Réttur - 01.01.1969, Qupperneq 12

ÁSGRIMUR ALBERTSSON
SIGURLAUN
(Svipmyndir frá liðinni tíð).
Þeir komu út úr húsunum,
hver úr sínu húsi.
Jón í Nesbúð,
Lárus í Skuld,
Pétur í Kreppu,
Guðmundur í Strympukoti,
Sveinn á Spildunni,
Ásgeir á Bakka
og þeir hinir.
I dimmu morgunsins komu þeir út,
stungu nefjunum í vindinn og fjúkið,
kipruðu augun, óku sér svolítið,
gengu bak við húshornin
og gerðu holur í fönnina,
gular holur í hvíta fönnina.
Þeir gengu frá húsunum,
hver frá sínu húsi,
sumir langt, sumir skammt.
Sumstaðar lá fönnin i djúpum sköflum,
sumstaðar hafði ekki fest snjó.
Sumir höfðu vindinn og fjúkið í fang,
sumir héldu undan.
Sumir höfðu vindinn og fjúkið á hlið,
sumir hægri hlið, sumir vinstri hlið,
sumir gengu skáhallt móti vindi,
sumir skáhallt undan vindi.
En þeir gengu allir til sama staðar.
Þeir komu inn i port verksmiðjunnar.
Einn af öðrum komu þeir inn
í portið hjá verksmiðjunni.
Þeir hnöppuðust í skjólinu,
hristu af sér fönnina.
Sumir voru snjóugir að framanverðu,
sumir að aftanverðu.
Vatnsdropar sátu á andlitunum,
héngu í augnabrúnunum,
í eyrunum,
á nefinu.
Þeir komu ekki til þess
að vinna i verksmiðjunni.
Hjól hennar stóðu kyrr.
Ásar hennar sváfu í legunum
dúðaðir smurningu.
Reimar hennar þögðu,
nú spilaði enginn á þá hörpu.
Mýs léku sér i eldholinu.
Nei, þeir komu ekki til þess
að vinna í verksmiðjunni.
Nú komu þeir til þess að verkvæðast
gegn klakanum og grjótinu.
Þeir tóku sér í hendur haka,
skóflur,
járnkarla.
Þeir voru sigurvegararnir frá fUndinum,
að búa sig undir að taka út sigurlaunin.
Þeir voru allir á fundinum.
Jón í Nesbúð,
Lárus í Skuld,
Pétur í Kreppu,
Guðmundur í Strympukoti,
Sveinn á Spildunni,
Ásgeir á Bakka
og þeir hinir.
12