Goðasteinn - 01.09.2003, Page 97

Goðasteinn 2003
vegspottinn í Raftholtssundi sem nýttur var, var alltaf að síga dýpra í mýrina.
Fyrir rúmum áratug var þesssum kafla sem er 1,3 km. breytt, vegurinn færður
austur í mýrina og liggur nú vel upphlaðinn vegur beint úr Raftholtsbjalla í
Vatnshóla. Má því segja að Hagabrautin sé komin í varanlegt horf nema hjá
Saurbæ þar sem hún liggur um hlaðið sem er mjög bagalegt fyrir ábúendur og
breyting er ekki í sjónmáli.
Ofaníburður í Hagabrautina á þessum fyrstu árum var alltaf af skornum
skammti og það versta var að vegurinn var tekinn af nýbyggingaáætlun löngu
áður en hann þoldi umferð allt árið. Þetta varð til þess að hann var ófær í margar
vikur á hverju vori. Við þessar aðstæður eins og áður reyndi á samtakamáttinn,
það voru því mörg vorin sem bændur komu saman með dráttarvélar og kerrur,
týndu grjót af vegköntum og víðar og dyngdu í verstu hvörfin svo mjólkurbíllinn
kæmist hluta leiðarinnar. Heldur betur gekk að halda veginum færum vestan-
megin þar sem ofaníburðurinn úr Hvammsgryfjum og Ketilsstaðagryfjunum hélt
betur en sandurinn og móhellan úr Sandskörðunum á Asnum og Klaufinni. Verst
fór vegurinn vorið 1957 þegar Mjólkurbúið var með „Hengseltrukkinn“ á þessari
leið. Hann var búinn að koma sér afar vel í snjóþyngslunum um veturinn, þessi
bifreið komst um veginn allt vorið, en eftir var vegurinn gjörsamlega sundur-
plægður, aðeins með mestu varkárni var hægt að læðast um hann á jeppum.
Eitthvað var nú borið ofan í veginn á næstu árum en viðhaldið var alltaf of lítið
og var svo fram um 1970. Ég tel það hafi verið um svipað leiti sem M.B.F. lauk
tankvæðingu mjólkurflutninga að Þórður Bjarnason oddviti í Meiri-Tungu gekk
fram í því að fá aukafjárveitingu til þess að bera ofan í veginn það rösklega að
hann þyldi umferð allt árið. Nokkuð þótti vegurinn grófur og harður eftir það því
auðvitað drógst í einhver ár að bera í hann slitlagið. En vegurinn hefur búið að
þessu síðan og lítið þurft að gera annað en viðhalda slitlaginu.
Þetta er nú það helsta sem ég man til frásagnar um þennan raunar hálfrar aldar
gamla veg sem íbúar sveitarinnar vildu kalla „Uppholtaveg“. En Vegagerðin sat við
sinn keip og setti upp skiltið Hagabraut. Nú er þessi vegur merktur „Hagi 286“ við
báða enda. Óvíst er hvenær sá tími kemur að hann verði lagður bundnu slitlagi.
-95-