Fréttablaðið - 02.03.2004, Blaðsíða 10
10 2. mars 2004 ÞRIÐJUDAGUR
TARZAN OG BOMBI
Stjórnendur dýragarðs í Búdapest í Ung-
verjalandi brugðu á það ráð að venja
munaðarlausan ljónsungann Bomba undir
flækingshundinn Tarzan. Bombi fæddist
fyrir sex vikum en aðrir ungar úr sama goti
lifðu ekki. Tarzan tekur hlutverk sitt alvar-
lega og dafnar ljónsunginn prýðilega.
Baráttan á markaði hestatímarita:
Lögbannsblaðið komið út
DÓMSMÁL Stóðhestablað tímarits-
ins Hestar er nú komið út og í
dreifingu eftir að sýslumaðurinn í
Reykjavík hafði hafnað lögbanns-
kröfu á útgáfu þess. Var sú krafa
lögð fram af Eiðfaxa ehf. og
Hrossaræktarsambandi Suður-
lands á grundvelli þess að útgáfan
bryti að óbreyttu gegn höfundar-
rétti Eiðfaxa og HRS, sem um ára-
bil hafa gefið út stóðhestablaðið
Stóðhestar. Þá fælist í henni brot
gegn grein samkeppnislaga um
óréttmæta viðskiptahætti.
Þessari kröfu var hafnað og
segir í úrskurði sýslumanns: „Í
máli því sem hér um ræðir þykir
gerðarbeiðandi ekki hafa sannað
eða gert sennilegt að hönnun, upp-
setning og framsetning á auglýs-
ingu í tímariti því sem hann gefur
út árlega til m.a. að auglýsa stóð-
hesta feli í sér sjálfstætt hugverk
sem njóti verndar höfundarlaga
nr. 73/1972. Því er ekki unnt að
fallast á það að fyrirhuguð útgáfa
gerðarþola á nýju stóðhestablaði
og auglýsingar á stóðhestum í því
blaði feli í sér brot á lögverðum
rétti hans, þó fallast megi á það að
auglýsingarnar séu líkar“.
Stóðhestablaðið umdeilda nú
komið í dreifingu, en það er
ókeypis á bensínstöðvum á
höfuðborgarsvæðinu og víða um
land. ■
Vandamál vegna offjölgunar:
Rætt um að fækka kóalabjörnum
ÁSTRALÍA, AP Náttúruverndarmenn
krefjast þess að fjöldi kóala-
bjarna á Kengúrúeyju verði drep-
inn til að sporna við offjölgun en
yfirvöld í Ástralíu neita að grípa
til slíkra aðgerða af ótta við að
skaða ferðaþjónustuna.
Hátt í 30.000 kóalabirnir eru á
eynni en aðalfæða þeirra, lauf
júkaliptustrjánna, er nær upp-
urin. Náttúruverndarmenn segja
að nauðsynlegt sé að fækka kóala-
björnunum til að bjarga trjánum
og stuðla að fjölbreyttu lífríki á
eynni. Þegar hefur verið reynt að
gelda dýr og flytja þau af eynni en
þær aðgerðir hafa ekki borið til-
skilinn árangur. ■
Ný raforkulög leiða
ekki til hækkunar
Þorkell Helgason orkumálastjóri segir ekki rétt að raforkuverð hækki verulega við ný raforku-
lög. Útreikningar Orkustofnunar benda til mjög lítillar eða engrar hreyfingar í þá átt.
RAFORKUMÁL Orkustofnun telur að
miðað við þær forsendur sem
liggja fyrir sé engin ástæða til
þess að ætla að raforkuverð á suð-
vesturhorninu hækki um tugi pró-
senta við gildis-
töku nýrra raf-
orkulaga. Þetta
mat gengur þvert
á yfirlýsingar
forsvarsmanna
orkuveitna í
Reykjavík og á
S u ð u r n e s j u m ,
sem hafa haldið
því fram að nýju
lögin hafi í för
með sér allt að
fimmtungs hækk-
un á raforkuverði.
Í mati Orkustofnunar á kostn-
aði við flutning og dreifingu raf-
magns segir að þar sem arðsemi
af orkudreifingu sé víðast hvar
mjög lág, og sums staðar nei-
kvæð, þýði það í raun að önnur
starfsemi veitnanna niðurgreiði
þennan lið. En breyting á raforku-
lögum, sem felur í sér ríkara eft-
irlit með sérleyfisstarfsemi orku-
fyrirtækjanna, ætti ekki að hafa í
för með sér aukinn kostnað. Gerð
verður sú krafa að samkeppnis-
rekstur sé ekki niðurgreiddur
með hagnaði af sérleyfisstarf-
seminni.
„Ég tel óeðlilegt að miða
samanburð á núverandi og nýju
fyrirkomulagi við taprekstur nú
og arðbæran rekstur í framtíð-
inni, heldur beri að miða við sömu
arðsemiskröfu fyrir og eftir
breytinguna til að rugla ekki sam-
anburðinn,“ segir Þorkell Helga-
son orkumálastjóri, forstjóri
Orkustofnunar.
Hann bendir á að þótt nýju lög-
in eigi að koma í veg fyrir að sam-
keppnisrekstur sé niðurgreiddur
með einokunarrekstri sé ekkert
sem banni tilfærslu í hina áttina.
Vilji orkufyrirtækin nú hætta
slíkum millifærslum og auka arð-
semi dreifingarinnar hljóti það að
koma fram í bættri heildar-
afkomu þeirra; féð hverfi ekki.
