Fréttablaðið - 27.12.2012, Side 18

27. desember 2012 FIMMTUDAGUR| HELGIN | 18
BREIVIK FYRIR RÉTTI Norski hryðjuverkamaðurinn Anders Behring Breivik brast í grát við réttarhöldin
í Ósló, ekki vegna fjöldamorðanna sem hann framdi heldur þótti honum eigið áróðursmyndband svo
áhrifaríkt þegar það var sýnt í dómsalnum.
SPRENGJUR Á GASA Árásir Ísraela á Gasa dagana 14. til 21. nóvember kostuðu allt að 170 Palestínumenn
lífið. Rúmri viku eftir að samið var um vopnahlé samþykkti allsherjarþing Sameinuðu þjóðanna að veita
Palestínuríki áheyrnaraðild.
BARIST Í SÝRLANDI Átökin í Sýrlandi hafa orðið blóðugri og mannskæðari með hverjum mánuðinum. Liðsmenn sýrlenska uppreisnarhersins skýla sér þarna fyrir árásum í borginni Aleppo og reyna að hjálpa særðum
félaga sínum. Alls hafa átökin kostað meira en 40 þúsund manns lífið og hundruð þúsunda hafa flúið land.
SKEMMTIFERÐASKIP STRANDAÐ Ítalska skemmtiferðaskipið Costa Concordia strandaði rétt hjá
höfninni á ítölsku eyjunni Isola del Giglio hinn 17. janúar. Um borð voru meira en fjögur þúsund manns,
og fórust 32 þeirra.
SUU KYI Á ÞINGI Aung San Suu Kyi, leiðtogi stjórnarandstöðunnar í Búrma, var kosin á þing á þessu ári
eftir að hafa setið í stofufangelsi meira og minna í tvo áratugi. Hún fékk einnig leyfi til að fara til Noregs að
taka við friðarverðlaunum Nóbels, sem henni voru úthlutuð árið 1991. Herforingjastjórnin í Búrma hefur
gert ýmsar umbætur í lýðræðisátt og uppskorið fyrir vikið velvild frá Bandaríkjunum og fleiri löndum heims.