Fréttablaðið - 21.07.2004, Blaðsíða 10

10 21. júlí 2004 MIÐVIKUDAGUR
ÞÝSKRA
ANDSPYRNUMANNA MINNST
Gerhard Schröder, kanslari Þýskalands, tók
þátt í minningarathöfn um Claus Graf
Schenk von Stauffenberg og aðra Þjóð-
verja sem stóðu að tilræði við Adolf Hitler
fyrir sextíu árum síðan. Hann hvatti landa
sína til að muna eftir fórnum þeirra sem
hefðu boðið nasistum birginn.
Þjónustumiðstöð við Kárahnjúka:
Fólk kemst í hús og á salerni
KÁRAHNJÚKAR Eftir eina til tvær
vikur opnar Landsvirkjun nýja
þjónustumiðstöð fyrir ferðafólk við
Kárahnjúkastíflustæðið. Fram til
þessa hefur ekki verið aðstaða fyrir
hendi á svæðinu þar sem fólk getur
matast og komist á salerni. „Þetta
er aðallega gert vegna þess hversu
margar rútur koma þarna. Fólk
kemst þá í hús og á salerni,“ segir
Sigurður Arnalds, kynningarfull-
trúi Kárahnjúkavirkjunar. Hann
segir umsýslu og rekstur þjónustu-
miðstöðvarinnar verða á höndum
veitingamannsins sem rekur mötu-
neyti Landsvirkjunar á staðnum.
„Þarna verður því boðið upp á
kaffisölu og einhverjar veitingar.
Þetta er hugsað sem þjónustumið-
stöð við almenna ferðamenn þannig
að þeir þurfi ekki að fara inn á
sjálft vinnubúðasvæðið.“ Sigurður
segir ekki fyrirhugað að vera þarna
með bensínsölu, en þau mál kunni
þó að verða endurskoðuð þegar
fram í sækir.
Landsvirkjun hyggur þó ekki á
frekari þjónustu við ferðafólk við
stíflustæðin þegar fram í sækir.
„En þarna eru sóknarfæri fyrir
heimafólk. Þarna er hægt að sam-
eina svo margt, bæði bjóða fólki að
skoða þessi merkilegu mannvirki
og svo hluti í náttúrunni, svo sem
fossa, ferðir á Snæfell og fleira,“
segir Sigurður. ■
Synjunin stendur eftir
Þriggja mánaða sleitulausum umræðum um fjölmiðlamálið á Alþingi og í samfélaginu er lokið.
Eftir stendur hin umdeilda tímamótaákvörðun forseta Íslands um að synja lögunum
staðfestingar. Ljóst er að ráðist verður í endurskoðun stjórnarskrárinnar í kjölfarið.
Fjölmiðlamálið svokallaða hefur nú
tekið enda eftir þriggja mánaða
sleitulausar umræður og deilur
jafnt á Alþingi sem í samfélaginu.
Umræður um málið á Alþingi voru
hinar næstlengstu frá upphafi, en
alls töluðu þingmenn í þrjá og
hálfan sólarhring.
Töluvert reyndi á stjórnarsam-
starfið í meðferð málsins því ekki
var einhugur meðal þingmanna
Framsóknarflokksins um afgreiðslu
þess. Greiddi einn þingmaður
Framsóknarflokksins atkvæði gegn
frumvarpinu og annar sat hjá við
atkvæðagreiðslu um lögin. Sú skýr-
ing var gefin að ekki væri tryggt að
lögin stæðust stjórnarskrá.
Ljóst er að málið hefur markað
tímamót í sögu lýðveldisins því í
fyrsta sinn í sögunni beitti forseti
Íslands umdeildum málskotsrétti og
synjaði lögum staðfestingar. Í kjöl-
farið spunnust miklar umræður um
málskotsrétt forseta sem og önnur
ákvæði stjórnarskrárinnar.
Nauðsynlegt var að setja lög um
þjóðaratkvæðagreiðslu, ætti hún að
geta farið fram. Stjórnarflokkarnir
náðu þó ekki að komast að niður-
stöðu um hvort og hvaða skilyrði
mætti setja um þátttöku í lögin.
Uppi voru vangaveltur um hversu
tryggt stjórnarsamstarfið væri þótt
formenn stjórnarflokkanna tækju
fyrir það. Þegar ljóst var að ekki
næðist sátt um skilyrði um þjóðar-
atkvæðagreiðslu tilkynnti ríkis-
stjórnin um „óvenju snjalla lausn“.
