Fréttablaðið - 10.06.2014, Qupperneq 2

10. júní 2014 ÞRIÐJUDAGUR| FRÉTTIR | 2
SPURNING DAGSINS
Kringlunni
heyrnarstodin.is
HEYRNARSTÖ‹IN
Sigrún, vill Þingvallanefnd
nokkuð taka fætur undan
tröðkurunum?
„Við viljum bara að þeir stígi léttar
til jarðar.“
Sigrún Magnúsdóttir, formaður Þingvalla-
nefndar, sagði að nefndin ætli sér að laga
troðning á Þingvöllum, en í Almannagjá hafa
myndast stór sár á fjölförnum gönguleiðum.
STJÓRNMÁL Sveinbjörg Birna
Sveinbjörnsdóttir, nýkjörinn
borgarfulltrúi Framsóknar og
flugvallarvina í Reykjavík, segir
ömurlegt að múslimar hafi verið
dregnir inn í umræðuna fyrir
kosningar. Þetta kom fram í þætt-
inum Eyjunni á Stöð 2 á hvíta-
sunnudag.
„Þetta hefur snúist upp í bara
hreinan viðbjóð þessi umræða
og það hefur aldrei verið ætlunin
hjá okkur að þessi umræða færi á
þessa leið.“
Í þættinum sagði Guðfinna
Jóhanna Guðmundsdóttir, sem
skipaði annað sæti á eftir Svein-
björgu og var einnig kjörin borg-
arfulltrúi, að moskumálið hafi
einungis snúist um deiliskipu-
lagsmál. Ekki væri við að hæfi
að á þessari lóð í Sogamýri risi
nokkurt bænahús, hvorki moska
né kirkja.
Upphaf moskumálsins má
meðal annars rekja til ummæla
Sveinbjargar á Vísi 23. maí síð-
astliðinn. „Ég trúi því að allir
eigi að geta iðkað sína trú. En
mér finnst ekki rétt að múslimar
eða önnur trúfélög fái lóðir undir
byggingu moskna eða sambæri-
legra húsa,“ sagði Sveinbjörg
og bætti við. „Við erum búin að
búa hér í sátt og samlyndi frá
landnámi. Fyrst var það ásatrú,
síðan komu siðaskiptin – allir
þekkja þessa sögu. Ég tel bara að
á meðan við erum með þjóðkirkju
eigi sveitarfélög ekki að úthluta
lóðum til byggingu húsa eins og
mosku.“ - gar
Nýkjörinn borgarfulltrúi Framsóknarflokks segir umræðuna um moskumálið „hreinan viðbjóð“:
Ætluðu umræðunni ekki að fara þessa leið
MOSKUMÁLIÐ „Ég hef fengið
tölvupóst frá fólki sem spyr
hvernig það eigi að skrá sig í
félagið. Ég var svolítið hissa en
mjög ánægður með þær fyrir-
spurnir,“ segir Salmann Tamimi,
trúarleiðtogi múslima á Íslandi.
Gunnar Smári Egilsson, fyrr-
verandi ritstjóri Fréttablaðsins,
sagðist, í pistli á Facebook-síðu
sinni í gær, velta fyrir sér að
skrá sig í Félag múslima á Íslandi.
Þannig myndu sóknargjöld hans,
sem er utan trúfélags, renna til
Félags múslima en ekki vera ráð-
stafað af fjárlaganefnd Alþingis.
„Þar er nú formaður Vigdís
Hauksdóttir, helsti hugmynda-
fræðingurinn að baki andmann-
úðarstefnu Framsóknarflokks-
ins. Ég efast um að Vigdísi muni
um mínar 9.000 krónur á ári; en
ég er samt að hugsa um að skrá
mig í Félag múslima á Íslandi svo
félagsfólkið þar geti notað þessa
þúsundkalla til að verjast árás-
um og lygum Framsóknarmanna
og fylgismanna þeirra,“ skrifar
Gunnar.
Samkvæmt lögum Félags músl-
ima á Íslandi geta þeir sem eru
sammála markmiðum þess gerst
félagar.
