Morgunblaðið - 10.09.2002, Side 22

VIÐSKIPTI/ATHAFNALÍF
22 ÞRIÐJUDAGUR 10. SEPTEMBER 2002 MORGUNBLAÐIÐ
HRAÐFRYSTIHÚS Eskifjarðar hf.
keypti 40,1% hlutafjár í Tanga hf. á
föstudag, alls að nafnverði rúmar
353,7 milljónir króna. Félagið átti
engan hlut fyrir í Tanga.
Viðskipti með hlutabréf í Tanga í
Kauphöll Íslands sl. föstudag námu
738,3 milljónum króna að markaðs-
virði. Lokaverð bréfanna var 1,72
þann daginn en meðalverð viðskipta
dagsins var 2,06. Sé miðað við það var
alls skipt með 358,4 milljónir króna
nafnverðs.
Fjórir hafa tilkynnt Kauphöllinni
um sölu hlutafjár á föstudag og eiga
viðkomandi engan hlut í félaginu eftir
viðskiptin. Þetta eru Sjólaskip hf. og
mæðginin Marinella Haraldsdóttir,
Guðmundur Jónsson og Haraldur
Jónsson. Þeir Guðmundur og Harald-
ur eiga báðir sæti í stjórn Tanga hf.
og Sjólaskipa hf.
Guðmundur og Haraldur seldu
hvor um sig rúmar 50,2 milljónir að
nafnverði, eða 5,7%, á verðinu 2,08.
Söluverð hvors þeirra hefur því num-
ið 104,5 milljónum króna.
Sjólaskip seldu rúmar 25,3 milljón-
ir að nafnverði, eða 2,87%, á verðinu
2,08. Söluverðið nemur því tæpum
52,7 milljónum króna.
Marinella seldi tæpar 65 milljónir
króna að nafnverði, eða 7,37% hluta-
fjár, en gengi var ekki gefið upp. Sé
gert ráð fyrir sama gengi hefur sölu-
verðið numið rúmum 135 milljónum
króna. Alls var því tilkynnt um sölu
190,8 milljóna króna að nafnverði, eða
21,64% hlutafjár.
Tengdir aðilar eiga 15,4%
Þeir eigendur Tanga, samkvæmt
hluthafalista í lok júní, sem tengjast
framangreindum seljendum eru dán-
arbú Jóns Guðmundssonar útgerðar-
manns sem á 65 milljónir að nafnvirði
(7,37%) auk Ragnheiðar Jónsdóttur
og Berglindar Jónsdóttur sem hvor
um sig á 35,2 milljónir að nafnvirði
(3,99%).
Stærstu hluthafar fyrir kaupin
voru Vopnafjarðarhreppur með
21,34%, Skiphólmi með 9,07% og Pét-
ur Stefánsson ehf. með 7,46%. Þá er
hlutur Vátryggingafélags Íslands
skráður 3,14%.
Morgunblaðið náði ekki tali af Elf-
ari Aðalsteinssyni, forstjóra Hrað-
frystihúss Eskifjarðar, í gær en yf-
irlýsingar mun vera að vænta frá
félaginu í dag varðandi kaupin í
Tanga.
Í hálffimm-fréttum Búnaðarbank-
ans í gær segir að ekki liggi ljóst fyrir
hvort Hraðfrystihús Eskifjarðar
hyggur á frekari fjárfestingu í Tanga
með yfirtöku í huga.
„Rekstur þessara fyrirtækja fellur
vel saman enda er stærstur hluti
starfseminnar í veiðum og vinnslu á
uppsjávarfiski. Samanlögð aflahlut-
deild fyrirtækjanna í loðnu er um ríf-
lega 10%, ríflega 10% í norsk-íslensku
síldinni og ríflega 24% hlutdeild í kol-
munna. Samanlögð velta fyrirtækj-
anna á síðasta ári nam rúmum 5,8
mö.kr.“
Eykur áhuga á
Hraðfrystihúsi Eskifjarðar
„Ljóst er að margir hafa haft auga-
stað á Hraðfrystihúsi Eskifjarðar hf.
sem öflugu uppsjávarfyrirtæki inn í
hóp sameinaðra fyrirtækja og ættu
kaupin á Tanga að auka frekar á
þennan áhuga. Framlegð af rekstri
Hraðfrystihússins hefur verið góð eða
34% fyrir allt sl. ár og 36,5% á fyrri
hluta þessa árs. Stærstu hluthafar í
Hraðfrystihúsi Eskifjarðar eru
Hólmi ehf. með 37,5% hlut, Grandi
með 20,8% hlut, Tryggingamiðstöðin
með 7,4% og Skeljungur með 7,2%
hlut,“ segir í hálffimm-fréttum.
