Litli Bergþór - 01.12.2008, Page 4

Formannspistill
Ræða formanns í tilefni 100 ára afmælis félagsins.
Allt frá stofnun Ungmennafélagsins hefur umhverfis-,
náttúruvernd og skógrækt skipað stóran sess í vitund
og framtíð félagsmanna og er þá ekki óeðlilegt á þess-
um merku tímamótum að velta fyrir sér framtíðinni.
Þeir voru frekar þurrir og kaldir þessir fyrstu dagar
aprílmánaðar en voru þó sólríkir, bjartir og fjöllin í
fjarska snævi þakin og útlínur þeirra skýrar. Loftið
hreint og tært, ásýnd landsins geysilega fögur, sann-
kallað gluggaveður. Sjálfsagt hafið þið, ágætu gestir,
tekið eftir þessu, en getum við treyst því að svo verði
um ókomin ár. Hvað ef við horfum nú langt til fram-
tíðar, 80 - 100 ár fram í tímann, hversu raunhæfa
mynd getum við gert okkur af landi og þjóð. Við höf-
um jú ákveðnar væntingar, vonir og óskir til þeirra sem
samfélagið mótar og leiðir á þeim tíma, en myndin
kannski að hluta til mótuð af því sem við sjálf höfum
upplifað og notið, og vonandi metið að verðleikum.
Þrengjum nú hugann og hugsum um það sveitasam-
félag sem við þekkjum og lifum í, allt það sem við njót-
um af landsins gæðum, og það sem samfélagið okkar
hefur byggt upp til eflingar og hagsbóta fyrir okkur öll
í leik og starfi. Vonandi verður samtakamáttur með
okkur á komandi tíð.
I árdaga síðustu aldar voru aðstæður allar mjög ólíkar
þeirri mynd og reynd sem er í dag. Samfélagið frekar
einhæft og fábrotið atvinnu- og menningarlega séð. í
mörgu tilliti hafði verið um litlar breytingar á sam-
félaginu um langa hríð t.d. var húsnæði til sveita að
mestu úr torfi og grjóti, aðstæður fólks oft ansi krappar
í okkar, oft á tíðum, harðbýla landi. En það hlaut að
koma sá tími að þjóðfélagið tæki breytingum. Fólkið
sem hafði lifað fram til þessa svo fábrotnu lífi, var
efniviður til þess.
Það var vissulega vor í vændum. Nýir straumar í
upphafi tuttugustu aldar bárust ótrúlega hratt um
landið, og á vissan hátt má líkja því við neista, svo
hratt breiddist hann um landið.
Já heiðraða samkoma, hér er ég að tala um hvatann
og upphaf að stofnun ungmennafélaganna og þann
mikla eldmóð sem þar fór af stað. Fyrst í þeim leið-
togum sem þar fóru fyrir og ruddu brautina til nýrra
tíma, opnuðu augu fólks og hvöttu það til þess að
sækja fram, taka þátt og vera með. Félagsskapur sem
fór að beita sér á svo marga vegu í samfélaginu. Má
þar meðal annars nefna málfundafélög, íþróttafélög,
skógrækt, garðrækt, bókasöfn og hvatningu til mennt-
unar.
Það var úr þessum jarðvegi og frá þessum straumum
sem Ungmennafélag Biskupstungna varð til, reyndar
með sameiningu tveggja félaga, Unglingafélags
Eystritungunnar stofnað 1906 og Málfundarfélagi
Ytritungunnar, sem líklega var stofnað 1907.
Ungmennafélagið var eitt af ellefu félögum sem stofn-
að var á núverandi sambandssvæði HSK en fjöldinn
segir töluvert um þá grósku sem var í uppbyggingu
ungmennafélaganna á þessum árum.
Sjálfsagt er að geta þeirra strauma og krafta sem
komu frá íþróttaskóla Sigurðar Greipssonar í Haukadal
sem rekinn var í nteira en fjóra áratugi, því fjölmargir
ungir menn hér úr sveit fóru í þann skóla. Þar fengu
þeir aukið þol og kraft og uppskáru ríkulega um gildi
íþrótta og hollrar hreyfingar. Sannarlega hafa síðustu
hundrað ár verið tími mikilla breytinga og hefur
félagið lagt sig fram um að aðlagast aðstæðum á hverj-
um tíma og með því skapað aðstæður sem henta til
íþróttaiðkunar og félagsstarfs á breiðum grunni.
Félagið hefur frá 1990 verið rekið sem deilda-
skipt, þ.e. íþróttadeild, leikdeild, skógræktardeild og
útgáfunefnd sem sér um útgáfu blaðs félagsins, Litla-
Bergþórs. Aðaldeildin er síðan líkt og regnhlíf yfir
þessum deildum.
Ungmennafélagið hefur ávallt haft á að skipa
framsæknum og ötulum liðsmönnum og stjórnendum
sem hafa beitt sér fyrir samfélagslegum framfara-
málum og uppbyggingu mannvirkja í sveitarfélaginu
s.s. bókasafni, sundlaug, félagsheimili, fótboltavelli,
íþróttahúsi, plöntun trjáa í reit félagsins, staðið fyrir
hverskonar samkomum s.s spilakvöldum, fræðslu-
fundum, ferðum á íþróttamót og dansleikjum. Samstarf
við nágrannafélög hefur einnig verið gott í keppni, leik
og starfi.
Stór þáttur í þessari uppbyggingu allri er samtaka-
mátturinn og kraftur hans til þess að skapa og bæta.
Vil ég með þessum orðum þakka öllum félagsmönnum
fyrr og nú, fyrir þeirra mikla vinnuframlag og um-
hyggju fyrir æskunni og reyndar samfélaginu öllu.
Mig langar einnig til þess að nýta tækifærið og þakka
velvild og stuðning margra rekstraraðila sem hafa stutt
við störf Ungmennafélagsins og sýnt með þeim hætti
hug sinn til félagsins. Ósk mín til félagsins er að það
megi um ókomin ár starfa með reisn og styðja æsku
sveitarinnar til hollrar hreyfingar og andlegs þroska
svo að sveitin dafni.
Það hefur sannarlega verið gaman að vera þátttakandi í
þeim viðburðum sem staðið var fyrir í tilefni afmælis
félagsins. Vil ég þakka afmælisnefndinni sérstaklega
ánægjulegt samstarf en nefndin hefur haft veg og
vanda af þeim uppákomum og skemmtunum. Ég vil
ennfremur þakka þeim fjölmörgu sem fögnuðu og
glöddust með okkur á afmælishátíðinni og fyrir hönd
félagsins vil ég þakka fyrir hlý orð og góðar gjafir sem
félaginu bárust.
Ég vil óska lesendum og velunnurum félagsins gleði-
legra jóla og farsældar á nýju ári og þakka fyrir við-
burðaríkt ár.
Kveðja, Guttormur Bjarnason, formaður Umf. Bisk.
Litli Bergþór 4