Tíminn - 11.11.1986, Síða 9

■^vp .rv*- - . .4
Þriðjudagur 11. nóvember 1986 __________________________________________________________________________________________________________/Tíminn 9
Stjórnmálaályktun 19. flokksþings
Framsóknarflokksins 1986:
NY OLDI
AUGSÝN
Framsóknarflokkúrinn mun standa
vörð um stjórnarfarslegt,
efnahagslegt og menningarlegt
sjálfstæði íslensku þjóðarinnar á
grundvelli lýðræðis og þingræðis.
Framsóknarflokkurinn vill byggja
efnahagslíf þjóðarinnar á blönduðu
hagkerfi samvinnurekstrar,
einkarekstrar og opinberrar þj ónustu,
þar sem framtak einstaklinga og
samtaka þeirra nýtur sín til fulls.
Á grundvelli þessarar stefnu vill
Framsóknarflokkurinn beita sér fyrir
efnalegum framförum þar sem lögð er
áhersla á jöfnuð milli landsmanna og
samvinnu þeirra og samkennd. í
samræmi við þessa grundvallarstefnu
mun Framsóknarflokkurinn standa
vörð um velferð þjóðarinar jafnframt
því sem hann hafnar lífvana
ríkisforsjá sósíalista og óheftri
frjálshyggju íhaldsflokka.
Árangur ríkisstjórnar
Steingríms Hermannssonar
Festa
Framsóknarflokkurinn gekk til
síðustu kosninga undir kjörorðinu
festa, sókn, framtíð. Þá voru
viðsjárverðir tímar í efnahagsmálum
og verðbólga og óstöðugleiki fór
vaxandi. Flokkurinn lagði þá áherslu
á samræmdar efnahagsaðgerðir sem
leitt gætu til hjöðnunar verðbólgu og
skapað nauðsynlega festu í
efnahagslífinu til að hefja sókn til
betri framtíðar.
í samræmi við þessa stefnu hafði
Framsóknarflokkurinn við upphaf
núverandi stjórnarsamstarfs forystu
um lögbundnar efnahagsaðgerðir,
sem strax höfðu í för með sér verulega
hjöðnun verðbólgu. Sá árangur var
innsiglaður á síðastliðnum vetri með
víðtækum kjarasáttmála sem
ríkisstjórnin hafði skapað forsendur
fyrir með aðgerðum sínum.
í lok þessa árs mun kaupmáttur
ráðstöfunartekna að meðaltali verða
hærri hér á landi en nokkru sinni fyrr.
Verðbólga verður minni en hún hefur
verið í 15 ár. Sparnaður verður meiri
en hann hefur verið í 14 ár. Erlendar
skuldir og greiðslubyrði fara lækkandi
sem hundraðshluti af
þjóðarframleiðslu. Atvinnuleysi er
ekkert. Pessi umskipti hafa leitt til
efnahagslegs stöðugleika og gert
íslensku þjóðinni kleift að ganga á ný
inn á braut framfara, efnahagslegs
frjálsræðis og velferðar.
Sókn
Flokksþingið fagnar því, að á þessu
kjörtímabili hefur hafist umtalsverð
og nauðsynleg nýsköpun í íslensku
atvinnulífi. Má þar nefna í fiskeldi og
loðdýrarækt, stofnun Þróunarfélags
Islands og rannsóknarstyrki, sem
Rannsóknarráð ríkisins hefur fengið
til úthlutunar til að örva nýsköpun í
atvinnulífi.
Framsóknarflokkurinn hefur á
þessu kjörtímabili haft forystu um
róttækar skipulagsbreytingar og
umbætur í sjávarútvegi og
landbúnaði. Með þeim er lagður
grunnur að meiri framleiðni og
hagkvæmni þessara atvinnugreina.
