Litli Bergþór - 01.08.2015, Blaðsíða 22
22 Litli-Bergþór
Fljótlega eftir áramót tilkynnti stjórn Límtrés
Vírnets að til stæði að byggja 2700 fermetra verk-
smiðjuhúsnæði við hlið núverandi verksmiðju fyr-
irtækisins á Flúðum. Þegar byggingu verksmiðjunnar
lýkur verður starfsemi fyrirtækisins í Reykholti flutt
þangað og húsnæðið í Reykholti selt. Nú starfa sex
manns við verksmiðjuna í Reykholti og gert er ráð
fyrir að sami fjöldi starfi í henni eftir að hún flyst á
Flúðir.
Eldgosi í Holuhrauni lauk í lok febrúar.
Umhverfisstofnun fékk styrki til framkvæmda við
göngustíga og stiga við Gullfoss frá Framkvæmdasjóði
ferðamannastaða. Vonandi stendur erfitt ástand á
svæðinu nú til bóta.
Leikdeild Ungmennafélags Gnúpverja frumsýndi
leikritið Heilsugæslan, eftir Lýð Árnason lækni í
Laugarási, 6. mars í félagsheimilinu Árnesi. Í leikritinu
var fjallað um heilbrigðisþjónustuna.
Frumkvöðladagurinn var haldinn 12. mars á
Café Mika. Þar var hugað að því hvernig hefja skal
atvinnurekstur og þróa, auk þess sem stoðkerfi
atvinnulífsins var kynnt, styrkjamál og þess háttar.
Sveitarstjórnin heimilaði Benjamín Inga Böðvars-
syni að koma upp bátaleigu með bátaskýli og bryggju
á Laugarvatni. Slík bátaleiga hefur ekki verið starfrækt
um árabil en var vinsæl á árum áður.
Á 93. héraðsþingi HSK á Flúðum var Kjartan
Lárusson Umf. Laugdæla sæmdur gullmerki
HSK. Þetta er í tólfta sinn sem félagsmanni innan
héraðssambandsins er veitt merkið.
Aðalfundur Umf. Bisk. var haldinn á Café Mika þ. 12.
mars. Á fundinum voru íþróttamaður og íþróttakona
félagsins útnefnd og voru það þau Gústaf Sæland og
Laufey Ósk Jónsdóttir sem urðu hlutskörpust fyrir
árangur þeirra í glímu.
Vetur heilsaði í byrjun desember 2014 með töluverðu
frosti og snjó, sem bleytti í inn á milli með slagviðri
og tilheyrandi hálku og leiðinda færð. Má segja að
það hafi verið forsmekkurinn að veðri vetrarins, sem
einkenndist af slíku leiðinda rysjóttu veðri, miklum
hitasveiflum, frosti, snjó, slagviðri og roki, oft á
sama sólarhringnum. Ekki var óalgengt að hitasveifla
dagsins væri frá plús 1-3°C niður í mínus 5-10°C.
Ekki var mikið um skafrenning af þessum sökum, en
svell hlóðst á vegi með tilheyrandi útafakstri rútubíla
og túrista. Þetta ástand varð til þess að Vegagerðin
setti fulla ruðningsþjónustu á vegi sveitarinnar. Fátt er
því svo með öllu illt. Hellisheiði og Þrengsli lokuðust
hvað eftir annað vegna ófærðar.
Vorið var kalt, vetur og sumar frusu saman með 8°
frosti og hélst næturfrost allt að mínus 5-10°C fram
í miðjan maí, þó hiti væri að deginum. Um miðjan
maí hlýnaði loks og rigndi annað slagið. Áfram var
þó napurt veður og gróðurlaust að mestu fram í júní,
enda næturhiti enn nálægt frostmarki. Lítill gróður var
á túnum fyrir lambfé og þurfti víða að gefa
fénu hey úti. Tré laufguðust ekki fyrr
en viku af júní, en eftir það fór að
hlýna og gréri hratt.
Samkvæmt tölum Hagstofunnar
fjölgaði íbúum í Bláskógabyggð um
3,2%, eða um 30 manns á síðasta ári.
Þetta er nokkuð yfir landsmeðaltali sem
var 1,1%. Alls búa nú í Bláskógabyggð
961, karlar eru 496 en konur eru 465.
Ekki aðeins eru karlarnir fleiri, heldur
hefur þeim fjölgað um 24 á meðan
konum fjölgaði einungis um sex. Tölur
um skiptingu íslenskra og erlendra
ríkisborgara eru byggðar á öðrum
reikningsaðferðum en um svipað leyti
eru íslenskir ríkisborgarar taldir vera um
820 en erlendir 130.
Nokkrir listamenn úr Bláskógabyggð voru á meðal
þeirra er hlutu listamannalaun á þessu ári. Hreiðar Ingi
Þorsteinsson fékk þriggja mánaða laun úr launasjóði
tónskálda og Elín Gunnlaugsdóttir sex mánaða laun
úr sama sjóði.
Æskulýðsnefnd Bláskógabyggðar efndi til hófs til
heiðurs íþróttafólki Bláskógabygðar í Aratungu þ. 11.
janúar og var Bjarni Bjarnason á Laugarvatni valinn
íþróttamaður ársins í Bláskógabyggð.
Ný líkamsræktaraðstaða var opnuð formlega
fimmtudaginn 5. febrúar eftir gagngerar breytingar
á aðstöðu sem áður hafði hýst banka og gufubað í
íþróttamiðstöðinni.
Hvað segirðu til?
Ég er nokkuð
laginn við að búa
til stelpur. Þetta er
allt spurning um rétt
mataræði!
Laufey Ósk Jónsdóttir og Gústaf Sæland.