Litli Bergþór - 01.08.2015, Blaðsíða 3
Litli-Bergþór 3
Ritstjórnargrein
Samkvæmt fundargerðum sveitarstjórnar hafa reikningar sveitarfélagsins
verið samþykktir og niðurstaðan er góð, framkvæmdafé uppá 90 milljónir og
skuldahlutfall rétt um 70%. Það er full ástæða til að þakka fyrir þennan góða
rekstur og vona að svo haldist áfram.
Þegar litið er til þess að tekjur til framkvæmda gætu verið svipaðar á næstu árum,
væri gaman ef hægt yrði gera tímasetta framkvæmdaáætlun þar sem íbúar gætu
séð forgangsröðunina hjá sveitarstjórninni.
Hér eru nokkur atriði sem sveitarstjórn þarf að skoða og koma á áætlun.
Leikskólinn í Reykholti er kominn á tíma og þarf að byggja nýjan. Sundlaugin
í Reykholti er orðin lúin og þarf að laga eða byggja nýja. Aðstaða á skrifstofu
sveitarfélagsins er léleg og aðgengi óhæft fyrir fatlaða. Þá má minna á nauðsyn
byggingar hjúkrunarheimilis. Gaman væri ef hægt væri að leggja slitlag á
sem flestar götur bæði í þéttbýli og, ekki síður, á heimreiðar sveitabæja.
Allt þetta kostar auðvitað stórfé, en þegar litið er til þess, að í sveitarfélaginu
eru mest sóttu ferðamannastaðir landsins og þar af leiðir að það skapast miklar
tekjur af ferðamennskunni, sárnar manni hve lítið virðist sitja eftir í sveitinni
til hagsbóta fyrir íbúana. Ef gerður er samanburður við sveitarfélög sem njóta
fasteignagjalda af virkjunum, þar sem innkoma er stöðug og mikil í formi
fasteignagjalda og því sem ferðaþjónustan skilar hér, hlýtur að vakna sú krafa
að fá meira fé í kassann frá ferðaþjónustunni til uppbyggingar á samgöngum
og betri nettengingum.
Þarna verður ríkisvaldið að koma að, með skattlagningu eða öðrum
aðgerðum og hlutverk heimamanna er að þrýsta á að svo verði.
Ef ekkert verður að gert verður hlutverk heimamanna að horfa á túrhesta
spranga um holt og móa, gónandi á hveri og fossa og skiljandi í mesta lagi
eftir sig eitthvað smáræði í rotþrónum sem við eigum svo að sjá um að tæma
(og koma úrganginum fyrir) með ærnum kostnaði.
Tökum höndum saman og krefjumst réttláts skerfs af arði ferðaþjónustunnar til
framkvæmda í heimabyggð.
PS
Ekki benda á mig!
Ég geri mín stykki
heima.