Þessar breytingar hafa ekki verið
sársaukalausar. Alþjóð er þó ljóst að
í þessum málum hefur
Framsóknarflokkurinn af festu unnið
nauðsynlegt tímamótaverk. Með
sama hætti hafa verið gerðar róttækar
(umbætur á húsnæðislánakerfi
landsmanna sem gera ungu fólki á
nýjan leik kleift að reisa þak yfir höfuð
sér.
Baráttumál í
komandi kosningum
Kosningar til Alþingis fara fram
næsta vor. í ályktunum um
atvinnumál, mennta- og
menningarmál, félags- og
heilbrigðismál svo og flokksmál er
ítarleg grein gerð fyrir stefnumiðum
Framsóknarflokksins í þeim
kosningum. Auk þeirra ályktana telur
flokksþingið að leggja beri sérstaka
áherslu á eftirfarandi
meginstefnumál.
Á næstu árum mun ráðast, hvort
tekst að nýta þann góða árangur, sem
náðst hefur í efnahagsmálum til þess
að styrkja stoðir þjóðarbúsins og bæta
afkomu þeirra, sem lakasta afkomu
hafa. í því skyni leggur flokksþingið
áherslu á eftirfarandi atriði:
Áfram verði markvisst stefnt að
hjöðnun verðbólgu og lækkun
erlendra skulda án atvinnuleysis.
Góð staða þjóðarbúsins verði
jafnframt nýtt til þess að treysta
rekstrargrundvöll atvinnuveganna,
m.a. þeirra frystihúsa sem eiga í
erfiðleikum eftir óðaverðbólgu
undanfarinna ára.
í kjaramálum verði áhersla lögð á
að draga stórlega úr launamisrétti
með hækkun lægstu kauptaxta, að
jafna þann mikla mun sem er á
launum karla og kvenna og tryggja
þann kaupmátt sem náðst hefur.
Nýsköpun atvinnulífs verði fram
haldið af fullum krafti.
Eitt mikilvægasta verkefnið er að
tryggjahallalausan rekstur ríkissjóðs.
Skattalög verði endurskoðuð og
einfölduð, framkvæmdin bætt og
viðurlög við skattsvikum stórlega
hert, m.a. verði skattsvikarar sviptir
atvinnuleyfi við ítrekuð brot.
í byggðamálum verði vörn snúið í
sókn. Byggðastofnun verði efld,
stjórnsýslustöðvum komið upp í
kjördæmum landsbyggðanna og
þangað færð sú opinber þjónusta sem
dreifbýlinu ernauðsynleg. Verkefni,
ábyrgð á þeim og tekjur til þess að
framkvæma þau verði færðar til
landsbyggðarinnar. Til að gera það
kleift verði komið á fót öflugum
lýðræðislegum stjórnsýslueiningum.
Mikilvægt er að bæta eigin fjárstöðu
íslenskra fyrirtækja og hvetja til
virkrar þátttöku almennings í
atvinnulífinu.
Þegar um er að ræða atvinnurekstur
sem byggir á tækninýjungum eða
nýjum mörkuðum kann að vera
nauðsynlegt og æskilegt að stofna
fyrirtæki með þátttöku erlendra aðila.
Framsóknarflokkurinn ítrekar þá
stefnu að ekki eigi að heimila
erlendum aðilum eignarhald í
höfuðatvinnuvegum landsins.
Nauðsynlegt er að endurskoða löggjöf
um þátttöku erlendra aðila í
atvinnurekstri hér á landi, þannig að
íslenskir hagsmunir verði sem best
tryggðir.
Stjórnsýsla opinberra aðila þarfnast
stöðugrar endurskoðunar til þess að
tryggja skilvirkni og bestu nýtingu
opinberra fjármuna.
Manngildi ofar auðgildi
Á tímum vaxandi efnishyggju er
mjög mikilvægt að þjóðin gæti að sér
svo að forn gildi í menningu og
siðfræði dagi ekki uppi eða víki fyrir
auðhyggju og múgmennsku.
