Morgunblaðið - 25.10.2006, Blaðsíða 52

ÁSKRIFT-AFGREIÐSLA 569 1100 MIÐVIKUDAGUR 25. OKTÓBER 298. DAGUR ÁRSINS 2006 VERÐ Í LAUSASÖLU 220 KR. MEÐ VSK.
5 6 9 1 1 0 0
Ritstjórn: ritstjorn@mbl.is
Auglýsingar: augl@mbl.is
Áskrift: askrift@mbl.is | sími 5691100
mbl.is: netfrett@mbl.is
 A- og NA-átt, 10–18
m/s. Slydda eða snjó-
koma sunnanlands,
mest úrkoma síðdegis,
hlánar. Hægari og
stöku él norðanlands. » 8
Heitast Kaldast
0°C -5°C
STÓR hópur gesta kom til að fylgjast með því
er hvalveiðiskipið Hvalur 9 kom með 23 metra
langa langreyðarkú að landi í hvalstöðinni í
Hvalfirði skömmu eftir klukkan 14 í gær. Ekki
var mikið um mótmælendur að sögn starfs-
manns Hvals hf. Hvalurinn var talsvert fitu-
meiri og sverari en fyrsta langreyðurin sem
áhöfnin á Hval 9 skutlaði um helgina. Nokkur
bræla var á veiðislóð en hvalurinn var skotinn
suðvestur af Garðskaga um klukkan 14 á
mánudag. Að sögn Kristjáns Loftssonar, for-
stjóra Hvals hf., var um að ræða fimmtíu ára
gamlan hval og segist Kristján þess fullviss að
markaður sé fyrir afurðirnar af honum. Um
útflutningsverðmæti er þó ekki hægt að segja
fyrr en að loknum efnarannsóknum vegna
kvikasilfurs og PCB og fleiri hugsanlegra efna
í kjötinu en þær rannsóknir munu taka 3–4
mánuði að sögn Kristjáns. Vonir voru bundnar
við að hægt væri að ljúka hvalskurðinum á
planinu í Hvalfirði fyrir miðnætti í gær.
Morgunblaðið/Ómar
Feitari og sverari en fyrsti hvalurinn
Eftir Ólaf Þ. Stephensen
olafur@mbl.is
HALLDÓR Ásgrímsson, fyrrverandi for-
sætisráðherra, hefur verið tilnefndur af Ís-
lands hálfu í starf framkvæmdastjóra nor-
rænu ráðherranefndarinnar í Kaup-
mannahöfn. Samkvæmt
heimildum Morgunblaðs-
ins hefur nafni Halldórs
verið komið á framfæri
við ríkisstjórnir hinna
norrænu ríkjanna, meðal
annars á fundi Jónínu
Bjartmarz samstarfsráð-
herra Norðurlanda með
norrænum starfssystkin-
um sínum í Kaupmanna-
höfn í fyrradag.
Bæði Ísland og Finnland sækjast eftir
stöðunni. Af Finnlands hálfu hefur nafn Jans
Eriks Enestam umhverfisráðherra verið sett
í pottinn, svo og nafn Outi Ojala, fyrrverandi
forseta Norðurlandaráðs. Ekki er sótt form-
lega um stöðuna, heldur koma aðildarríkin
frambjóðendum sínum á framfæri og gera
svo út um það sín á milli hver hlýtur starfið.
Engin niðurstaða liggur fyrir. Samkvæmt
heimildum Morgunblaðsins sækjast önnur
aðildarríki en Ísland og Finnland ekki eftir
stöðunni, en engin loforð um stuðning liggja
heldur fyrir. Gert er ráð fyrir að fram-
kvæmdastjóri verði valinn á þingi Norður-
landaráðs, sem hefst í Kaupmannahöfn í
næstu viku.
„Góður frambjóðandi“
Nafn Halldórs hefur verið nefnt undan-
farnar vikur í samtölum íslenzkra og nor-
rænna ráðamanna. Þegar Fredrik Reinfeldt,
forsætisráðherra Svíþjóðar, heimsótti Finn-
land fyrir tíu dögum, var hann spurður á
blaðamannafundi hverjar hann teldi líkurnar
á að Enestam yrði ráðinn til starfans. Rein-
feldt svaraði: „Enestam er góður frambjóð-
andi. En það er líka annar góður frambjóð-
andi.“ Halldór Ásgrímsson vildi í samtali við
Morgunblaðið ekkert tjá sig um málið.
Halldór
tilnefndur
af Íslands
hálfu
Halldór
Ásgrímsson
MÓTMÆLI halda áfram að
streyma inn til íslenskra stjórn-
valda vegna þeirrar ákvörðunar að
hefja hvalveiðar í atvinnuskyni. Þá
hafa Morgunblaðinu borist þúsund-
ir skipulagðra mótmælabréfa í
gegnum dýraverndunarsamtökin
IFAW þar sem íslenskir ráðamenn
eru hvattir til að láta af veiðunum.
Í blaðinu í gær birtist frétt þess
efnis að hvalveiðar Íslendinga í at-
vinnuskyni hefðu ráðið því að sjáv-
arútvegsráðstefnan Groundfish
Forum verður ekki haldin hér á
landi að ári, heldur í Noregi. Að
mati Einars K. Guðfinnssonar sjáv-
arútvegsráðherra er fréttin mót-
sagnakennd. „Hún fjallar annars
vegar um að það hafi ráðið úrslitum
um að þessi ráðstefna var ekki hald-
in hér á landi að við værum að byrja
þessar veiðar, en síðar er í fréttinni
sagt frá því að ráðstefnan verði
haldin í Noregi, sem er eins og allir
vita öflugt hvalveiðiland, sem hefur
stundað hvalveiðar undanfarin 10
ár í margfalt meiri mæli en við Ís-
lendingar erum að gera,“ segir
hann.