Lokaverð hlutabréfa í Tanga var
1,70 í gær, sem er lítilsháttar breyting
frá lokaverði föstudagsins, en alls
námu viðskipti gærdagsins 404 þús-
undum króna.
HRESK kaupir 40% í Tanga
VERKALÝÐSFÉLAGIÐ Vaka á
Siglufirði gaf í gær Þormóði ramma-
Sæbergi hf. lokafrest til kl. 16 þann
dag til að gera upp vangreidd laun
sjómanna á þeim rækjuskipum fyr-
irtækisins sem ísa aflann um borð. Í
fréttatilkynningu frá Vöku segir að
félagið hafi ítrekað krafist þess að
Þormóður rammi-Sæberg hf. gerði
upp við þessa sjómenn í samræmi við
gerðardóminn frá 30. júní 2001. „Hinn
11. júlí sl. féll félagsdómur sem tók af
allan vafa um það hvernig gera ætti
upp við þessa sjómenn. Þrátt fyrir að
Þormóður rammi–Sæberg hf. hafi
sent Verkalýðsfélaginu Vöku tilkynn-
ingu um að þau laun sem vangreidd
hafa verið yrðu greidd eftir 16. ágúst,
þá hefur fyrirtækið enn ekki staðið í
skilum,“ segir í tilkynningu Vöku.
Skýringin komin
Ólafur Marteinsson framkvæmda-
stjóri Þormóðs ramma-Sæbergs hf.
segist þegar hafa gefið Vöku skýr-
ingu á drættinum á greiðslunni og
þess vegna undrast hann að Vaka, eitt
verkalýðsfélaga á landinu eins og
hann orðar það, skuli fara fram með
slíku offorsi gegn þeim. „Það er beðið
eftir lögfræðiáliti frá Samtökum at-
vinnulífsins en málið snýst nú um það
að ef Alþýðusamband Íslands, ASÍ,
vinnur mál sitt gegn ríkinu sem höfð-
að var vegna lagasetningar á kjara-
deilu útgerðarmanna og sjómanna í
fyrra, þá verður félagsdómur ógildur
rétt eins og gerðadómurinn.“
Ólafur segir að lögfræðiálitið eigi
meðal annars að varpa betur ljósi á
það hvort greiðslurnar verði greiddar
með fyrirvara um niðurstöður ASÍ-
málsins eða með öðrum hætti.
Signý Jóhannesdóttir formaður
Vöku segist ekki telja skýringu Ólafs
fullnægjandi. „Ég gef ekkert fyrir
þetta lögfræðiálit sem þeir eru að
bíða eftir og ég get ekki skilið að
nokkur lögfræðingur geti sagt þeim
að þeir megi brjóta lög. Félagsdómur
er endanlegur. Honum verður ekki
áfrýjað og mönnum ber að fara eftir
honum,“ sagði Signý í samtali við
Morgunblaðið.
Verkalýðsfélag setti
Þormóði ramma-Sæ-
bergi hf. úrslitakosti
AUK þess að fjármagna tilboð auð-
kýfingsins Philips Green í Arcadia,
mun einn af stærstu bönkum Bret-
lands, HBOS, eiga 8% hlut í fyrirtæk-
inu ef tilboðinu verður tekið. Tals-
maður bankans segir á fréttavef
Times að HBOS verði óvirkur hlut-
hafi og muni styðja Philip Green.
Í sömu frétt er haft eftir Philip
Green að engin illindi séu á milli hans
sjálfs og Baugsmanna. Í samtali við
Morgunblaðið tekur Jón Ásgeir undir
það og segir samkomulagið við Green
gott um þessar mundir.
Í nýjasta Sunday Times er hins
vegar lífleg frásögn af samskiptum
þeirra Philips Green og Jóns Ásgeirs
Jóhannessonar í aðdraganda þess að
stjórn Arcadia samþykkti tilboð
Green í félagið.
„Hann er með axlasítt hár og höku-
topp, klæðist alltaf svörtu og dvelur á
tískuhótelinu Sanderson. Af þessum
ástæðum er ekki að undra að hann
hafi ekki getað sannfært banka um að
fjármagna 700 milljóna punda yfir-
töku.“ Þannig er Jóni Ásgeiri Jó-
hannessyni, stjórnarformanni Baugs,
lýst í blaðinu og er vísað til þess þegar
Baugur gerði tilboð í Arcadia upp á
eigin spýtur um áramótin.