Manngildi ofar auðgildi er einn af
hornsteinum stefnu
Framsóknarflokksins. Mikilvægt er
að hafa í heiðri það sjónarmið, að
heilbrigt og menningarlegt líf skiptir
meira máli en ýmis lífsþægindi sem
hægt er að kaupa fyrir peninga.
Leggja þarf áherslu á aðgerðir í
baráttunni gegn fíkniefnaneyslu. Við
þeim vanda þarf að bregðast með
stórauknum áróðri og beinum
aðgerðum s.s. aukinni fræðslu, hertri
löggæslu og öðrum fyrirbyggjandi
aðgerðum. Þá þarf að þyngja viðurlög
við brotum á fíkniefnalöggjöfinni. Því
fagnar flokksþingið skipan
forsætisráðherra á nefnd til þess að
samhæfa opinberar aðgerðir í
baráttunni gegn útbreiðslu og notkun
fíkniefna.
Þingið leggur áherslu á nýjan lífsstíl,
betra þjóðfélag, þar sem stefnt er að
uppbyggingu atvinnulífs, réttlátari
tekjuskiptingu og skipan kjaramála,
sem miðist við að fjölskyldum sé gert
kleift að lifa eðlilegu heimilislífi.
Utanríkis- og öryggismál
Flokksþingið ítrekar þá
grundvallarstefnu
Framsóknarflokksins í
utanríkismálum, að treysta
stjórnarfarslegt og efnahagslegt
sjálfstæði landsins, með virkri
þátttöku í starfsemi Sameinuðu
þjóðanna og norrænu samstarfi,
stuðla að vinsamlegum samskiptum
þjóða og auðvelda þannig samninga
um afvopnun og varðveislu friðar.
Flokkurinn leggur áherslu á sjálfstæða
utanríkisstefnu, þar sem ofangreind
markmið eru lögð til grundvallar.
Vegna legu landsins, menningarog
sögu, er íslendingum nauðsynlegt að
gæta þess að hafa sem best tengsl við
þjóðir í austri og vestri. Flokkurinn
vekur sérstaka athygli á þeim
breytingum sem eru að gerast í
Evrópu og að íslendingum er nauðsyn
að fylgjast náið með þeirri þróun.
Innganga í Efnahagsbandalag Evrópu
kemur þó ekki til greina.
Viðskiptahagsmuni þjóðarinnar ber að
tryggja með víðtækum samningum.
Framsóknarflokkurinn er fylgjandi
aðild íslands að
Atlantshafsbandalaginu, en leggur
áherslu á þá megin stefnu að hér verði
ekki erlendur her á friðartímum.
Hvað varðar framkvæmd
varnarsamningsins við Bandaríkin
telur flokkurinn á það skorta að haldið
hafi verið á málum af nægilegri festu
og í samræmi við öryggishagsmuni
íslendinga.
Flokkurinn leggur áherslu á að
starfsemi eða hernaðarframkvæmdir
á vegum varnarliðsins eða
Atlantshafsbandalagsins verði að
engu leyti auknar frá því sem leyft
hefur verið, hvort sem um er að ræða
ratsjárstöðvar, birgðageymslur eða
flugvelli.
Islendingar fylgist náið með þróun
öryggis og varnarmála á öllu Norður-
Atlantshafi þannig að út frá
hagsmunum íslendinga sjálfra sé ætíð
hægt að leggja mat á stöðu mála og
framtíðarhorfur og móta
öryggisstefnu landsins í samræmi við
það.
Flokksþingið telur eðlilegt að staða
og starfssvið varnarmálanefndar og
varnarmáladeildar verði
endurskoðað.
Framsóknartlokkurinn leggur
áherslu á, að ísland vinni eftir megni
og m.a. í samvinnu við hin
Norðurlöndin gegn ofsókum
stjórvalda á hendur þegnum sínum
hvar sem slíkt viðgengst og sömuleiðis
gegn kynþáttamisrétti.