Skýla sér á bak við veiðarnar
„Í raun og veru finnst mér fréttin
staðfesta það að hvalveiðar í sjálfu
sér hafi ekki þessi áhrif á ferðaþjón-
ustu sem margir óttuðust til lengri
tíma litið. Skammtímaáhrifin geta
verið einhver, en til lengri tíma litið
eru þau lítil sem engin. Ella hefðu
menn þá væntanlega ekki ákveðið
að halda þessa ráðstefnu hjá hval-
veiðiþjóðinni Norðmönnum. Hins
vegar geri ég ráð fyrir að við mun-
um fá fleiri fréttir af þessu tagi þar
sem menn skýli sér á bak við hval-
veiðarnar, ef þeir ná ekki þeim ár-
angri í viðskiptum, sem þeir hefðu
kosið. Þetta er ekki fyrsta fréttin
sem berst um slíkt og ég á ekki von
á því að þessi frétt verði sú síðasta.
Við þekkjum það frá fyrri tímum að
menn hafa skýlt sér á bak við hval-
veiðar með svipuðum hætti,“ segir
Einar K. Guðfinnsson sjávarút-
vegsráðherra.
Umhverfisráðherra Svíþjóðar
kallar sendiherra á sinn fund
Þá bárust í gær fréttir af því að
Guðmundur Árni Stefánsson,
sendiherra Íslands í Svíþjóð, hefði
verið boðaður á fund umhverfisráð-
herra landsins, Andreas Carlgren,
og honum verið afhent formleg mót-
mæli við þeirri ákvörðun Íslendinga
að hefja hvalveiðar í atvinnuskyni.
Að mati Baldvins Jónssonar,
framkvæmdastjóra verkefnisins
Sjálfbært Ísland í Bandaríkjunum,
geta veiðarnar haft áhrif á sölu ís-
lenskra landbúnaðarafurða þar í
landi. „Við heyrðum í gegnum búð-
irnar að fólk er að koma í stórum
stíl og vekja athygli á því að nú hafi
Íslendingar hafið hvalveiðar á ný.
Búðirnar eru tvístígandi í málinu,
því að það eru auðvitað ekki bænd-
ur sem taka þessa ákvörðun. Við
vonum að þeir njóti sannmælis fyrir
það.“
„Það sem er óþægilegast er að
við höfum verið að kynna Ísland
sem náttúruperlu og reynum að
hafa forystu á sviði umhverfismála,
hvort sem eru sjálfbærir búskapar-
hættir eða sjálfbærar fiskveiðar,
eða orkumál,“ segir Baldvin.
Mótmælin halda áfram
Sjávarútvegsráðherra segir að menn noti hvalveiðarnar sem skálkaskjól
Í HNOTSKURN
»Hvalaafurðir Hvals hf.verða frystar hjá HB
Granda á Akranesi.
»Talsverður hópur gestakom til að fylgjast með
hvalskurðinum í gær en eng-
ir mótmælendur voru á
staðnum að sögn starfs-
manns Hvals hf.
»Veiðiskipið Hvalur 9 héltaftur út til veiða skömmu
eftir löndun í Hvalfirði í gær.
KVARTETT Jóels Pálssonar og Sigurðar
Flosasonar kom fram á tvennum tón-
leikum á dögunum í 2.000 manna kons-
ertsal í Sjanghaí á samnefndri listahátíð
þar í borg. Kvartettinn var eina djass-
atriðið á hátíðinni og segir Jóel að vel hafi
tekist til.
Tvær af stærstu sjónvarpsstöðvunum í
Sjanghaí tóku þá Jóel og Sigurð í viðtal og
má ætla að milljónir sjónvarpsáhorfenda
hafi fylgst með þeim í sjónvarpinu.
Einnig lék kvartettinn á stuttum úti-
tónleikum í borginni og hélt síðan í hljóð-
ver rekið af kommúnistaflokknum þar sem
þeir félagar nutu aðstoðar sérlegs hljóð-
manns kommúnistaflokksins í Sjanghaí.
Stendur til að gefa diskinn út í Kína. | 18
Léku fyrir þús-
undir í Sjanghaí
Jóel Pálsson Sigurður FlosasonUM NÍU þúsund mótmælabréf gegn hvalveiðum Íslendinga bárust
Morgunblaðinu í gær með tölvupósti gegnum dýraverndunarsamtökin
IFAW. Bréfin innihalda meira og minna sama texta og bréf sem sam-
tökin hafa sent forsætisráðherra og sendiráðum Íslands. Eru þau und-
irrituð af fólki sem lýst hefur sig andsnúið hvalveiðum á heimasíðu sam-
takanna.
Í textanum segir meðal annars að hvalveiðarnar skaði alþjóðlegt orð-
spor Íslendinga og stuðli að útrýmingu dýrategundarinnar. Þá segir að
hvalveiðar í atvinnuskyni séu fornaldarlegur og tilgangslaus atvinnu-
vegur og muni einungis skaða Ísland í efnahagslegu tilliti. Í textanum er
einnig fullyrt að langreyðurin sé í útrýmingarhættu en þegar hafa verið
skotnir tveir hvalir af þeirri tegund. Klykkt er út með því að Íslendingar
séu upp til hópa meðvitaðir um umhverfismál og að veiðarnar séu sér-
sniðnar að hagsmunum ákveðins hóps en ekki þörfum íslenskra borgara.
Um 9 þúsund bréf bárust
Hvalur 9 Skipið siglir aftur á miðin eftir að hafa landað langreyðinni.