Morgunblaðið - 11.08.2004, Blaðsíða 10

FRÉTTIR
10 MIÐVIKUDAGUR 11. ÁGÚST 2004 MORGUNBLAÐIÐ
BORGARRÁÐ hafnaði í gær ósk
Kópavogsbæjar um að leggja vatns-
leiðslu frá Heiðmerkursvæðinu um
land Reykjavíkur til Kópavogs.
Í bókun sem samþykkt var sam-
hljóða í borgarráði segir að ekki sé
hægt að fallast á lögn vatnsleiðslu
Kópavogsbæjar frá svæði sem borg-
arráð álíti í eigu Reykvíkinga. Lang-
varandi óvissa hafi verið um landa-
og lögsögumörk á Heiðmerkursvæð-
inu og hún valdi þessari ákvörðun.
Vænta megi að úrskurður óbyggða-
nefndar, sem búist sé við síðar á
árinu, varpi ljósi á réttarstöðu aðila á
svæðinu. Það sé hlutverk borgarráðs
að standa vörð um sameiginlegar
eignir borgarbúa og þar með talið
landareignir.
„Þetta er allt hið furðulegasta
mál,“ segir Sigurður Geirdal, bæjar-
stjóri í Kópavogi, og Reykjavíkur-
borg geti ekki neitað öðru sveitarfé-
lagi að leggja vatnsleiðslur um land
sitt þó sveitastjórnir ráði hvar þær
liggi. Í dag kaupi Kópavogsbúar vatn
frá Orkuveitu Reykjavíkur á óheyri-
lega háu verði. Ekki sé algengt að
eitt sveitarfélag reyni að stöðva ann-
að í að afla sér vatns.
Í frétt frá borgarráði segir að
Vatnsveita Reykjavíkur, sem nú er
hluti af Orkuveitu Reykjavíkur, hafi
borað nokkrar holur í Vatnsenda-
krikum í Heiðmörk. Fyrirtækið
hefði byggt tilkall til landsins á eign-
arnámi árið 1949 og eigandinn hefði
fengið greiddar bætur fyrir 689
hektara.
Sigurður segir að eigendur Vatns-
enda hefðu selt Kópavogsbæ landið
fyrir um tveimur árum. Nóg sé til af
vatni á þessu svæði alla leið til Hafn-
arfjarðar – aðgengi að því sé ekki
takmarkað – og ákvörðun um vatns-
töku þarna ráðist af góðri staðsetn-
ingu. „Við höldum áfram og náum
okkur í vatn,“ segir hann. „Það hefur
ekkert verið deilt um það að þetta er
í eigu Vatnsendabóndans og Vatns-
endi er í Kópavogi. Af honum kaup-
um við rétt til að taka þarna vatn.“
Sigurður segir að Kópavogsbær
muni áfram stefna að því að leiða
vatn í bæinn í leiðslu. Látið verði
reyna á hvort þessi ákvörðun borg-
arráðs standist.
Reykjavíkurborg, Kópavogur og
ríkið hafa gert tilkall til Vatnsenda-
krikans og er beðið úrskurðar
óbyggðanefndar sem sker úr um lög-
sögumörk þessara aðila.
Reykjavík og Kópavogur deila um landa- og lögsögumörk á Heiðmerkursvæði
Kópavogsbæ
meinað að leggja
vatnsleiðslur
GAMAN er að eiga góðan hest og sárt að þurfa
kveðja hann. Drífa Kristjánsdóttir og Ólafur
Einarsson á Torfastöðum í Biskupstungum hafa
fengið að reyna þetta hvort tveggja því hryss-
an Randfríður frá Torfastöðum sem er fædd
þeim, var sýnd á nýafstöðnu landsmóti hesta-
manna þar sem hún hlaut góðan dóm. Eftir
mótið fengu þau gott tilboð í hryssuna, svo gott
að þau gátu ómögulega hafnað því. „Svona er
nú lífið,“ sagði Ólafur í samtali við Morg-
unblaðið, „stundum þarf að selja það sem mað-
ur vildi gjarnan eiga en það er huggun harmi
gegn að við eigum bæði móðurina og föðurinn
og í vor fæddist okkur alsystir hennar og vænt-
anlega kemur annað alsystkin næsta vor ef allt
gengur að óskum.“
Daginn sem hryssan kvaddi Torfastaði lagði
Drífa á þennan gæðagrip og var af því tilefni
smellt af nokkrum myndum og er þessi ein
þeirra. Svo skemmtilega vill til að á myndinni
eru auk Randfríðar og Drífu í bakgrunni móðir
Randfríðar, Randalín frá Torfastöðum. Rétt
fyrir ofan er svo móðuramma Randfríðar, Vera
frá Kjarnholtum. Efst og næst skógarlundinum
má svo greina bleikálóttan hest, föður Rand-
fríðar, Hárek frá Torfastöðum.