Fyrra frumvarpið yrði dregið til
baka og þjóðaratkvæðagreiðslu því
afstýrt. Fram yrði lagt nýtt, breytt
frumvarp sem afgreiða ætti á sum-
arþingi í stað laga um þjóðar-
atkvæðagreiðslu.
Upp hófust enn á ný miklar og
háværar umræður um ákvörðun
ríkisstjórnarinnar. Í þetta sinn sner-
ust þær um það hvort ákvörðunin
stæðist ákvæði stjórnarskrárinnar.
Fjölmargir lögspekingar létu í ljós
skoðun sína og var deilt opinberlega
um málið.
Þegar ljóst var að lagaprófessor-
ar og fleiri lögfróðir menn töldu það
víst að það stæðist ekki stjórnars-
krána að draga til baka lög sem for-
seti hefur synjað staðfestingar um
leið og leggja fram nýtt frumvarp
lítið breytt tók að myndast gjá milli
stjórnarflokkanna. Framsóknar-
menn urðu æ ósáttari við málið og
fór svo að lokum að sátt náðist milli
ríkisstjórnarflokkanna um að eina
lausnin í málinu væri að afturkalla
lögin og hætta algjörlega við að
setja lög um fjölmiðla. Að sinni. ■
Félag húsbílaeigenda:
Í stóru
ferðinni
FERÐALÖG Rúmlega 70 húsbílar eru
nú í ferð Félags húsbílaeigenda
um Strandir og Dalina. Ferðin
hófst á föstudag og lýkur næsta
laugardagskvöld með lokahófi í
félagsheimilinu í Búðardal.
Erna Margrét Kristjánsdóttir,
formaður Félags húsbílaeigenda,
segir að húsbílarnir keyri í hala-
rófu sem sé tilkomumikil sjón.
„Það er enginn vandi að mæta
okkur eða halda áfram för því við
fylgjumst grannt með að það sé
hleypt fram úr og vikið fyrir
bílum.“ Erna segir að til þess séu
notaðar VHF-stöð og CB-rás auk
þess sem ferðanefndin og stjórn
hafi litlar talstöðvar svo bílarnir
séu í sambandi sín á milli. ■
30 ára fangelsi:
Kona myrti
son sinn
ÍTALÍA, AP Ítölsk kona hefur verið
dæmd til 30 ára fangelsisvistar
fyrir að myrða son sinn.
Samuele Lorenzi var þriggja ára
þegar hann var myrtur í janúar
2002. Hann lést eftir að hafa vera
barinn ítrekað í hausinn með þungu
áhaldi. Móðir hans neitaði sök en
dómara þótti sök hennar sönnuð og
dæmdi hana til þyngstu refsingar.
Réttarhöldin tóku ekki nema
einn dag. Dómari varð við ósk
verjenda um flýtimeðferð við rétt-
arhöldin. Við slíka meðferð taka
réttarhöld einn til tvo daga í stað
margra mánaða eða ára. ■
FÉLAG HÚSBÍLAEIGENDA
Tók bensín á Hólmavík á sunnudag á leið
sinni í Norðurfjörð. Nokkur hundruð metra
biðröð lá út úr bænum. Hópurinn er í
sinni árlegu stóru ferð. Rúmlega 70 bílar
eru í ferðinni og er yngsti farþeginn 19
mánaða en sá elsti 87 ára.
STÍFLUSTÆÐI HÆSTU STÍFLUNNAR ER VIÐ FREMRI-KÁRAHNJÚK
Fjöldi fólks leggur leið sína upp að Kárahnjúkum til að skoða framkvæmdir eða landið sem
fer undir lón. Að stæðinu liggur nú malbikaður vegur og ekki nema skottúr frá Egilsstöðum.
FERILL MÁLSINS
19. desember 2003
Fjölmiðlanefndin skipuð.
2. apríl 2004
Fjölmiðlanefndin lýkur við
skýrslu.
20. apríl
Skýrslan kynnt á ríkisstjórnar-
fundi
21. apríl
Umræður um skýrsluna hefjast á
Alþingi
22. apríl
Skýrslan lekur í fjölmiðla
24. apríl
Drög að frumvarpi lagt fram á
ríkisstjórnarfundi.
25. apríl
Ríkisstjórnin samþykkir frumvarp.
26. apríl
Fjölmiðlafrumvarp samþykkt á
þingflokksfundum ríkisstjórnar-
flokkanna.