Flokksþingið leggur áherslu á að
ísland beiti sér fyrir samstarfi þjóða
við Norður-Atlantshaf í
sameiginlegum hagsmunamálum, er
varða nýtingu auðlinda hafsins og
verndun fiskistofna og hafsvæða fyrir
ofveiði og mengun, þ.ám. hugsanlegri
mengun vegna kjarnorkuslysa á láði
og legi.
Framsóknarflokkurinn fagnar því,
að ísland varð vettvangur
afvopnunarviðræðna stórveldanna.
Með þeim hætti fékk þjóðin tækifæri
til þess að leggja sitt lóð á
vogarskálina til varðveislu friðar.
Þegar þjóðir heims verja æ hærri
fjárhæðum til vígbúnaðarog stórveldi
heimsins framleiða sífellt stórvirkari
gereyðingarvopn er það orðið eitt
brýnasta verkefni mannkyns að
bindast samtökum um útrýmingu
kjarnorkuvopna. Ber að harma, ef
geimvarnaráætlun Bandaríkjanna
leggur stein í götu þessa markmiðs,
enda óverjandiaðhimingeimurinnsé
notaður í hernaðarskyni. íslendingum
er skylt að taka þátt í þeirri viðleitni
að eyða kjarnavopnum hvar sem því
verður við komið á alþjóðavettvangi.
Ný öld í augsýn
íslenska þjóðin gengur senn á vit
nýrrar aldar. Höfuðverkefni íslenskra
stjórnmála á næstu árum verður að
búa þjóðina undir tuttugustu og fyrstu
öldina. Til þess þarf framsýni og
víðsýni í stefnumótun.
Þegar svo langt er horft er
nauðsynlegt, að fyrst og fremst sé
hugað að forsendum æskilegrar
þróunar og grundvallaratriðum í
stefnu og gildismati.
Flokksþingið minnir á að virkt
lýðræði byggist á víðtækri þátttöku
fólks í stjórnmálum, innan
stjórnmálaflokkanna og í lifandi
félagslegu starfi í þjóðfélaginu.
Þar sem þjóðfélagið verður sífellt
flóknara og umræða um þjóðmálin æ
torskildari hefur almenningur
fjarlægst stjórnmálin. Þeirri
öfugþróun verður að snúa við. Styrkja
þarf starf stjórnmálaflokkanna og
leita ætíð nýrra leiða í þróun
lýðræðishefða þjóðarinnar, sem
tryggi sem beinasta þátttöku fólks á
flestum sviðum þjóðmála.
Ljóst virðist að tuttugasta og fyrsta
öldin verður öld örrar tækniþróunar,
tölvu- og upplýsingabyltingar. Hún
verður jafnframt öld ört minnkandi
fjarlægða, vaxandi alþjóðaviðskipta
og harðari samkeppni á flestum
sviðum.
ísland án atvinnuleysis er nú sem
fyrr eitt af meginstefnumiðum
Framsóknarflokksins. Aðeins með
stöðugri þróun og aðlögun að
breyttum aðstæðum verður
samkeppnishæfni íslensks atvinnulífs
tryggð. Forsenda þess er, að
atvinnuvegirnir fái hæft fólk til að
takast á við síbreytileg viðfangsefni
tækni- og upplýsingaþjóðfélagsins.
Til þess að ný kynslóð fái það
tækifæri og geti mætt kröfum nýrrar
aldar verður strax að huga að
nútímalegum breytingum í skóla og
menntakerfi þjóðarinnar og
stóreflingu rannsókna- og
vísindastarfsemi. Fyrir því mun
Framsóknarflokkurinn beita sér.
Flokksþingið minnir á frumkvæði
Steingríms Hermannssonar
forsætisráðherra, er hann skipaði
nefnd til að gera athugun á þróun
íslensks þjóðfélags og þróunarhorfum
næsta aldarfjórðung. Með stofnun
þeirrar nefndar hefur verið lagður
grunnur að frekara starfi á þessu sviði.
Framsóknarflokkurinn mun í krafti
kjörorðs þessa flokksþings - Ný öld í
augsýn - fylgja þessu starfi eftir á
komandi árum.