Fréttablaðið - 28.07.2006, Síða 36

■■■■ { ferðahelgin } ■■■■■■■■■■■■■■■■■■■■■■■■■■■■■■■■■■■■■■■■■■■■■■■4
„Með þessu átaki viljum við vekja
karla til umhugsunar um hversu
hræðilegar afleiðingar nauðgan-
ir hafa í för með sér fyrir alla
málsaðila,“ segir Hjálmar Gunnar
Hjálmarsson, meðlimur í hópnum.
„Staðreyndin er nefnilega sú að
karlmenn eru í yfirgnæfandi meiri-
hluta gerendur í nauðgunum eða
á bilinu 96-98 prósent, á meðan
konur eru í flestum tilfellum fórn-
arlömb. Karlar eru yfirleitt líka ger-
endur þegar körlum er nauðgað og
því engin ástæða til að sleppa þeim
við umræðuna,“ bætir hann við.
Að sögn Hjálmars er þetta fjórða
árið í röð sem staðið er fyrir átaki af
þessu tagi í tengslum við verslun-
armannahelgi, en í sjötta sinn sem
hópurinn fer af stað. „Í fyrsta sinn
var farið af stað undir slagorðinu
„Karlmenn segja nei við nauðg-
unum“ og má segja að þar með
hafi grunnurinn verið lagður að
hugmyndafræði hópsins,“ útskýrir
hann.
Hjálmar segir erfitt að mæla
árangurinn af starfsemi hópsins.
„Því miður liggja ekki fyrir tölur
um fjölda nauðgana um hverja
verslunarmannahelgi. „Vissulega
berast Stígamótum tilkynningar
á ári hverju og kærur eru lagðar
fram, en vegna misræmis gefur það
ekki rétta mynd af ástandinu. Stað-
reyndin er nefnilega sú að ekki er
kært í öllum tilfellum og svo geta
liðið fjölmörg ár áður en fórnar-
lömb gefa sig fram.“
Hjálmar segir mesta árangurinn
sjást af viðmóti almennings í garð
hópsins, sem verði jákvæðari með
ári hverju. „Við þurfum ekki lengur
að útskýra hugmyndafræðina frá
grunni og skynjum aukinn áhuga. Í
fyrra sýndi áhuginn sig meðal ann-
ars í því að menn sóttust jafnvel
eftir því að dreifa barmmerkjum og
bolum fyrir okkur. Við upplifðum
ekki frumkvæði af þessu tagi fyrir
fjórum árum og erum ánægðir með
hugarfarsbreytinguna sem hefur átt
sér stað.“
Hjálmar segir að líkt og á síð-
ustu árum verði hópurinn áberandi
við helstu umferðarmiðstöðvar
og ÁTVR, þar sem barmmerkjum,
bolum og plakötum verði dreift til
að vekja athygli á málstaðnum. Þá
er einnig á stefnuskránni að halda
út í Vestmannaeyjar en það er í
fyrsta sinn sem karlahópurinn fer
þangað. - rve
Nei við nauðgunum
KARLAHÓPUR FEMÍNISTAFÉLAGS ÍSLANDS MUN UM NÆSTU
VERSLUNARMANNAHELGI STANDA FYRIR ÁTAKI GEGN NAUÐG-
UNUM.
Hjálmar Gunnar Hjálmarsson er ánægður
með áhugann sem almenningur hefur
sýnt starfsemi karlahóps Femínistafélags
Íslands.FRÉTTABLAÐIÐ/STEFÁN
Þegar blaðamaður Fréttablaðsins
átti leið í Þórsmörk var glamp-
andi sól og Húsadalur skartaði sínu
fegursta. Á pallinum við veitinga-
skálann sátu skálaverðirnir Ásdís
Benediktsdóttir og Kristín Ósk
Matthíasdóttir og sleiktu sólina í
pásunni sinni. „Þetta er skemmti-
legasta sumarvinna sem hægt er
að komast í,“ segir Ásdís og Kristín
bætir við að það sé ekki slæmt að
eyða sumrinu fjarri mannabyggð-
um. „Við vinnum í tíu daga og
fáum svo frí í fimm. Þá er ágætt að
skreppa aðeins í bæinn og svona til
þess að fá samband við siðmenn-
inguna,“ segir Kristín og hlær.