3. maí
Forsætisráðherra mælir fyrir
frumvarpinu og fyrsta umræða
hefst á Alþingi.
4. maí
Frumvarpið afgreitt til allsherjar-
nefndar.
10. maí
Breytt fjölmiðlafrumvarp kynnt.
11.–15. maí
Önnur umræða um frumvarpið á
Alþingi. Umræða hefst í þjóð-
félaginu um málskotsrétt forseta.
14. maí
Forseti tilkynnir að hann ætli
ekki í brúðkaup Friðriks Dana-
krónprins.
18. maí
Meirihluti allsherjarnefndar
samþykkir breytingartillögur við
frumvarpið.
19. maí
Breytt frumvarp lagt fyrir þriðju
umræðu á Alþingi.
24. maí
Þriðja umræða og atkvæða-
greiðsla um frumvarpið á
Alþingi. Frumvarpið er samþykkt
með 32 atkvæðum gegn 30.
1. júní
Forseta Íslands er afhent lögin til
staðfestingar eða synjunar.
2. júní
Forseti synjar lögunum staðfest-
ingar í fyrsta sinn í sögu lýð-
veldisins.
2. júní
Halldór Ásgrímsson segir að upp
sé komið fullkomið óvissuástand
en segir öruggt að þjóðaatkvæða-
greiðsla fari fram um málið.
3. júní
Davíð Oddsson segir að ekki
verði hjá því komist að halda
þjóðaratkvæðagreiðslu.
4. júní
Umræða hefst um þátttöku-
takmarkanir í þjóðaratkvæða-
greiðslu.
8. júní
Samráðsfundur formanna stjórn-
arflokkanna.
8. júní
Forsætisráðherra tilkynnir að
Alþingi verði kallað saman 5. júlí
þar sem ákveðið verði um lög
um þjóðaratkvæðagreiðslu.
Starfshópur ríkisstjórnarinnar um
lög um þjóðaratkvæðagreiðslu.
28. júní
Starfshópurinn skilar skýrslu um
tilhögun þjóðaratkvæðagreiðslu.
Sett er fram sú hugmynd að
atkvæði 25–44% atkvæðisbærra
manna þurfi að greiða atkvæði
gegn lögunum svo þau falli úr
gildi.
1. júlí
Skýrsla tveggja hæstaréttarlög-
manna um þjóðaratkvæða-
greiðslu sem unnin var að beiðni
stjórnarandstöðunnar birt. Niður-
stöður hennar segja það brot á
stjórnarskrá að setja nokkrar
takmarkanir í lögin.
2. júlí
Ráðherrar Framsóknarflokksins
ganga af ríkisstjórnarfundi eftir
stundarfjórðung án þess að
niðurstaða hafi náðst. Forsætis-
ráðherra staðfestir að ágreining-
ur sé milli stjórnarflokkanna um
þátttökulágmark.
4. júlí
Davíð og Halldór tilkynna um
„óvenju snjalla lausn“ í kjölfar
ríkisstjórnarfundar. Lausnin felst í
því að afturkalla fjölmiðlalögin er
forseti synjaði staðfestingar og
afstýra þannig þjóðaratkvæða-
greiðslu. Nýtt fjölmiðlafrumvarp
lagt fram.
5. júlí
Alþingi kemur saman og deilt er
um hvort frumvarpið sé þinglegt.
7. júlí
Umræður hefjast á Alþingi og
málið afgreitt til allsherjar-
nefndar.
8.–20. júlí
Allsherjarnefnd kallar til sín
fjölda sérfræðinga til að fjalla um
stjórnskipuleg álitamál varðandi
ákvörðun ríkisstjórnarinnar um
að afturkalla fjölmiðlalögin.
20. júlí
Allsherjarnefnd leggur til þær
breytingartillögur á frumvarpinu
að fjölmiðlalögin sem forseti
synjaði staðfestingar verði felld
úr gildi og öll ákvæði er varða
fjölmiðla verði felld úr gildi.
SIGRÍÐUR D. AUÐUNSDÓTTIR
BLAÐAMAÐUR
FRÉTTASKÝRING
FERILL FJÖLMIÐLAMÁLSINS
FRAMSÓKNARMENN YFIRGEFA STJÓRNARRÁÐIÐ Í GÆR
Þriggja mánaða sleitulaus umræða um fjölmiðlamálið svokallaða hefur nú tekið enda.
Engin lög verða sett um fjölmiðla en tímamótaákvörðun forsetans stendur eftir.
10-11 20.7.2004 21:35 Page 2