Söluverðmæti Randfríðar er í kringum fimm
milljónir króna en Ólafur setur reyndar upp
véfréttarsvip þegar minnst er á verðið en neit-
ar þó engu þegar þessi upphæð er nefnd og
lætur sér í léttu rúmi liggja þótt menn hafi
uppi ýmsar getgátur. „Menn verða að hafa um
eitthvað að tala,“ segir Ólafur glottir við.
Hinsti sprettur heima í túni
VEIÐIMENN hreindýra kvarta yfir
því nú í ár líkt og í fyrra að illa gangi
að veiða hreindýrakvótann á svæði
níu í Flateyjarlöndum við Höfn í
Hornafirði, sem er ríkisjörð. Veiði-
kvótinn í ár er sá sami og í fyrra eða
800 dýr og veitt veiðileyfi voru líka
800. Í fyrra veiddust 740 dýr og sá
kvóti sem gekk af var allur af svæð-
um átta (Lóni og Nesjum) og níu.
„Það er bara við sama heygarðshorn-
ið, nema [svæði] átta er mikið skárra
núna heldur en var í fyrra. Það hefur
náð ágætis samkomulag við þá flesta
þar. Það er aðallega [svæði] níu sem
er vont ástand á,“ segir Karen Erla
Erlingsdóttir, starfsmaður hrein-
dýraráðs og Umhverfisstofnunar á
Egilsstöðum. Hún segir að engin
breyting hafi orðið frá því í fyrra.
Davíð Jens Hallgrímsson fékk út-
hlutað veiðileyfi á svæði níu og hefur
áhyggjur af því að hann fari tóm-
hentur heim eftir að veiðitímabilinu
lýkur 15. september. Veiðigjaldið á
því svæði er 55.000 kr. fyrir tarf en
30.000 fyrir kú en úthlutað hefur ver-
ið veiðileyfi á 50 kýr. Hann segir það
ótrúlegt að landbúnaðarráðuneytið
hafa ekkert aðhafst vegna málsins í
áraraðir. „Ég sótti ekki um á þessu
svæði en það var allt annað fullt.
Menn hafa ekki treyst sér í þetta
svæði út af þessum málum.“
Hreindýraveiðimönnum hafa
hingað til ekki borist nein svör frá
landbúnaðarráðuneytinu varðandi
fyrirspurnir um ríkisjörðina, Flatey
á Mýrum, sem þeir hafa ekki fengið
að veiða á. „Það er búið að reyna
ítrekað,“ segir Karen. Hún bætir því
við að reynt hafi verið að ganga á
fund landbúnaðarráðherra oftar en
einu sinni en það hafi ekki gengið eft-
ir.
Í viðtali við Morgunblaðið í janúar
benti Karen á að helsta vandamálið
varðandi hreindýraveiðar væri land
Flateyjar á Mýrum. Nálægar jarðir
væru lokaðar veiðimönnum þótt þær
væru eign ríkisins og leigðar til eins
árs í senn. Bóndinn í Flatey á Mýr-
um, Ólafur Þ. Óskarsson, sagði í við-
tali við Morgunblaðið í janúar að
hann vildi fá 75% af andvirði dýranna
en ekki 50% eins og flestir bændur
væru að fá. Hann telur hreindýrin
vera hlunnindi jarðanna og því eigi
að borga fyrir þau hlunnindi. Benti
hann t.a.m. á að í Svíþjóð og Noregi
væru lögin þannig að felld dýr væru í
eigu þeirrar jaðar sem þau væru felld
á.
Karen segir að reynt hafi verið að
ná samkomulagi við bóndann en
einnig landbúnaðarráðuneytið, en
ráðuneytið hefur með leigujarðirnar
að gera og verður að koma að málinu
ef leysa eigi deiluna að sögn Karenar.
„ÉG tel að eina leiðin í þessu máli sé
sú að hreindýraráð og Umhverf-
isstofnun setjist niður og semji við
þessa bændur og nái niðurstöðu við
þá um málið,“ segir Guðni Ágústs-
son landbúnaðarráðherra þegar
hann er spurður um deilur bænda og
hreindýraveiðimanna í Austur-
Skaftafellssýslu. Þrír bændur á
svæðinu, þar af einn bóndi á rík-
isjörð, hafa ekki leyft hrein-
dýraveiðar á jörðum sínum. Fulltrúi
hreindýraráðs og Umhverfisstofn-
unar á Egilsstöðum hefur ítrekað
óskað eftir svörum landbún-
aðarráðherra vegna málsins.
„Bændurnir hafa sérstakar skoð-
anir á því hvernig eigi að fara um
þeirra lönd; þeim er ekki sama um
það að farið sé um þau á fjórhjólum
og jeppum, þeir vilja að umgengni sé
með ákveðnum hætti,“ útskýrir ráð-
herra. Því þurfi að semja við bænd-
urna og fara yfir málið með þeim.
