Birtingur - 01.06.1962, Síða 13

9. María frá Múla. í þjóðminjasafninu í Kaupmannahöfn er allstór altarisskápur frá
Múla í Aðaldal með Maríu mey og barninu. Borið saman við Maríumyndina frá Skarði,
er öll túlkunin farin að mýkjast; fellingar klæðanna fylgja líkamsformunum í hægri en
tignarlegri hrynjandi; á andliti Maríu vottar fyrir brosi, og barnið á armi hennar er ekki
lengur alvitur, smækkaður öldungur, þótt það rétti enn upp höndina til blessunar.
Að vísu ber og María sjálf enn kórónu, og veldissproti hefur staðið í greip hennar, en
allt að einu er hún á góðri leið að verða ímynd mennskrar konu, svo sem og varð í fyllingu
gotneska stílsins. Myndin er því tímamótaverk, heldur mörgum ytri einkennum hins
gamla rómanska stíls, en innileikinn, tilfinningaleg nálægð listamannsins, er af hreinum
gotneskum toga. Myndirnar sem verið hafa innan á skáphurðunum eru nú aldeilis máðar.