Dagblaðið Vísir - DV - 07.05.2007, Blaðsíða 8

mánudagur 7. maí 20078 Fréttir DV
HERINN TAKMARKAR
BLOGG HERMANNA
Í tölvupósti sem hermaður í Írak
sendi herfélaga sínum í Bandaríkj-
unum, sem er á leið til landsins,
koma fram upplýsingar um hvaða
aðferðum hermenn beita til að
finna sprengjur sem íraskir upp-
reisnarmenn hafa komið fyrir. Þetta
er alls ekki eina dæmið um hvern-
ig hermenn hafa ljóstrað upp um
hernaðarleg leyndarmál í tölvu-
póstum eða á bloggsíðum. Banda-
ríska varnarmálaráðuneytið hefur
því sett strangar reglur um tölvu-
samskipti hermanna við umheim-
inn.
Bölva banninu
Yfirmenn herdeilda verða sam-
kvæmt nýju reglunum að gefa
grænt ljós á allt það sem undir-
menn þeirra skrifa á bloggsíður.
Þeir sem óhlýðnast því og skrifa til
dæmis um staðsetningu ákveðinna
hersveita, fyrirhugaðar aðgerðir
eða birta myndir frá störfum sín-
um verður refsað. Samkvæmt frétt
breska blaðsins The Guardian gætir
mikillar óánægju meðal hermanna
með bannið. Þeir telja neikvæð
skrif sín um herinn og efasemd-
ir um fullyrðingar George W. Bush
Bandaríkjaforseta um góðan árang-
ur hersins í Írak vera ástæðuna fyr-
ir því. Umsjónarmaður vinsællar
hermannabloggsíðu segir bannið
óframkvæmanlegt og að þeir sem
eru ósáttir við það muni finna leið-
ir til að komast í kringum það. Rit-
stjóri bókar sem byggð er á blogg-
skrifum hermanna í Írak gagnrýnir
einnig bannið og bendir á að frá-
sagnir hermannanna séu í raun já-
kvæðasta umfjöllunin sem herinn
fái um störf sín í Írak og Afganist-
an. Samkvæmt fréttinni er netnotk-
un bandarískra hermanna í Írak og
Afganistan mjög mikil.
Persónuleg bréf eru einkamál
Þótt reglurnar kveði á um að yf-
irmenn skoði alla tölvupósta og
bloggskrif þá segir einn stjórnenda
hersins, sem kom að gerð regln-
anna, ekki mögulegt að halda úti
svo miklu eftirliti. Tölvupóstur her-
manna verði því ekki lesinn yfir
enda séu skrif hermanna til fjöl-
skyldu sinnar og vina einkamál.
Þeir sem ætla að opna bloggsíðu
verða hins vegar að ráðfæra sig við
yfirmenn sína. Hann segir traust
ríkja til hermanna um að þeir haldi
trúnað og opinberi ekki hernaðar-
leg leyndarmál en þeir sem verða
uppvísir um slíkt eiga á hættu að
verða stefnt fyrir herrétt.
Skrif ættingja einnig bönnuð
Í tímaritinu Wired er fullyrt að
bannið nái einnig til fyrrverandi
hermanna, starfsmanna hersins,
verktaka og jafnvel fjölskyldna
þeirra. Bent er á að aðeins hluti
þessa hóps hafi aðgang að upplýs-
ingum um reglurnar á tölvukerfi
bandaríska varnarmálaráðuneyt-
isins og geti því ekki kynnt sér um-
fang þeirra. Í grein blaðsins kem-
ur fram að yfirvöld hafi í seinni
heimsstyrjöldinni lesið bréf her-
manna og ritskoðað ef tilefni var
til. Munurinn sé hins vegar sá að
í dag hafa óvinir og leyniþjónust-
ur erlendra ríkja aðgang að skrif-
unum í gegnum bloggsíður og
tölvupósta. Haft er eftir einum yf-
irmanni hersins í blaðinu að hann
telji reglurnar óþarfar og nær væri
að nýta baráttukraft hermannanna
á ritvellinum á sama hátt og á víg-
vellinum enda væru raddir þeirra
trúverðugasti fréttamiðillinn og
full þörf fyrir að þær heyrðust.
Frá upphafi innrásarinnar í Írak
Bandarískir hermenn í
Írak verða hér eftir að leita
samþykkis yfirmanna
sinna fyrir skrifum sínum
á bloggsíður. Stjórn hersins
óttast að uppreisnarmenn
fái ítarlegar upplýsingar
um starfsemi hans í gegn-
um blogg og tölvupóst her-
manna. Þeir hafa brugðist
illa við banninu.
Hermenn við tölvur Skrif bandarískra
hermanna á bloggsíður og í tölvupóst-
um valda yfirmönnum þeirra áhyggjum.
Bókin The Blog of War Byggð á
frásögnum hermanna af störfum
sínum í írak og afganistan.
Einnig fylgst með skrif-
um fyrrverandi her-
manna og ættingja.