Fréttablaðið - 07.08.2014, Blaðsíða 10
7. ágúst 2014 FIMMTUDAGUR| FRÉTTIR | 10
TÍMINN NÝTTUR Það hefur viðrað vel í höfuðborginni undanfarna daga. Þau Helgi Grétar Kristinsson, Arnar Óskarsson, Unnur
Malín Sigurðardóttir og Ævar Örn Bragason nýttu tímann til að mála verk eftir Erró á vegg hússins við Álftahóla 4-6 í dag.
FRÉTTABLAÐIÐ /GVA
Verk Errós tekur á sig mynd í Breiðholti
Vígamenn hörfa frá Líbanon
1 LÍBANON Hluti þeirra sýrlensku uppreisnarmanna sem náðu bænum Arsal í Líbanon á sitt vald í síðustu viku hefur nú yfirgefið bæinn. Sólarhrings
vopnahléi var lýst yfir á svæðinu í gær en fyrri tilraunir til vopnahlés hafa farið
út um þúfur. Stjórnvöld í Sádi-Arabíu hyggjast veita einn milljarð Bandaríkja-
dala til að styrkja líbanska herinn í baráttunni við vígamennina. Tugþúsundir
almennra líbanskra borgara og sýrlenskra flóttamanna eru fastir í borgum og
bæjum á bardagasvæðinu.
Hryðjuverkaárás í Bagdad
2 ÍRAK Tvær bílsprengjur sprungu í Bagdad í hverfi sem er að mestu byggt sjítum í gærkvöldi. Samkvæmt íröskum yfirvöldum létust 27 í árásunum. Hryðjuverka-
samtökin ISIS hafa verið í mikilli sókn í norðurhluta Íraks en þau náðu borginni
Mósúl undir sína stjórn fyrr í sumar. ISIS-samtökunum er stýrt af súnnítum.
Coulson kærður fyrir meinsæri
3 BRETLAND Andy Coulson, fyrrverandi ritstjóri breska blaðsins News of the World, hefur verið kærður fyrir að ljúga í réttarsal. Coulson bar vitni
í réttarhöldum yfir skoska þingmanninum Tommy Sheridan. Fyrr í sumar var
Coulson dæmdur í átján mánaða fangelsi fyrir símhleranir News of the World.
Blaðið hleraði síma fjölda þekktra einstaklinga. Coulson var einn ráðgjafa
Davids Cameron, forsætisráðherra Bretlands, en Cameron rak Coulson úr starfi
vegna hlerunarmálsins.
Havaí í hættu
4 BANDARÍKIN Íbúar á Havaí búa sig nú undir tvo hitabeltisstorma sem riðið gætu yfir eyjaklasann á næstu dögum. Vatn, klósettpappír og aðrar
nauðsynjar hafa rokið úr hillum verslana og óttast eyjaskeggjar hið versta.
Óalgengt er að stormar eða fellibyljir ríði yfir eyjarnar. „Havaí er lítið skotmark
í stóru hafi,“ sagði Eric Lau, veðurfræðingur bandarísku veðurstofunnar á
Honolúlú. Aðeins þrír hitabeltisstormar hafa farið yfir eyjarnar frá árinu 1950.
HEIMURINN
1 2
3
4