„Það er ekkert skilyrði að vera
múslimi til að vera meðlimur og
það eru náttúrulega allir vel-
komnir,“ segir Salmann. „En mér
finnst betra að fólk haldi sig við
sína trú. Í kristindómi er rými til
að berjast fyrir mannréttindum
annarra. Það var ekki þjóðkirkj-
an sem hóf þessa umræðu þannig
að ég mæli með því að fólk skrái
sig frekar úr Framsóknarflokkn-
um og láti hann finna fyrir því.“
Salmann harmar umræðuna að
undanförnu. Þar hafi lítill hópur
andsnúinn mannréttindum hátt.
„Það sorglegasta er að elsti
stjórnmálaflokkur landsins skuli
hafa verið fánaberi þessa óhugn-
anlega stríðs. Ég er búinn að búa
hér í 45 ár og þekki bara góða
Íslendinga. En inn á milli eru
nokkrir sjúklingar sem þarf að
lækna. Við erum lítið samfélag og
megum ekki við því að fólki sé att
saman,“ segir Salmann.
Agnes M. Sigurðardóttir, bisk-
ups Íslands, segir umræðu um
mosku á villigötum.
„Umræðan er á villigötum ef
við hrópum og byggjum skoðanir
okkar á fordómum í staðinn fyrir
að kynna okkur málin. Það sem ég
hef lesið ber keim af því að fólk hafi
heyrt fréttir utan úr heimi sem eru
ekki beint jákvæðar í garð mús-
lima. Mér finnst það frekar þann-
ig en að fólk hafi kynnt sér málin.
Mér finnst slæmt þegar fólk bygg-
ir skoðanir sínar á fyrirfram gefn-
um forsendum sem það hefur ekki
kannað til hlítar,“ segir biskup.
Agnes segir einfalt að skrá sig
í og úr trúfélagi á Íslandi. Fólk
sæki sér einfaldlega viðeigandi
eyðublöð á vef Þjóðskrár. Hún vill
lítið tjá sig um sína skoðun á því
ef rétt reynist að landsmenn skrái
sig í viss trúfélög í mótmælaskyni.
„Það er einkamál hvers og eins
hvort hann skráir sig í trúfélag eða
úr því. Ég hef í raun ekki meira um
það að segja.“ liljakatrin@frettabladid.is
Íhugar að ganga til
liðs við Félag múslima
Salmann Tamimi segir aukinn áhuga á Félagi múslima. Gunnar Smári Egilsson
íhugar að ganga í félagið til að styrkja það „til að verjast lygum framsóknar-
manna“. Agnes M. Sigurðardóttir biskup segir umræðuna um mosku á villigötum.
VATÍKANIÐ, AP Frans páfi tók vel á móti Mahmoud Abbas, forseta Pal-
estínu, og Shimon Peres, forseta Ísraels, í Vatíkaninu um helgina.
Frans bauð leiðtogunum tveimur til Páfagarðs þegar hann heimsótti
Mið-Austurlönd fyrir tveimur vikum. Leiðtogunum var boðið til þess
að þeir gætu beðið fyrir friði í átökum Palestínu og Ísraels í samein-
ingu.
Til að forðast ágreining báðu forsetarnir og páfi hver til síns guðs.
Fyrst í nafni gyðingdóms, því næst í nafni kristinnar trúar, og loks í
nafni islam. Er þetta í fyrsta sinn sem islam er iðkað í Páfagarði. - kóh
Forsetar Palestínu og Ísraels fóru í heimsókn til Vatíkansins:
Andstæðingar báðu fyrir friði
GESTUR Í EYJUNNI Borgarfulltrúnn
Sveinbjörg Birna Sveinbjörnsdóttir var
gestur í þætti Björns Inga Hrafnssonar á
sunnudag. MYND/STÖÐ 2
Það var ekki þjóðkirkj-
an sem hóf þessa umræðu
þannig að ég mæli með því
að fólk skrái sig frekar úr
Framsóknarflokknum og láti
hann finna fyrir því.
Salmann Tamimi
ÞAKKAR STUÐNINGINN Salmann segir alla velkomna í Félag múslima á Íslandi.
