Kirkjuritið - 01.09.1948, Side 5

Rís upp,
Rís upp af knébeði, eldvígður guðlegum anda.
Alfaðir kallar þig. — Heimsbyggðin öll er í vanda.
Bræður um völd
berjast, hin friðvana öld
guðsríki’ á jörðu vill granda.
Gakk út í starfið, til fylgdar við frelsarann lýða.
Fyrir hið blessaða málefni gott er að stríða.
Helstefnan hörð
herjar nú víða um jörð,
gereyðing landa og lýða.
Gakk út í starfið, því akrarnir ósánir bíða;
undirnar helþjáðu mannkyni blæða og svíða.
Hagvilltri hjörð
hljómi um gjörvalla jörð
hrópið, sem hirðarnir þýða!
Gakk út í stríðið, til fórnandi dyggða og dáða.
Drottinn mun styrkja þig veikan og ferðinni ráða.
Sáðmanna sveit,
sólin Guðs miskunnar heit
ylja mun akrana sáða.