Ægir - 01.08.1986, Page 6

HAFNARFJÖRÐUR
- Útgerðarbær -
Eftir Sigurð Pétursson
Saga Hafnarfjarðar er samofin sögu siglinga, verslunar og
útgerðar hér á landi. Fjörðurinn var um aldir helsta viðkomuhöfn
erlendra skipa sem til landsins sigldu. Þar hefur æ síðan verið
stunduð verslun með fiskafurðir landsmanna. í Hafnarfirði fóru
fram fyrstu tilraunir til útgerðar þilskipa hér við land, og þar var
rekin fyrsta þilskipaútgerðin af íslenskum manni, sem barárangur.
Einni öld síðar fóstraði svo Hafnarfjörður útgerð fyrsta togarans í
eigu landsmanna. íslensk stórútgerð fólst í skútum á öldinni sem
leið og togurum á þessari öld, og var Hafnarfjörður vettvangur
beggja. Þilskip og togarar hafa byggt upp Hafnarfjörð.
Hafnarfjörður hefur verið með stærstu bæjum landsins alla
þessa öld. Þar hafa miklar sveiflur orðið í atvinnumálum. Fyrri
hluta aldarinnar réðu erlend útgerðarfyrirtæki mestu í atvinnulífi
bæjarins, en síðan tók bæjarútgerð við því hlutverki. Gengi bæjar-
búa hefur verið nátengt afkomu útgerðar og fiskvinnslu fram eftir
öldinni.
Nú er rekin í Hafnarfirði útgerð báta, stórra og smárra. Auk þess
eru starfandi í bænum fjöldi þjónustufyrirtækja, sem eiga sér langa
hefð og þróast hafa með sjávarútveginum. Á síðustu árum hafa
ennfremur komið fram nýjar aðferðir til fullvinnslu sjávarafurða,
og starfa nokkur slík fyrirtæki í Hafnarfirði. Sjávarútvegur og iðn-
aður tengdur honum, er einn af máttarstólpum atvinnulífs í
bænum enn þann dag í dag.
í þessu hefti verður rakin saga Haínarfjarðar á fyrri öldum og
útgerð þilskipa og togara frá bænum sem varð til við fjörðinn um
miðja síðustu öld. Seinna gefst vonandi tækifæri til að gera grein
fyrir fiskvinnslu, skipasmíðum og fleiri greinum sem tengjast
útgerðinni og úrvinnslu aflans sem hafnfirskir sjómenn hafa lagt á
land og leggja enn.
450 - ÆGIR