Starf skálavarðar í Húsadal felst
í því að taka á móti gestum, halda
svæðinu hreinu og sinna þeim sem
koma á svæðið. Það þarf líka að slá
grasið og sjá til þess að allt sé sem
snyrtilegast. „Svo er líka boðið upp
á veitingar hér í skálanum sem við
sjáum um,“ segir Ásdís en boðið er
upp á heita súpu í hádeginu auk þess
sem vöfflur, pylsur og kaffi renna
ljúflega í maga ferðamannanna.
Undanfarin ár hefur mikil upp-
bygging átt sér stað í Húsadal og
margir átta sig ekki á því að þangað
er hægt að fara án þess að kúldrast í
tjaldi. Þrír stórir skálar eru á svæð-
inu sem taka, hver um sig, um það
bil 30 manns í gistingu. Einnig er
boðið upp á gistingu í átta smá-
hýsum sem taka fjóra til fimm í
gistingu. „Það er líka góð aðstaða
fyrir þá sem kjósa að vera í tjaldi,“
segir Ásdís um leið og hún bendir
blaðamanni á stórt aðstöðuhús sem
stendur við hlið veitingaskálans.
„Þarna er eldunaraðstaða og gott
pláss til að borða og svo eru sturtur,
salerni og gufubað í hinum endan-
um.“ segir Ásdís. Hún bætir því við
að aðstöðuhúsið hafi meira að segja
verið notað sem athvarf fyrir hressa
ferðamenn sem vildu syngja kar-
ókí eitthvert kvöldið. „Sundlaugin
okkar, Þórslaug, er líka rosalega
vinsæl en við erum svo heppin að
hafa heitt vatn hérna í Húsadal,“
segir Kristín. Þórslaug var búin
til fyrir nokkrum árum og meðan
blaðamaður dvaldi í Húsadal var
ávallt einhver að baða sig í lauginni
enda ekki amalegt að láta þreytuna
líða úr sér í heitu vatninu.
Ásdís og Kristín segja að hlutfall
íslenskra og erlendra ferðamanna sé
fremur jafnt í Húsadal. „Útlending-
arnir koma stakir en Íslendingarnir
í hópum,“ segir Ásdís og bætir því
við að það sé vinsælt hjá hópum að
skreppa í Húsadal eina nótt eða svo.
„Útlendingarnir eru ljúfir sem lömb
og það eru frekar Íslendingarnir
sem eru með eitthvert skrall. Það er
samt liðin tíð að hér sé mikið fyllerí
og svall og yfirleitt er ákaflega frið-
sælt hérna,“ segir Kristín.
Í Þórsmörk er nóg að sjá fyrir
ferðalanga og þegar blaðamaður
spyr hvernig tímanum sé best varið
svara stelpurnar því til að allir sem
komi í Húsadal gangi á Valahnúk.
„Stundum kemur fólk hingað og
stoppar bara í þrjá tíma og spyr
hvað það eigi að gera. Þá er vin-
sælt að skreppa á hnúkinn enda er
útsýnið þaðan frábært,“ segir Ásdís
og Kristín bætir því við að það sé
algengt að fólk skreppi í dagsferðir
frá Reykjavík og inn í Húsadal. „Þá
kemur leiðsögumaður með hópn-
um og þau ganga hér um svæðið.
