Ljósmæðrablaðið - 01.07.1988, Blaðsíða 16

16
LJÓSMÆÐRABLAÐIÐ
Hildur Kristjánsdóttir, formaður LMFÍ:
SKÝRSLA frá
fulltrúaráðsfundi NJF
10.-11. júní 1988.
Fundur var settur í fundarsal Norska ljósmæðrafélagsins í Osló.
Fyrsta mál á dagskrá var að samþykkja dagskrá fundarins og var það
gert. Næst var farið yfir fundargerð frá fundinum í Þórshöfn 29. maí
1987 og var hún samþykkt með smávægilegum breytingum sem voru
aðallega vegna tungumálamisskilnings.
Svo var farið yfir þátttakendalista og heimilisföng og símanúmer
leiðrétt. Næsta mál á dagskrá var að fara yfir upplýsingaskema N.J.F.
en ekki reyndist unnt að gera það þar sem aðeins Island og Finnland
höfðu sent inn breytingar frá fyrra ári. Var þessu því frestað.
Þá var komið að því að fulltrúar landanna flyttu skýrslur stjórna
sinna. Þessar skýrslur liggja frammi á skrifstofu félagsins og geta
félagsmenn kynnt sér þær þar. Eg mun aðeins drepa á helstu atriði
þeirra hér.
Noregur:
Skrifstofa félagsins er nú opin 4 daga í viku og hafa þær nýlega
tölvuvætt allt hjá sér, sem hefur haft í för með sér gífurlega vinnu.
Þær breyttu útliti fagritsins síns á þessu ári og mælist það mjög vel
fyrir. ,,Vil ég hvetja ljósmæður til að lesa þetta blað. Það er mjög
faglegt og skemmtilegt“ (Innskot fulltrúa LMFÍ). Áskrift kostar nú
250 kr. norskar á ári og er ekki innifalin í félagsgjöldum ljósmæðra.
Norska ljósmæðrafélagið hefur ekki samningsrétt heldur félagasamtök
þau sem þær tilheyra. Veldur þetta þeim miklum vandræðum og er
mesta baráttumál þeirra sem stendur.
ÍSLAND:
Fulltrúi Islands sagði frá afmæli LMSI og gjöf félagsins til hans.