Morgunblaðið - 31.12.2003, Blaðsíða 24

24 B MIÐVIKUDAGUR 31. DESEMBER 2003 MORGUNBLAÐIÐ
FRAMKVÆMDIR við Kárahnjúkavirkjun, sem nefnd hefur
verið mesta framkvæmd Íslandssögunnar, hófust á árinu.
Í mars var byrjað að sprengja bergstál úr brún árgljúfurs
Jöklu við Kárahnúka. Tilgangurinn var að gera veg niður
að væntanlegum hjárennslisgöngum við stíflustæðið
sem verktakafyrirtækið Arnarfell tók að sér að sprengja
sem undirverktaki ítalska verktakafyrirtækisins Imp-
regilo.
Morgunblaðið/RAX
Stóra bomban við Kárahnjúka
Fréttamyndir af
innlendum vettvangi
ÞRÍTUGUR maður beið bana þegar stór flutningabifreið sem hann ók steyptist
fram af Borgarfjarðarbrúnni og lenti í sjónum í ágúst. Bíllinn var á suðurleið með
áburðarfarm. Talið er að ökumaðurinn hafi misst vald á bifreiðinni þegar hjólbarði
sprakk en hún rauf brúarhandriðið á 25 metra kafla og steyptist fram af brúnni.
Fjölmennt lið lögreglu, sjúkraliðs, björgunarsveita og kafara var kallað út en mað-
urinn var látinn þegar kafarar komust að stýrishúsinu.
Morgunblaðið/Júlíus
Steyptist fram af Borgarfjarðarbrú
KIRKJUGARÐUR frá árdögum
kristni á Íslandi kom í ljós við forn-
leifauppgröft í landi jarðarinnar
Keldudals í Hegranesi í Skagafirði.
Bóndinn á bænum fékk mannabein í
skófluna þegar hann tók grunn fyrir
nýju íbúðarhúsi. Fornleifafræðingar
hafa unnið við að hreinsa ofan af
kirkjugarðinum sem sagður er
óvenju heillegur. Hringlaga garður
umlykur hann. Þar höfðu í ágúst
fundist 52 grafir og höfðu beinin
varðveist mjög vel, miðað við að
jarðsett var fyrir árið 1104 en
gjóskulag úr Heklugosi það ár lá yfir
öllum garðinum.
Morgunblaðið/Kristinn
Grafir frá árdögum kristni
ÞRÍR bátar fóru til hrefnuveiða í ágúst
samkvæmt rannsóknaáætlun Haf-
rannsóknastofnunar. Njörður KÓ
veiddi fyrstu hrefnuna sólarhring síðar,
eftir að erlendir fjölmiðlamenn sem
höfðu fylgt bátnum eftir sneru til
lands. Fyrsta hrefnan var lítið karldýr
og gekk aflífun þess vel, samkvæmt
upplýsingum Hafrannsóknastofnunar.
Dýrið var skorið úti á sjó á leiðinni til
hafnar í Ólafsvík þar sem kjötinu var
landað og afhent til sölu í verslunum
Hagkaupa. Til stóð að veiða 38 hrefn-
ur en tvö dýr vantaði upp á að kvótinn
næðist þegar veiðitímanum lauk í
septemberlok.
Morgunblaðið/Alfons Finsson
Fyrsta hrefnan skorin
FORYSTUMENN stjórnmálaflokk-
anna biðu eins og margir aðrir
spenntir eftir fyrstu tölum að kvöldi
kjördags í maí en þá var kosið til Al-
þingis. Niðurstaðan varð sú að rík-
isstjórnarflokkarnir héldu meirihluta
sínum á þingi þótt Sjálfstæðisflokk-
urinn missti nokkurt fylgi og þrjú
þingsæti. Framsóknarflokkurinn hélt
óbreyttum fjölda þingmanna. Sam-
fylkingin bætti við sig þremur mönn-
um, Frjálslyndi flokkurinn tveimur og
Vinstrihreyfingin – grænt framboð
tapaði einu þingsæti. Sjálfstæð-
isflokkur og Framsóknarflokkur end-
urnýjuðu fljótlega eftir kosningar
samstarf sitt um stjórn landsmála,
með ýmsum breytingum. Þannig
tekur Halldór Ásgrímsson við for-
sætisráðuneytinu af Davíð Oddssyni
næsta haust.
Morgunblaðið/Golli
Sviptingar í stjórnmálum
ÞÚSUNDIR manna lögðu á sig
ferðalög eða vökur eða að vakna
óvenju snemma nótt eina í lok
maí til þess að sjá óvenjulegan
sólmyrkva. Var þetta svokallaður
hringmyrkvi þar sem tunglið fór
allt inn fyrir sólkringluna en náði
ekki að hylja hana alveg. Hring-
myrkvinn sýndi sig best á Norður-
landi og Vestfjörðum. Hundruð
manna nutu hans þar þessar ör-
fáu mínútur sem það tók skugg-
ann að fara yfir en skýjafar kom í
veg fyrir að þúsundir gætu séð
náttúrufyrirbærið.
Morgunblaðið/Rax
Hringmyrkvi
á sólu