki þekkt fyrir
hæglæti því á sínum fótboltaferli hafi
hún verið hávær og óþolinmóð.
Hulda var meira og minna heima
með dætur sínar í fimm ár. Þegar
Covid skall á í byrjun árs 2020 nýtti
hún svo tækifærið og var með þær
í heimaskóla allt þar til þau fluttu
heim til Íslands í fyrra. „Við upp-
götvuðum það þegar við komum
til Íslands að það þarf að hafa rosa
mikið fyrir því fjárhagslega, að
vera heima með börnin sín,“ segir
Hulda sem fann sig þá knúna til
þess að hjálpa foreldrum að finna
aðrar leiðir til þess að hægja á.
„Og það er meðal annars þetta, að
finna sér tíma fyrir sjálfan sig sem
foreldri. Það að fara út úr húsi og
rækta sig á einhvern hátt og hreyfa
sig aðeins án þess að þurfa að fara
á einhverjar brjálaðar morgunæf-
ingar, það helst í hendi við þennan
hæglætislífstíl og barnvænna sam-
félag. Þannig jógað getur hjálpað
foreldrum að innleiða meira hæg-
læti, tengja betur inn á við og for-
gangsraða betur. Þetta tengist allt
mjög mikið.“
Eldur í kröftugu
jógaflæði
Marta Karen Kristjónsdóttir er úr
Reykjavík en ólst upp í Svíþjóð frá
sjö ára aldri. Hún fór í sinn fyrsta
jógatíma árið 2011 og ákvað árið
2016 að fara í jógakennaranám til
Rishikesh í Indlandi en sú borg er
þekkt sem höfuðborg jógans. „Ég
ætlaði ekki endilega að fara að kenna
jóga heldur leit ég frekar á námið
sem sjálfsþekkingarferðalag fyrir
mig,“ segir Marta sem hélt áfram í
hefðbundu háskólanámi eftir dvöl
sína á Indlandi. Fyrir hafði hún
lokið BS námi í fashion management
en fór svo í meistaranám í sjálfbærri
þróun og útskrifaðist úr því 2019.
„Út frá sjálfbærri þróun læri ég að
forgangsraða andlegri heilsu og læri
persónulega sjálfsrækt til þess að
efla samfélag og til þess að koma af
stað sjálfbærri þróun. Þannig ég fer
mikið í aðra átt fyrir svona 3 árum
og er búin að vera í mikilli sjálfs-
skoðun því ég fatta á ákveðnum
tímapunkti hvað það er mikilvægt
að forgangsraða heilsunni, sérstak-
lega út frá Covid og öllu því.
Marta eignaðist sitt fyrsta barn
fyrr á þessu ári en hún ákvað undir
lok meðgöngunnar að skrá sig í raf-
rænt framhaldsnám í jóga, í jóga-
skóla í Rishikesh. „Ég kannski mis-
reiknaði tímann aðeins, hvað það
tekur mikinn tíma að vera með
barn,“ segir Marta og hlær en
hún er að klára námið um þessar
mundir. „Þannig ég hélt í raun
áfram að byggja ofan á grunninn
sem ég var með eftir grunn-
námið sem ég tók á Indlandi en
kennararnir sem eru Indverjar hafa
vaxið upp í þessu jógaumhverfi og
má segja að þeir séu með jóga í
blóðinu,“ segir Marta.
Þegar hún svo fer að stunda með-
göngujóga í Jógasetrinu endar það
með því að hún fer að leysa af þar
og kenna tímana. Það var í fyrsta
sinn sem hún kenndi meðgöngu-
jóga, en hún hafði áður kennt tíma
og tíma af hefðbundu jóga. „Það
kenndi mér mjög mikið að hægja á
og fara meira inn í yin flæði, sem
hjálpar manni að slaka betur og
treysta. Það var samt smá áskorun
fyrir mig af því ég hef verið mjög
mikill eldur og hef verið meira
í kröftugu flæði en þurfti þarna
einmitt að finna styrkinn í mýkt-
inni, eins og Hulda var að segja.“
Marta hefur einnig verið að kenna
mömmutíma í afleysingum en hana
langar að bjóða upp á meðgöngu-
tíma í mars, hér á Akranesi.
