Neytendablaðið - 01.03.2009, Blaðsíða 14

Sala á sambyggðum tækjum með prentara, ljósritunarvél, skanna,
faxi og fleiri möguleikum hefur aukist verulega undanfarin
misseri. Tækin eru enda flest þægileg og uppfylla kröfur margra
neytenda. En fjöldi gerða er mikill og ráðlegt að kanna rækilega
úrvalið áður en kaup eru gerð. Röng ákvörðun getur valdið
vonbrigðum og kostað meira fé en ástæða er til.
Markaðskönnun
Neytendablaðið gerði í febrúar markaðskönnun á þeim fjórum
flokkum tækja sem almenningur, fyrirtæki, samtök og stofnanir
nota gjarnan til að prenta skjöl og ljósmyndir á pappír í stað þess
að fara með verkin í prentsmiðju eða ljósmyndaþjónustu. Sum
tækin geta gert fleira en að prenta og önnur geta prentað á fleira en
pappír. Á íslenska markaðnum reyndust vera alls 109 gerðir tækja
í fyrrnefndum fjórum flokkum. Verðbilið er geysilega mikið sem
sýnir ekki bara að tækin eru misjafnlega vönduð og endingargóð
heldur ekki síður hve mismunandi fjölhæf þau eru.
Bleksprautuprentarar (inkjet printers)
40 gerðir af bleksprautuprenturum voru á markaði hérlendis. Sá
dýrasti var 13 sinnum dýrari en sá ódýrasti. Ódýrastur var HP
DeskJet 2560 á kr. 6.495 í Elko en dýrastur Canon Pixma PRO 9000
á kr. 84.995 í Elko.
Geislaprentarar (laser printers)
36 gerðir af geislaprenturum voru á markaðnum. Sá dýrasti var
næstum 16 sinnum dýrari en sá ódýrasti. Ódýrastur var Konica
Minolta PagePro 1400w sem kostaði kr. 13.900 í Kjaran en dýrastur
Konica Minolta MagiColor 5450 á kr. 219.000 í Kjaran.
Fjölnotatæki (multifunction devices/printers, MFD/MFP)
18 gerðir af fjölnotatækjum voru á markaðnum. Þessi tæki eru
yfirleitt sambyggður prentari, ljósritunarvél og skanni. Dýrasta
tækið var fjórum sinnum dýrara en hið ódýrasta. Ódýrast var Canon
MP 240 sem kostaði kr. 15.900 í Nýherja en dýrast Samsung CLX-
3160N á kr. 69.900 í Ormsson.
Öll-í-einu (all-in-one)
15 gerðir af öllum-í-einu voru á markaðnum. Þessi tæki eru
sambyggður prentari, ljósritunarvél, skanni og oft fax og jafnvel enn
fleiri kostir. Dýrasta tækið var 13 sinnum dýrara en hið ódýrasta.
Ódýrast var Canon MX 300 sem kostaði kr. 19.900 í Nýherja en
dýrast Dell 2335 dn á kr. 267.400 í EJS.
Markaðskönnunin er birt í heild sinni á www.ns.is. Þar koma fram
vörumerki og tegundarheiti, verð og seljandi, en einnig hvort hægt
er að nota prentarann þráðlaust og nettengdan, hvort hann getur
prentað báðum megin á blaðið í sömu umferð og hvort hann getur
prentað af minniskorti án þess að nota tölvu til samskipta.
Gæðakönnunin
Í gagnasafni International Consumer Research and Testing
(ICRT) eru niðurstöður gæðakannana á prenturum og tækjum af
því tagi sem hér eru til umfjöllunar frá árunum 2008 og 2009.
Gagnasafnið nær til 70 prentara og af þeim voru 13 á markaði
hérlendis í febrúar. Nokkrar niðurstöður varðandi þá eru birtar
hér í töflu. Þegar á heildina er litið eru prentgæði viðunandi hjá
nær öllum gerðum þeirra tækja sem hér um ræðir nema helst hjá
sumum hinna allra ódýrustu. Ekkert af sambyggðu tækjunum skilar
öllum möguleikum mjög vel og sum þeirra eru verulega hægvirk,
sérstaklega í litljósmyndaprentun.
Kostnaðurinn
Áður en prentari er keyptur ætti að kanna hvort henti betur
sambyggt tæki (margnotatæki, fjölnotatæki, öll-í-einu) eða bara
prentari og hvað varðar verð er mjög mikilvægt að skoða ekki bara
innkaupsverð prentarans. Rekstrarkostnaður prentara, aðallega
vegna kaupa á blekhylkjum, er mjög mismunandi. Sé mikið prentað
af ljósmyndum og grafík veldur það miklu hærri kostnaði en ef
bara er prentaður svartur texti. Kostnaðarsöm blekhylkjakaup fyrir
ódýran prentara geta fljótt gert dæmið miklu óhagstæðara heldur
en ef dýrari og sparneytnari prentari er keyptur í upphafi. Sérstakur
ljósmyndapappír er líka alldýr.
Tölvuprentarar
og fjölnotatæki
Bleksprautuprentarar, geislaprentarar, fjölnotatæki og öll-í-einu
Canon-Pixma mp 9801 NEYTENDABLA‹I‹ 1. TBL. 2009