Það er hægt að gera ótrúlega margt
hérna og gönguleiðirnar eru ótelj-
andi. Margir halda að það sé nauð-
synlegt að eiga jeppa og tjald til að
komast í Þórsmörk en það er alls
ekki þannig. Það er bara um að gera
að taka rútuna og bóka gistingu í
skála eða smáhýsi. Við höfum líka
boðið upp á þá þjónustu að lóðsa
fólk yfir ána,“ segir Kristín.
Þær stöllur eru sammála um að
hvergi sé betra að vera yfir sumar-
tímann en einmitt í Þórsmörk. „Það
er svo mikið tímaleysi hérna, maður
veit ekkert hvaða dagur er og það
skiptir líka ekki máli,“ segir Ásdís.
„Svo er líka alltaf svo gott veður
hérna,“ segir Kristín.
thorgunnur@frettabladid.is
Óþarfi að eiga jeppa
Það er margt hægt að gera um verslunarmannahelgina annað en að fara á skipulagða
útihátíð. Það er til dæmis alltaf gaman að koma í Húsadal í Þórsmörk. Þar hafa Kynnis-
ferðir komið sér upp góðri aðstöðu og svæðið er algjör paradís fyrir ferðamenn.
Boðið er upp á gistingu í átta smáhýsum.Náttúrufegurðin í Húsadal er engu lík.
Ferðamenn hvíla þreytta fætur í Þórslaug.
Ásdís og Kristín segja starf skálavarðarins
einstaklega skemmtilegt.
„Það er náttúrlega enginn einn
hlutur sem er ómissandi heldur
ýmislegt,“ segir Ólafur þegar blaða-
maður spyr hann um nauðsynlegt
nesti í útileguna. „Mér finnst eigin-
lega að það þurfi að skipta þessu í
tvennt. Annars vegar verður maður
að taka með sér góðan mat sem er
heppilegur til að verða saddur af,
veitir góða næringu og lætur manni
líða vel.
Svo er líka alveg bráðnauðsyn-
legt að hafa eitthvað sem er gott í
munninn til að gleðja sig og sam-
ferðamennina,“ segir Ólafur.
Morgunmaturinn er mikilvæg-
asta máltíð dagsins og Ólafur segir
að því sé eins farið í útilegunni.
„Það er nauðsynlegt að borða
góðan morgunmat, til dæmis múslí.
Ef maður ætlar að ganga mikið er
gott að borða orkuríkan mat eins
og brauð og súpur yfir daginn og
borða svo þurrmat á kvöldin,“ segir
Ólafur og bætir því við að feitmet-
ið sé alltaf gott á löngum göngum,
„Það er gott að taka með sér smjör,
kæfu og eitthvað í þeim dúr. Svo
er harðfiskurinn auðvitað ómiss-
andi og þá að sjálfsögðu með miklu
smjöri,“ segir Ólafur.
Þótt hollustan verði að vera í
fyrirrúmi segir Ólafur að það sé
nauðsynlegt að taka einhver sæt-
indi með í ferðalgið. „Maður verður
að hafa eitthvað að hlakka til enda
eiga ferðalög að vera skemmtiferðir.
Þegar maður kemur þreyttur í tjald
eða skála að kvöldi til er um að gera
að verðlauna sig fyrir afrek dags-
ins með einhverju gotteríi,“ segir
Ólafur og bætir því við að hér verði
smekkur hvers og eins að ráða því
hvað verði fyrir valinu.
Mikilvægt að verðlauna sig
ÓLAFUR ÖRN HARALDSSON ER FORSETI FERÐAFÉLAGS ÍSLANDS.
HANN HEFUR ÁRALANGA REYNSLU AF FERÐALÖGUM OG VEIT
ÞVÍ MANNA BEST HVAÐ ER MIKILVÆGAST AÐ HAFA Í NESTIS-
TÖSKUNNI.
Ólafur segir það nauðsynlegt að taka
einhver sætindi með í ferðalagið til að
verðlauna sig. FRÉTTABLAÐIÐ/HARI
Ómissandi í ferðalagið