Bændablaðið - 10.10.2024, Side 8

8 Fréttir Bændablaðið | Fimmtudagur 10. október 2024
Stóru-Akrar 2 liggja við
þjóðbraut í Skagafirði. Býlið fékk
umhverfisverðlaun Skagafjarðar
á dögunum.
Á Stóru-Ökrum 2 er rekið kúabú,
stunduð hestamennska og ræktun
á sauðfé. Eigendur eru Ragnhildur
Jónsdóttir og Agnar Gíslason. Þau
tóku við búi af Huldu Ásgrímsdóttur
og Jóni Sigurðssyni, foreldrum
Ragnhildar, vorið 2013 og eru fjórða
kynslóð ábúenda. Stóru-Akrar 2 eru
um 110 ha jörð.
„Við erum með 66,6 árskýr
og róbótafjós,“ segir Ragnhildur,
aðspurð um bústofninn. „Sauðfé er
áhugamál elsta sonarins; þær eru 35
kindurnar. Að auki eru 30 hross og
þau eru líka áhugamál,“ segir hún.
Þakkar móður sinni
Býlið hlaut umhverfisverðlaun
Skagafjarðar á dögunum og voru
þau þá veitt í tuttugasta sinn. Í
greinargerð með verðlaunum sagði
að þangað væri „fagurt heim að líta
þegar ekið er um sveitina, fjós, útihús
og íbúðarhús vel og fallega römmuð
inn með trjám og lággróðri og fallegt
samræmi með litaval húsa“.
„Ég þakka þetta foreldrum
mínum. Móðir mín heitin var svona
smekkleg,“ segir Ragnhildur. „Henni
var mjög umhugað um að ásýnd
bæjarins, sem stendur við þjóðveg 1
og er því í alfaraleið, væri falleg. Við
höfum svo reynt að halda í horfinu
og sett okkar svip aðeins á.“
Aspir standa meðfram vegi og
ramma inn milli t.d. fjóss og bæjar
og garðurinn er gróinn með birki
og fleiri tegundum. Húsum hefur
öllum verið vel við haldið. „Þau
voru mjög dugleg í þessu, foreldrar
mínir,“ bætir Ragnhildur við. Nóg
sé að gera við að halda í horfinu
og sífellt einhver verkefni þar að
lútandi.
Fimmta kynslóð gæti tekið við
Þau Ragnhildur og Agnar, sem er
úr Álftagerði handan Héraðsvatna,
eiga þrjú börn; 19 og 18 ára drengi
og 13 ára stúlku. Hjónin vinna bæði
á búinu og elsti sonurinn einnig, en
hann hefur lokið vélvirkjanámi og
ætlar sér í Landbúnaðarháskólann á
Hvanneyri eftir ár. Því gæti mögulega
fimmta kynslóð fjölskyldunnar tekið
við búinu einn góðan veðurdag. „Ja,
það er spurning, maður veit aldrei,“
segir Ragnhildur hlæjandi.
Mannlífið í sveitinni er gott að
hennar sögn. Hún hitti konurnar í
kvenfélaginu og þau hjónin syngi í
kirkjukórnum. „Félag kúabænda er
svo ágætlega duglegt að vera með
pöbba-hittinga og fleira, svo það er
alltaf eitthvað í gangi.“
Hún segir þau komast þokkalega
af. „Auðvitað er þetta erfitt meðan
vaxtastigið er svona hátt, það er
bara þannig. En við erum bjartsýn
á að þetta fari að lagast. Það þýðir
ekkert annað fyrst maður er kominn í
þetta,“ segir Ragnhildur að endingu.
Steinullarmoltan fékk
viðurkenningu
Umhverfisverðlaun Skagafjarðar
voru veitt sveitabýli með
hefðbundinn búskap, sveitabýli án
slíks, lóð í þéttbýli, lóð við fyrirtæki
og fyrir einstakt framtak, sem að
þessu sinni féll í skaut steinullarmoltu
Steinullar á Sauðárkróki. Fyrirtækið
hefur verið í þróun slíkrar moltu
allt frá árinu 2009. Notast er við
steinullarúrgang, hrossaskít og
gras sem gefur hitastig sem dugar
til að brjóta niður formaldehýð í
hratinu. Steinullarmolta fékk árið
2021 staðfestingu frá MAST sem
jarðvegsbætandi efni og Steinull
hefur síðan í fyrra haft ótímabundið
starfsleyfi fyrir moltuframleiðslunni.