Þetta varð til þess að Jón Ásgeir
bað Green um aðstoð. Og Green rifjar
upp: „Það var búið að fara illa með þá
og ég bauðst til að leggja fram fé, en
það var of seint.“ Viðræðum Baugs og
Arcadia var slitið í febrúar sl. en bæði
Green og Baugur höfðu áfram áhuga.
Sunday Times greinir svo frá að
Baugsmenn hafi haldið áfram að
þræða banka í London í vor og á sama
tíma hafi Green látið í veðri vaka við
Stuart Rose, forstjóra Arcadia, að
hann myndi vilja kaupa fyrirtækið, en
Rose og Green hittust m.a. í fimm-
tugsafmæli Green þar sem Tom Jon-
es skemmti gestum!
Green var ekki skemmt
Í byrjun ágúst hittust Green og
Jón Ásgeir og gerðu uppkast að
samningi um að skipta Arcadia á milli
sín og fjármögnun frá HBOS var
tryggð. Baugur átti að fá að kaupa
Miss Selfridge, Top Shop og Top
Man, þ.e. merkin sem höfða til yngri
fatakaupenda, fyrir 250 milljónir
punda.
Sett var fram óformlegt tilboð upp
á 365 pens á hlut 19. ágúst en Green
var gert ljóst að hann þyrfti að bjóða
betur. Við tók erfið vika þar sem
Green, Baugsmenn, ráðgjafar og
bankamenn funduðu stíft til að
tryggja fjármögnun nýs tilboðs.
Greint er frá að miðvikudaginn 28.
ágúst hafi Green tekið eftir því að Jón
Ásgeir virtist úr jafnvægi og hvarf af
og til úr fundarherberginu til að
hringja í höfuðstöðvarnar. En Jón
Ásgeir hafi þvertekið fyrir að nokkuð
væri að.
Að kvöldi sama dags var tilboðið
upp á 408 pens lagt fram. Daginn eftir
bárust Green fréttir af því að lögregla
hefði gert húsleit hjá Baugi sama
kvöld og tilboðið var lagt fram. Hon-
um var ekki skemmt. Hann vissi að
hvort sem um eitthvað saknæmt væri
að ræða eða ekki, væri orðspor hans
sjálfs í hættu.
Þetta fimmtudagskvöld var hald-
inn neyðarfundur í húsakynnum
BHS, verslun Green, við Oxford-
stræti. Fundurinn fór fram á hálf-
rökkvuðu lokuðu kaffihúsi. Til að
byrja með voru þar Green og ráðgjaf-
ar hans, þ. á m. Bob Wigley hjá Merr-
ill Lynch sem hafði ráðlagt Green við
tilboðið í Woolworths keðjuna sl. vor.
Þegar Íslendingarnir komu að
glerhurðinni við aðalinnganginn
mættu þeir ísköldu augnaráði Green
sem að lokum gaf lífverði sínum
merki um að hleypa þeim inn, eins og
einn fundarmanna lýsir aðstæðum
fyrir Sunday Times. Green er sagður
hafa verið afar reiður og ásakað Ís-
lendingana um lygar og undirferli.
Fundinum lauk snögglega en var
haldið áfram á hótelherbergi Green
síðar um kvöldið. Þá tóku Íslending-
arnir lögfræðing með sér, og ekki að
undra, segir Sunday Times.
Lögfræðingurinn reyndi að full-
vissa Green og hans menn um að ekk-
ert væri að og Baugur hefði komið
hreint fram. Komið var fram á nótt og
föstudagsblöðin komin. Green veifaði
fyrirsögnum sem ekki studdu mál-
stað Baugsmanna, heldur sögðu
þvert á móti að lögreglurannsóknin
setti yfirtökutilboðið í Arcadia í
hættu. Íslendingarnir yfirgáfu þá
fundinn.
Hugmynd um að stofna tvö fyrirtæki
Á föstudagsmorguninn gaf Arcadia
út yfirlýsingu þess efnis að stjórnin
myndi ekki íhuga neinn samning sem
gengi út á að selja hluta verslananna
til Íslendinganna. 20% eignarhlutur
Baugs í Arcadia var orðið vandamál
fyrir Green. Samninga við Baug
þurfti að bera undir aðra hluthafa til
að fá álit þeirra á hvort Baugur fengi
einhvers konar forgangsmeðferð.
