Húnavaka - 01.05.1990, Blaðsíða 184

182
HÚNAVAKA
hátt veggjum, en ekki upp á þakið og breiddist svo um túnið fyrir
neðan og niður undir síki, sem er fyrir neðan túnið. Efst á túninu
var þetta stórgrýtisurð en þegar neðar dró var það að mestu leirlag
og þynnra eftir því sem nálgaðist síkið.
Pegar þetta var bjó á Strjúgi Þorvaldur Pétursson. Hann var bróðir
Hafsteins Péturssonar sem lengi bjó á Gunnsteinsstöðum og var
þekktur maður á sinni tíð fyrir margháttuð félagsmálastörf í bænda-
stétt. Bróðir þeirra var Magnús Pétursson sem var borgarlæknir í
Reykjavík á þessum árum.
Það var úr vöndu að ráða fyrir Þorvald hvað væri hægt að gera,
stór hluti túnsins undir grjót- og leirskriðu. Það var ekki um marga
kosti að velja. Hann valdi þann kostinn að reyna að verka af túninu
leirleðjuna þar sem hún var ekki mjög þykk þó að það væri nú ekki
álitlegt. Hann byrjaði á því fljótlega eftir að skriðan féll og var ótrú-
legt hvað það sóttist fljótt þó að hann notaði aðeins stunguskóflu
við verkið. Hann mokaði þessu saman í hauga til að byrja með og
flutti þá svo burt þegar tími gafst til. Þegar þornaði um harðnaði
leirleðjan og var þá hægt að fletta henni í flekum ofan af grasrótinni.
Það gekk þá betur enda var túnið að mestu slétt þar sem skriðan
fór yfir annars heíði þetta ekki verið hægt. Þetta var mikið þolinmæðis-
verk og dáðust margir að því hvað Þorvaldur var iðinn við þetta.
í nokkur ár eftir að skriðan féll voru bærinn og fjárhúsin notuð
þó að hvort tveggja væri að mestu á kafi í skriðunni nema þakið.
En svo var byggt íbúðarhús úr steini og fjárhús nokkru síðar.
Nú eftir öll þessi ár sjást ekki mikil merki eftir skriðuna miklu,
aðeins uppi undir gilkjaftinum er enn stórgrýti ofanjarðar. Allt hitt
sem skriðan fór yfir er grasi gróið og slétt tún og túnið allt miklu
stærra en það var fyrir skriðuhlaupið. Þar að auki eru sléttir sandar
meðfram nýja veginum, sem auðvelt væri að gera að túni með lítilli
fyrirhöfn. En nú er jörðin í eyði og öll manna verk þarna að engu
metin eins og víða annars staðar í sveitum landsins á þessum síðustu
tímum.