Fréttablaðið - 29.05.2009, Blaðsíða 51

FÖSTUDAGUR 29. maí 2009
STJARNAN 2-1 FYLKIR
1-0 Steinþór Þorsteinsson (5.)
1-1 Valur F. Gíslason, víti (11.)
2-1 Björn Pálsson (34.)
Stjörnuvöllur, áhorf.: 738
Vilhjálmur Alvar Þórarinsson (7)
TÖLFRÆÐIN
Skot (á mark) 17–8 (9–4)
Varin sk. Kjartan 0 (Davíð 4) – Fjalar 7
Horn 8–6
Aukaspyrnur fengnar 17–10
Rangstöður 0–8
Stjarnan 4–5–1 Kjartan Ólafsson - Guðni R.
Helgason 7, Tryggvi Bjarnason 7, Daníel Laxdal 8,
Hafsteinn R. Helgason 7 - Steinþór Þorsteinsson 8,
Jóhann Laxdal - (10., Davíð Guðjónsson 8 ML),
Birgir Birgisson 7 (83., Andri Sigurjónsson -), Björn
Pálsson 7, Halldór Björnsson 6 - Þorvaldur Árnason
6 (90., Bjarki Páll Eysteinsson -).
Fylkir 4–3–3 Fjalar Þorgeirsson 6 - Andrés Már
Jóhannesson 6, Kristján Valdimarsson 5, Einar
Pétursson 5, Tómas Þorsteinsson 3 (46., Þórir
Hannesson 5) - Ásgeir Börkur Ásgeirsson 4 (64.,
Ólafur Stígsson 5), Valur Fannar Gíslason 5, Halldór
Hilmisson 4 - Ingmundur Óskarsson 4, Pape Faye 3
(46., Kjartan Baldvinsson 5), Kjartan Á. Breiðdal 6.
FÓTBOLTI Sextán ára markvörður
Stjörnunnar, Davíð Guðjónsson,
stal senunni í leik Stjörnunnar og
Fylkis í gær. Davíð kom óvænt inn
á eftir aðeins tíu mínútur þegar
Kjartan Ólafsson var rekinn útaf
með rautt spjald og stóð sig frá-
bærlega í eftirminnilegum sigri
nýliðanna.
Stjörnumenn skoruðu sigur-
markið manni færri, ógnuðu Fylk-
ismönnum allan leikinn og unnu 2-
1 – sinn fjórða sigur í fyrstu fimm
umferðum Pepsi-deildarinnar.
Stjörnumenn höfðu mikið fyrir
því að fá Kjartan Ólafsson í mark-
ið fyrir leikinn og það var því grát-
broslegt þegar hann þurfti að yfir-
gefa völlinn með rautt spjald eftir
aðeins níu mínútna leik. Kjartan
lenti þá í svipaðri stöðu og Bjarni
Þórður Halldórsson á móti FH í
síðasta leik og niðurstaðan var sú
sama – víti og rautt spjald.
Bjarni Jóhannsson þurfti því að
senda sextán ára strák í markið í
sínum fyrsta meistaraflokksleik.
Davíð Guðjónsson fór í vitlaust
horn í vítinu en honum óx síðan
ásmegin eftir það. Það var ekki nóg
með að hann kæmi inn á óundirbú-
inn og við erfiðar aðstæður held-
ur þurfti hann einnig að standa í
marki á móti vindinum allan fyrri
hálfleikinn.
„Ég var að deyja úr stressi en ég
reyndi bara að hugsa um leikinn
og einbeita mér að honum,“ sagði
Davíð eftir leikinn og þjálfarinn
Bjarni Jóhannsson gat ekki annað
en dáðst að drengnum eins og allir
stuðningsmenn Stjörnunnar sem
kölluðu látlaust: „Dabbi kóngur“ á
áhorfendapöllunum.
„Þessi innákoma Davíðs kom
öllum á óvart og honum sennilega
mest sjálfum. Ég held að það hafi
varla runnið í honum blóðið því
hann var allavega fölur í fram-
an þegar hann fór inn á völlinn,“
sagði Bjarni í léttum tón og hann
var stoltur af liði sínu.
„Liðið brást ótrúlega rétt við
þessu og við erum með dugnaðar-
stráka sem eru spenntir fyrir því
að vera í úrvalsdeild þar sem þeir
hafa fæstir verið áður. Við vorum
fljótir að finna taktinn í varnar-
leiknum og tókst líka um leið að
ógna marki þeirra. Þetta var alveg
magnaður sigur,“ sagði Bjarni.
„Við áttum að gera betur í dag.
Við töpuðum þessum leik ekki útaf
gervigrasinu heldur töpuðum við
honum út af okkar hugarfari. Það
eru margir ungir strákar í liðinu
og það tekur tíma að ná upp stöð-
ugleika í liðinu,“ sagði Ólafur Þórð-
arson, þjálfari Fylkis, sem dáðist
líka að Davíð.
„Ég skil ekki af hverju þeir voru
að kaupa sér markmann þegar þeir
voru með þennan fína varamark-
mann. Hann varði eins og skepna
og hélt þeim á floti. Þeir voru bara
að kasta peningunum en það góða
við þetta var að Fylkir fékk 35 þús-
und fyrir hinn markmanninn,“
sagði Ólafur.
Steinþór Freyr Þorsteinsson
var allt í öllu í sóknaraðgerð-
um Stjörnumanna og duglegur
að stríða stöðum varnarmönnum
Fylkis sem gekk síðan einnig illa
að verjast stórhættulegum föst-
um leikatriðum Garðabæjarliðs-
ins. Steinþór skoraði fyrra mark-
ið og lagði síðan það seinna upp
auk þess að búa til mun fleiri góð
færi fyrir félaga sína. Davíð var
maður leiksins, Daníel Laxdal
fyrirliði var baráttumaður leiks-
ins en Steinþór var besti maður
vallarins. - óój
Tíu Stjörnumenn lögðu Fylki í Garðabæ:
Sextán ára strákur
stal senunni
Í BANASTUÐI Steinþór Freyr átti enn einn stórleikinn fyrir Stjörnuna í gær. Stjarnan
vann þrátt fyrir að vera manni færri. FRÉTTABLAÐIÐ/ANTON