Baugur vildi ekki ennþá framselja
hlutabréf sín til Green nema hann lof-
aði að selja Baugi vissar verslanir.
Um mánaðamótin fékk Green þá
hugmynd að stofna tvö fyrirtæki
vegna yfirtökunnar og bjóða Baugi að
kaupa annað þeirra með öllum merkj-
unum sem Baugur vildi. Baugur og
Merrill Lynch fengu að heyra af þess-
ari áætlun og lögfræðingar byrjuðu
að búa til samninga þessa efnis. „Vík-
ingarnir (Baugur) sögðu svo að þeir
gætu ekki fjármagnað kaupin á þeim
merkjum sem þeir vildu og þeir yrðu
að fá lán hjá mér,“ er haft eftir Green
í Sunday Times.
Síðastliðinn miðvikudag komst
Green að þeirri niðurstöðu að það
væri ómögulegt að semja við Íslend-
ingana á þann hátt að hagsmunir
hans sjálfs væru tryggðir og hann
væri ekki að veita Baugi forgang.
Hann setti fram úrslitakosti eins og
áður hefur verið lýst, Baugur myndi
selja hlutabréfin eða ekkert yrði af
samningum. Á miðvikudagssíðdegi
samþykktu Baugsmenn svo að selja
sinn hlut en fengu engin loforð um að
geta keypt verslanir í framtíðinni.
„Ég sagði Jóni að hann væri hepp-
inn. Hann tapaði slagnum en hagn-
aðist um 75 milljónir punda á hluta-
bréfunum... Hann fær tíu af tíu
mögulegum fyrir þrautseigju – en tvo
af tíu mögulegum fyrir tækni,“ hefur
Sunday Times eftir Green að lokum.
Litríkur og skapmikill
Jón Ásgeir Jóhannesson, stjórnar-
formaður Baugs, segir frásögn
Sunday Times af atburðarásinni dá-
lítið ýkta. „Philip Green er vissulega
litríkur persónuleiki og skapmikill.
En þarna er aðeins fært í stílinn hvað
viðbrögð hans varðar, en ég var þó
ekki alltaf til staðar,“ segir Jón Ás-
geir. „Þetta er þó fjörugasta samn-
ingalota sem ég hef lent í hingað til.“
Jón Ásgeir segir Green vilja hafa
alla þræði í hendi sér og sem dæmi
um það er að þegar vinna við Arcadia-
tilboðið stóð sem hæst, vildi hann
einnig stýra innkaupum hjá BHS.
„Hann er mjög vel tengdur í við-
skiptalífinu í London. Hann safnaði
öllum saman á skrifstofuna sína og
bankastjórarnir biðu t.d. frammi á
gangi.“
Jón Ásgeir segir varðandi frásögn
af hugmynd Greens um tvö fyrirtæki
og því að Baugur hafi ekki getað fjár-
magnað sinn hluta, að þar sem verið
var að tala um fyrirframfjármögnun,
hefði Baugur ekki haft neitt í hönd-
unum til að fjármagna út á. Þess
vegna hefði Green þurft að fjármagna
yfirtökutilboðið, skipta fyrirtækinu
svo upp og þá hefði Baugur getað
fjármagnað sinn hluta.
Baugur mun áfram hafa sérleyfi
(franchise) fyrir Top Shop og Miss
Selfridge á Íslandi og segir Jón Ás-
geir að það muni ekki breytast. „Ef
eitthvað er, gefur þetta meiri tæki-
færi til framtíðar. Green veit hver lét
hann fá lykilinn að Arcadia og hann
mun meta það. Við komum með hug-
myndina inn á borð til hans og allar
upplýsingar á sínum tíma.“
Sunday Times með líflega frásögn af samskiptum Philips Green og forsvarsmanna Baugs
Annar litríkur,
hinn þrautseigur
Mikið hefur gengið á
í samskiptum Philips
Green og forsvars-
manna Baugs undan-
farna daga. Steingerður
Ólafsdóttir las Sunday
Times og heyrði í Jóni
Ásgeiri Jóhannessyni.
Morgunblaðið/Sverrir
Top Shop og Top Man voru tvær af þeim verslunarkeðjum sem Baugur
hafði augastað á í samningaviðræðunum við Philip Green.
steingerdur@mbl.is