Fregnir - 01.11.1995, Qupperneq 9

Almenningsbókasafn framtíðarinnar?
Á ráðstefnu í Danmörku nýverið setti Jesper Bo Jensen, Institut for
Fremtidsforskning í Kaupmannahöfn fram nokkrar athyglisverðar
hugmyndir um framtíðarhlutverk almenningsbókasafnanna.
Upplýsinga- og afþreyingarstórmarkaður
Bókasafnið er stórt, staðsett í verslunarmiðstöð og þar eru margir
samankomnir. Allir miðlar standa til boða, tónlist, bækur,
myndbönd, tölvugögn o.s.frv. Alls konar tilboð eru í gangi, eins
og í hinum verslununum og uppsetning öll eins og þar. Fólk fær
lánað, leigir, kaupir eða skiptir um upplýsingar og afþreyingu og
það er opið allan sólarhringinn. Mörkin milli opinberra gagna og
einkagagna hafa horfíð.
Upplýsingahraðbrautarslaufa
Aðalverkefnið er að leiðbeina notendum í upplýsingafrumskóg-
inum. Rafrænir miðlar eru allsráðandi. Flestir sem koma á
bókasafnið eru í þekkingarleit en ekki til þess að fá lánaðar bækur.
Einkageirinn sér um afþreyinguna en bókasafnið er í samkeppni við
einkavísindastofnanir um upplýsingamiðlun.
Vin í upplýsingasamfélaginu
Upplýsinga- og afþreyingarflóðið í samfélaginu verður til þess að
fólk leitar til bókasafna í leit að kyrrð og afslöppun. Bókasafnið
verður búið gömlum húsgögnum og bækurnar verða í leðurbandi
með gylltu letri. Bókasafnið er með listrænu yfirbragði, þar er
gallerí og leiksýningar eru í boði. Tilhneiging er til þess að snobba
og útiloka lægri stéttir samfélagsins.
Þorbjörg Karlsdóttir, Borgarbókasafni.
Fregnir 3-4/95 9