/sá
Skagafjörður:
Fagurt heim að líta
– Stóru-Akrar 2 fá umhverfisverðlaun Skagafjarðar
Fallegt og snyrtilegt er að Stóru-Ökrum 2 sem fengu nýlega umhverfisverðlaun. Fjós, útihús og íbúðarhús eru römmuð inn með trjám og lággróðri og
fallegt samræmi í litavali húsa. Myndir / Aðsendar
Toppurinn í dælum
er frá JUNG PUMPEN
Eigum til Jung dælur á lager.
• Brunndælur
Jung Pumpen var stofnað í Steinhagen í Þýskalandi
árið 1924 og hafa framleitt hágæða dælur alla tíð.
Set ehf • Röraframleiðsla • Selfossi
Vöruhús •Klettagörðum
Sími: 480 2700
Netfang: sala@set.is
www.set.is
• Skolpdælur
• Stýringar
Frekari upplýsingar á www.set.is
Á Stóru-Ökrum 2 er rekið kúabú, stunduð hestamennska og ræktun á sauðfé.
Eigendur eru Agnar Gíslason og Ragnhildur Jónsdóttir.
Rýr uppskera
af melgresi
Fræskurður hefur staðið yfir í
haust á vegum landgræðsluhluta
Lands og skógar.
Fræskurður Lands og skógar í
haust skilaði túnvingulsuppskeru
í góðu meðallagi. Uppskera af
melgresi er þó skv. upplýsingum
stofnunarinnar fremur lítil.
„Að þessu sinni var melgresi
eingöngu uppskorið á Mýrdals-
sandi í nokkra daga. Ax er ekki
mjög stórt og svo misstum við það
að hluta í illviðri. Algengast er að
fyrst sé skorið í Landeyjum, svo
á Mýrdalssandi og stöku sinnum
endað í Þingeyjarsýslum,“
segir Pétur Halldórsson,
kynningarstjóri hjá stofnuninni.
Hann segir nákvæmar magn-
og gæðatölur ekki liggja fyrir fyrr
en líður á vetur og fræhreinsun
lýkur.
Meginhlutverk fræverkunar-
stöðvar Lands og skógar í
Gunnarsholti er frærækt og
fræverkun tegunda til uppgræðslu.
Tvær tegundir eru í framleiðslu:
melgresi (Leymus arenarius) og
túnvingull (Festuca richardsonii).
Fræöflun fer fram síðla sumars og
fram á haust þegar fræþroski nær
hámarki, en þó áður en náttúruleg
frædreifing hefur átt sér stað.
Túnvingull þroskast í lok ágúst,
en melgresi þroskast seinna og
stendur melsláttur oft langt fram
í september. Þegar fræið er komið
í hús er það þurrkað og hreinsað.
/sá
Túnvingull gaf ágætlega af sér.
Mynd / Wikipedia
Hrossaræktarfélag Hrunamanna mun niður-
greiða hluta sýningargjalda kynbótahrossa
fyrir félaga sína.
„Okkur finnst mjög gaman að geta gert þetta.
Það er eitt af markmiðum félagsins að styðja við
hrossarækt í sveitinni og okkur finnst þetta kjörin
leið,“ segir Guðríður Eva Þórarinsdóttir, formaður
félagsins, sem telur um sjötíu meðlimi.
Niðurgreiðslan nemur tíu þúsund krónum á
hvern hest sem mætti til fullnaðardóms árið 2024.
Hrossið þarf að hafa verið ræktað af og í eigu
félagsmanns þegar það var sýnt.
„Skráningargjöld á kynbótasýningum hafa
hækkað mjög mikið og hratt á undanförnum árum.
Í sumar kostaði til dæmis 40.675 krónur að fara
með hross í fullnaðardóm. Það eru ekki mörg ár
síðan það var á bilinu 25–28.000 krónur, svo með
þessu tekst okkur eitthvað að koma til móts við
þessa hækkun. Við vonumst til þess að félagar
okkar verði áfram duglegir að mæta með hross í
dóm,“ segir Guðríður. /mhh
Hrossarækt:
Niðurgreiða sýningargjöld
Folaldsmeri og afkvæmi hennar á bænum Fossi í Hruna-
mannahreppi. Hrossaræktarfélag hreppsins styður við félags-
menn sína með niðurgreiðslu á sýningargjöldum kynbótahrossa.
Mynd / Bára Másdóttir