Ekki eigi að taka bóndann á rík-
isjörðinni þar sérstaklega fyrir. „Að-
alatriðið er að láta á það reyna hvort
hægt sé að ná samkomulagi um
hvernig þessi auðlind er umgengin á
svæðinu.“
Inntur eftir því hvort hann muni
beita sér fyrir því að umræddir að-
ilar nái saman, segir Guðni að mál-
efni hreindýra heyri undir umhverf-
isráðuneytið. „Ég er þó tilbúinn til
þess að láta landbúnaðarráðuneytið
koma að málinu og hlusta á sjón-
armið umhverfisráðuneytisins og
bændanna.“
Farið verði yfir málið með bændunum
Illa gengur að veiða hreindýra-
kvótann í löndum Flateyja
HÆSTIRÉTTUR hefur staðfest úr-
skurð Héraðsdóms Reykjavíkur um
að tæplega þrítugur maður sæti
gæsluvarðhaldi til 11. ágúst vegna
gruns um að hann hafi átt aðild að
þjófnuðum.
Maðurinn var í maí dæmdur í
tveggja og hálfs árs fangelsi fyrir
fjölda þjófnaðarbrota, fölsun ávís-
ana, fjársvik og hylmingu en áfrýjaði
þeim dómi til Hæstaréttar og var í
kjölfarið látinn laus úr gæsluvarð-
haldi sem hann sætti þá.
Lögregla stöðvaði manninn í byrj-
un ágúst þar sem hann var á ferð í bíl
á Hringbraut í Reykjavík. Í bílnum
fannst þýfi sem lögregla lagði hald á
og einnig sá lögregla þegar maður-
inn lét detta tvo poka sem talið er að
innihéldu fíkniefni. Þá gaf maðurinn
upp rangt nafn.
Við yfirheyrslu neitaði maðurinn
að eiga aðild að brotum sem á hann
voru borin en fyrir dómi breytti hann
framburði og játaði sök án þess að
tjá sig nánar um málsatvik. Fram
kemur að meðan á málsmeðferð fyrir
héraðsdómi stóð sætti maðurinn
gæsluvarðhaldi. Eftir að áfrýjunar-
frestur var liðinn var ekki krafist
áframhaldandi varðhalds þar sem
bið yrði á að endanlegur dómur
Hæstaréttar lægi fyrir auk þess sem
maðurinn hafði margsinnis lýst því
yfir að hann hygðist fara í meðferð
og snúa lífi sínu til betri vegar.
Ætlaði að
snúa lífi
sínu til
betri vegar
TVEIR ferðamenn festu jeppa sína í
gljúpum árfarvegi skammt norður af
Vonarskarði í fyrrinótt en þangað
höfðu þeir villst af Gæsavatnaleið.
Mennirnir voru með NMT-síma og
gátu látið vita af sér með því að klífa
upp á hnjúk í nágrenninu þar sem
þeir komust í símasamband.
Lögreglunni á Húsavík barst til-
kynning um mennina um kl. 22:15 og
fimm tímum síðar óku björgunar-
sveitarmenn fram á þá. Ekkert am-
aði að mönnunum og jepparnir voru
taldir óskemmdir þótt eitthvað hafi
seytlað inn í annan þeirra.
Yfirlögregluþjónninn á Húsavík
vill brýna fyrir ferðamönnum að í
þeim miklu hitum, sem eru um þess-
ar mundir, eru þær ár varasamastar
sem alla jafna eru þurrar en fyllast af
vatni í leysingunum. Botninn í slík-
um ám og lækjum er iðulega hulinn
gljúpum sandi, sem verður að kvik-
syndi þegar vatnið tekur að streyma.
Festust
norður af
Vonarskarði
HÆSTIRÉTTUR hefur staðfest úr-
skurð Héraðsdóms Reykjavíkur um
að maður, sem réðst á leigubílstjóra á
Vesturgötu 27. júlí sl. og brá hnífi á
háls honum, sæti gæsluvarðhaldi til
15. september eða þar til dómur fell-
ur.
Fram kemur í úrskurði héraðs-
dóms að brot mannsins geti varðað
allt að 16 ára fangelsi en tilviljun þyk-
ir að afleiðingarnar skyldu ekki verða
alvarlegri en raun ber vitni. Árásar-
maðurinn ber fyrir sig algjört minn-
isleysi um atburði næturinnar en í úr-
skurði héraðsdóms kemur fram að
framburður tveggja manna, sem voru
með sakborningnum, og leigubílstjór-
ans sé mjög skýr um alla atvikalýs-
ingu. Lögreglan telur sterkan rök-
studdan grun um að maðurinn hafi
veitt bílstjóranum áverkann og hags-
munir almennings krefjist þess því að
hann sæti áfram gæsluvarðhaldi.
Úrskurður um
gæsluvarðhald
staðfestur
♦♦♦
♦♦♦