Fjölbreytt jóganámskeið
verða í boði
Í janúar hefst grunnámskeið í jóga
í umsjón Huldu. Það er fjögurra
vikna langt, kenndir eru tveir tímar
í viku og verður nýtt námskeið í
hverjum mánuði. „Við förum þar
ofan í grunninn en námskeiðið er
ekki hugsað bara fyrir þá sem hafa
ekki verið í jóga heldur líka þá sem
hafa tekið sér pásu eða vilja fara
dýpra ofan í grunninn,“ segir Hulda.
Í febrúar hefst svo jógaflæði-
námskeið í umsjón Mörtu, það er
hugsað fyrir þá sem eru vanari jóga
en allir eru þó velkomnir. „Tím-
arnir verða blanda af hatha fyrir
styrk og stöðugleika og svo vinyasa
flæði sem snýst um að fylgja andar-
drættinum inn í mjúkar hreyfingar.
Svo verður dass af yin og nidra
djúpslökun. Ég flétta þessu svo-
lítið saman í mitt eigið persónu-
lega flæði sem ég hef verið að þróa
en ég tel mig vera eilífðarstúdent
og held áfram að þróa mitt flæði,“
segir Marta.
Þær Marta vilja hvetja fólk til
að skrá sig á námskeið en þær eru
nokkurn veginn að vaða blint í sjó-
inn. „Við erum spenntar að sjá
hvernig verður tekið á móti okkur
og svo ætlum við að þróa okkar
hugmyndir áfram þaðan. Við erum
bara að prufa okkur áfram og
þurfum að finna fyrir því hver er
að mæta og aðlaga okkur eftir því,“
segir Marta og Hulda tekur í sama
streng. „Við erum með ákveðnar
hugmyndir um hvernig við viljum
hafa námskeiðin og framboðið á
þeim og ég veit að fólk hefur verið
að óska eftir jóga hérna á Akra-
nesi undanfarið. Við þurfum svo-
lítið að þreifa okkur áfram og finna
hvar áhuginn hjá fólki liggur og við
erum meira en tilbúnar að mæta
þeim og ég sé þá fyrir mér að bjóða
upp á fjölbreytta tíma, eftir því hvar
áhuginn liggur hjá fólki. Þannig að
það er um að gera að skrá sig í tíma
og ef það koma svo einhverjar óskir
um sérstaka tíma þá reynum við að
mæta þeim,“ segir Hulda.
Þá sjá þær einnig fyrir sér í fram-
tíðinni að vera með staka viðburði
öðru hvoru, eins konar „pop up“,
en það ræðst einnig af viðtökum.
Kynningartímar
í desember
Í desember verða kynningartímar á
námskeiðunum þar sem fólki gefst
kostur á að mæta, kynnast þeim
Huldu og Mörtu og fá smjörþef-
inn af því jóga sem þær munu bjóða
upp á. Þriðjudaginn 13. desember,
kl. 17:30, verður Hulda með kynn-
ingartíma fyrir grunnnámskeiðið.
15. desember kl. 17:30 kynnir
Marta jógaflæði og laugardaginn
17. desember kl. 17:30 verða þær
báðar á staðnum en þá standa þær
fyrir Jóla zen viðburði. „Það er
tveggja tíma viðburður þar sem við
einblínum meira á hugleiðslu og
slökun og einhverjar hreyfingar í
bland við það. Það verður jólaþema
í þeim tíma, við ætlum að fagna
jólunum en kannski líka fá fólk til
að setja sér smá ásetning fyrir jólin.
Setjast niður og jarðtengja sig.
Frjáls framlög eru í kynningar-
tímunum í desember en fjögurra
vikna námskeiðin verða á 19.990
krónur. Þá er kennt tvisvar í viku
og er hver tími 75 mínútur.
Hægt er að skrá sig á námskeið í
gegnum Facebook síðuna Jógavera.
gbþ
Jóganámskeið hefjast á Akranesi á nýju ári
F.v. Marta Karen Kristjónsdóttir og Hulda Margrét Brynjarsdóttir. Með á myndinni er dóttir Huldu, Andrea Karen og í bakgrunni speglar sig Lukka Rún, dóttir Mörtu.