Framkvæmdafréttir Vegagerðarinnar - 31.03.2023, Blaðsíða 18

18 Framkvæmdafréttir nr. 724
2. tbl. 31. árg.
Framkvæmdafréttir nr. 724
2. tbl. 31. árg.
19
Reglugerðir 1979 og 1989
Áður en reglugerðin 1979 kom út mátti sjá ný merki
í notkun án þess að þau væru auglýst sérstaklega.
Árið 1972 sást merkið „Brött brekka“ í fyrsta sinn í
Kambabrekku og 1975 sást merki fyrir „Botngötu“
í fyrsta sinn í Kópavogi. Þá mátti einnig sjá mynd af
ferköntuðu boðmerki í blaðafrétt en það hafði varið
lagfært og var orðið hringlaga flötur þegar reglugerðin
tók gildi 1979. Einnig sást mynd af gátskildi í dagblaði,
en hann sneri reyndar öfugt.
Vegnúmerakerfið, eins og við þekkjum það í dag,
var fullmótað 1973 og vegakerfið var merkt með
leiðamerkjum skv. því árin á eftir. Það birtist svo í
reglugerðinni 1979.
Breytingar sem fylgdu nýjum reglugerðum
voru fyrst og fremst viðbætur, t.d. fjölgaði
umferðarmerkjunum úr 42 í 126 í reglugerðinni
1979. Þá varð líka stór breyting þegar
stöðvunarskyldumerkið breyttist en það var í takt við
það sem var að gerast um allan heim. Önnur áberandi
breyting í þessari reglugerð var merkið „Bannað að
leggja ökutæki“ en það var áður P með skástriki yfir.
Umferðarráð annaðist kynningu á þessum
viðbótum og breytingum og tókst það vel. Fjölmiðlar
fjölluðu um málið á áberandi hátt. Það er eftirsjá
að Umferðarráði og Útvarpi Umferðarráðs sem var
starfrækt í mörg ár. Þar var fólk sem hafði fyrst og
fremst það hlutverk að uppfræða um umferðarmál og
halda umræðunni opinni.
Stóra breytingin í reglugerðinni 1989 eru
vegvísarnir. Þar er tekinn upp danskur útlitsstaðall en
þó með þeim snúningi að þar sem Danir nota rauðan lit
notum við bláan og öfugt. En þar með er ekki öll sagan
sögð. Eitthvað mun hafa skort á samráð því innan
Vegagerðarinnar voru sumir á því að halda bæri í fyrri
liti sem voru svartir stafir á gulum grunni. Niðurstaðan
varð að merki með hvítum grunni voru notuð á
höfuðborgarsvæðinu en gul merki á öðrum stöðum og
aftur eru rökin að gult sést betur í snjó. Það var svo
naglfest í reglugerð 1995.
↑
Mynd 4 Sænskar teikningar í reglugerðinni 1979.
Táknmyndir ökutækjanna voru frekar klessulegar í
þessari seríu.
↓
Mynd 5 Nýr vegur um Kambabrekku var tekinn í
notkun síðla árs 1972 og þá sást í fyrsta sinn merki
sem táknar bratta brekku.
→
Mynd 6 Stöðvunarskyldumerkið breyttist
í reglugerðinni 1979 en það var í takt við
það sem var að gerast um allan heim. Það
var gagnrýnt hér innanlands að STOP væri
stafsett með einu P en rökstuðningur fyrir því
var að þetta væri ekki orð heldur tákn.