Ekki megi kenna nýjum raforku-
lögum um þá hækkun sem af
þessu kunni að leiða.
Niðurstöður Orkustofnunar
gefa til kynna að ný lög hafi í för
með sér tveggja og hálfs prósents
hækkun á rafmagni hjá Hitaveitu
Suðurnesja, eins og hálfs prósents
hækkun hjá Orkubúi Vestfjarða og
álíka hjá Norðurorku, eins pró-
sents hækkun hjá Orkuveitu
Reykjavíkur en eins og hálfs pró-
sent lækkun á verði frá Rarik.
„Hér er ekki tekið tillit til opin-
berrar niðurgreiðslu á dreifingu í
dreifbýli sem nítján manna nefnd
hefur gert tillögu um,“ segir Þor-
kell. Að henni meðreiknaðri lækk-
ar meðalverð hjá Orkubúinu um
tvö og hálft prósent og um heil
fimm prósent hjá Rarik.
Í þessum forsendum er gert
ráð fyrir að mannvirki í flutningi
og dreifingu séu metin á bók-
færðu verði. Nítján manna nefnd-
in leggur til að skipuð verði sér-
stök samninganefnd eigenda
fyrirtækjanna þar sem samið
verði um hvaða verð skuli notast
við í matinu. Þetta segir Þorkell
að sé pólitískt úrlausnarefni og
ekki sé hægt að fullyrða um niður-
stöðu slíkra samningaviðræðna,
en þær kunna að breyta ofan-
greindum niðurstöðum eitthvað.
thkjart@frettabladid.is
Reiðir sjúklingar:
Læknar fá
lífverði
PEKING Sjúkrahús í Kína hefur
ráðið lífverði fyrir lækna sína
vegna ítrekaðra árása og lífláts-
hótana frá reiðum sjúklingum.
Sex lífverðir fylgja læknum
til og frá vinnu og standa vörð
þegar þeir sinna störfum sínum
á Sichuan Huaxi-háskólasjúkra-
húsinu.
Samkvæmt dagblaðinu Yang-
cheng Evening News hafa lækn-
unum borist hótanir frá sjúk-
lingum og aðstandendum sem
eru óánægðir með árangurinn af
þeirri meðferð sem þeir hafa
fengið á sjúkrahúsinu. Ráðist
hefur verið á sjö lækna. ■
STRÁKLINGAR HANDTEKNIR Ísrael-
ar handtóku þrjá pilta á aldrinum
tólf til fimmtán ára. Drengirnir
voru vopnum búnir og ætluðu sér
að gera sjálfsmorðsárásir á Ísraela.
Foreldrar þeirra voru ævareiðir að
hópar vígamanna skyldu nota svo
unga drengi í aðgerðum sínum.
STÖÐVAR FRAMKVÆMDIR Hæsti-
réttur Ísraels fyrirskipaði að bygg-
ing veggsins umdeilda utan um
átta þorp Palestínumanna norðvest-
ur af Jerúsalem yrði stöðvuð um
vikutíma meðan herinn endurskoð-
ar legu múrsins. Tveir íbúar féllu
fyrir kúlum ísraelskra hermanna í
síðustu viku þegar þeir mótmæltu
byggingunni.
MÓTMÆLIR AÐGERÐALEYSI Ghass-
an Shakaa, borgarstjóri í Nablus og
samherji Yassers Arafat til margra
ára, sagði af sér sem borgarstjóri.
Það gerði hann til að mótmæla því
að ekki hefði verið gert nóg til að
berja niður starfsemi vígamanna.
Íslamskir vígamenn:
Drápu 48
þorpsbúa
í Nígeríu
NÍGERÍA, AP Vopnaðir menn gerðu
árás á þorp í Nígeríu og drápu
að minnsta kosti 48 manns.
Flestir voru myrtir þegar þeir
reyndu að leita skjóls í kirkju.
Talið er að árásarmennirnir
hafi verið vígamenn úr röðum
múslima en flestir íbúar þorps-
ins Yelwa, þar sem atburðirnir
áttu sér stað, eru kristnir. Her
og lögregla komu á vettvang eft-
ir árásina og stilltu til friðar.
Mikil spenna hefur verið í
samskiptum kristinna manna og
múslima í miðhluta Nígeríu und-
anfarin ár.
Hundruð manna hafa fallið
þegar vígamenn úr röðum
beggja hópa hafa gert árásir á
afskekkt þorp og bæi. ■
STÓÐHESTABLAÐ
Sýslumaður hafnaði lögbannskröfu.
■ Mið-Austurlönd
Saddam Hussein:
Frelsun
mistókst
ÍRAK Tilraun var gerð til að frelsa
Saddam Hussein, fyrrum forseta
Íraks, þegar hann var fluttur í for-
setahöllina í Bagdad til yfirheyrslu.
Saddam var fluttur í forsetahöll-
ina þegar bandarískir sérfræðingar
komu til að yfirheyra hann. Sádi-
arabíska dagblaðið Alriyadh hefur
eftir íröskum túlki sem starfar fyrir
hernámsliðið að átján vopnaðir
menn hafi ruðst inn í höllina og reynt
að frelsa Saddam. Öryggisverðir
hallarinnar stöðvuðu þá og skutu þá
til bana í skotbardaga sem braust út
í kjölfarið. ■
KÓALABIRNIR
Mikill fjöldi ferðamanna kemur til Kengúru-
eyju á ári hverju til að virða fyrir sér kóala-
birni í þeirra náttúrulegu heimkynnum.
ÞORKELL
HELGASON
Sér ekki rök fyrir
verðhækkun á
orku.