FRÉTTABLAÐIÐ/ANTON BRINK
FORUSTUMENN Mahmoud Abbas, Frans páfi og Shimon Peres ganga til bænahalds
í Vatíkaninu um helgina. Þjóðar- og trúarleiðtogarnir þrír komu þá saman til þess að
biðja fyrir friði; hver ákallaði sinn guð. FRÉTTABLAÐIÐ/AFP
MEINDÝR „Passið ykkur á rottunum, þær gætu bitið
ykkur,“ er ráðlegging Ragnheiðar Kolfinnu Magnús-
dóttur, tæplega sjö ára stúlku sem á hvítasunnudag
var bitin af rottu við heimili sitt í Hlíðunum í Reykja-
vík.
Rottur hafa undanfarið sýnt sig á óvenjulegum stöð-
um og hrellt fólk í borginni með stuttu millibili. Í tví-
gang hafa börn verið bitin. Í lok síðasta mánaðar var
unglingspiltur bitinn til blóðs í fingurinn af rottu í
Vesturbænum. Í fyrradagsást rotta skokka á bökk-
um Vesturbæjarlaugarinnar og sama dag var Ragn-
heiður bitin.
„Ég prófaði að fara niður að skoða hana. Þá kom
hún og beit mig,“ segir Kolfinna, reynslunni ríkari.
Þessi óvinsælu nagdýr finnast í ræsum um alla
Reykjavíkurborg að undanskildum nýrri hverfum
eins og Grafarvogi. Gömul hverfi eru helst útsett
fyrir rottugangi og tilfelli þar sem dýrin gera sér
hreiður uppi í risi finnast þar sem enginn er umgang-
ur í gömlum húsum og ónýtar lagnir.
Meindýraeyðir hjá Reykjavíkurborg segir að fólk
eigi alls ekki að koma nálægt dýrunum verði það
þeirra vart.
„Rottur finnast þar sem er bilun í skolplögnum
og niðurfall opið eða slíkt. Þá er það ávísun upp á
að þessi kvikindi geta komið upp á yfirborðið,“ segir
Ómar F. Dabney. „Ég hvet bara fólk, ef það er að sjá
þessi dýr og ég tala nú ekki um að brýna fyrir börn-
um, að koma ekki nálægt þeim. Vegna þess að ef þú
ert að teygja þig í þær, að reyna að klappa þeim eða
koma við þær, þá bíta þær alveg pottþétt.“ - lb
Rottur stálu senunni í góðviðrinu um hvítasunnuna í höfuðborginni:
Bitið barn varar við rottunum
RAGNHEIÐUR KOLFINNA MAGNÚSDÓTTIR Skoðaði rottu
sem beit hana síðan. MYND/STÖÐ 2
BJÖRGUN Björgunarsveitin
Berserkir í Stykkishólmi var
kölluð út í gærkvöldi til að
bjarga skipverja sem var fastur
í vélarvana bát við Langeyjar í
Breiðafirði.
Björgunarbáturinn Guð-
finna dró bátinn fyrsta spölinn
en vélarvana báturinn þótti í
þyngra lagi fyrir Guðfinnu. Því
tók stærri fiskibátur að sér að
draga bátinn síðasta spölinn til
hafnar í Stykkishólmi.
Ekki var um mikla hættu
að ræða enda var gott veður á
svæðinu. - ih
Björgunarsveitin kölluð út:
Vélarvana bátur
við Langeyjar
VÍSINDI Rottur finna fyrir eftirsjá
eins og mannfólkið. Vísindamenn
við Háskólann í Minneapolis kom-
ust að þessum niðurstöðum en þeir
settu rottur í völundarhús sem
geymdi ýmsar tegundir af mat.
Þegar rottan kom að matnum
gat hún valið um að bíða litla stund
eftir því að fá að borða eða leita
annars matar, sem varð til þess að
rottan þurfti að bíða lengur.
Þegar óþolinmæði rottu varð til
þess að hún þurfti að bíða lengur
var greinilegt á heilabylgjum og
athæfi rottunnar að hún upplifði
eftirsjá. - kóh
Geta harmað eigin gjörðir:
Rottur finna
fyrir eftirsjá