Húnavaka - 01.05.2012, Qupperneq 44

H Ú N A V A K A 42
múr kom hann að litlu haldi
þegar Mongólar réðust inn í
Kína á sautjándu öld. Ég hef
séð í sjónvarpi að alltaf virðist
vera farið með gesti á sama
stað að múrnum. Ég hef fyrir
stuttu séð úlfaldann sem var
kameldýr og einn að rolast á
svæðinu og sölukonurnar eru
að sjálfsögðu enn með varning
sinn. Ég tók að skoða það sem
ein þeirra hafði á boðstólum
en þá kom stúlka úr hópi
túlkanna og hvíslaði í eyra mér
á ensku: „Þetta er langtum of
dýrt.“ Samt keypti ég dúk sem mér þótti fallegur. Hann reyndist einnota.
Við Yangtze fljót
Við flugum frá Beijing til Nanjing, sem fyrrum var höfuðborg Kína, og
komum þangað í hlýju veðri á miðjum degi. Nanjing er á suðurbakka Yangtze-
Kiang en svo heitir fljótið fullu nafni og er um 300 km fyrir ofan Shanghai.
Yangtze er talið þriðja lengsta fljót jarðar, um 6.200 km og voru að sögn 2.850
km skipgengir.
Nanjing er dæmigerð kínversk borg og virðast vestræn áhrif þar til muna
minni en í öðrum borgum sem við heimsóttum í ferðinni. Þær reglur giltu þá
að upphitun húsa var leyfð norðan Yangtze fljóts en ekki sunnan þess. Þó hlýtt
væri í veðri þegar við komum til borgarinnar kólnaði daginn eftir með rigningu
og síðan slyddu. Var þá ærið kalt í húsum inni. Undir kvöld komum við t.d. í
skóla þar sem unglingar voru að læra ensku og voru þeir kappklæddir og með
vettlinga. Ég taldi í bekknum og voru þeir 59. Ég sagði heimamönnum að ég
myndi varla lifa lengur en hálfan mánuð ef ég þyrfti að búa við slíkan hús-
kulda.
Áður höfðum við t.d. verslað á silkimarkaði og skoðað tvo háskóla. Annar
þeirra var talinn í allra fremstu röð í landinu og virtist mér rektorinn vera
fluggreindur og talaði fágaða ensku. Hinn háskólinn var sérstæður. Hann var
útibú frá bandarískum háskóla og á hverri önn voru teknir aðeins 100
nemendur annað hvort ár. Skyldu 50 vera Kínverjar, 40 Bandaríkjamenn og
10 frá öðrum þjóðlöndum. Inntökuskilyrði voru auk þess mastersgráða í þeirri
námsgrein sem hver nemandi valdi sér og jafngóð og öflug kunnátta í
kínversku og ensku. Hverri tveggja ára önn lauk með doktorsprófi og leyfðist
engum að fara út úr háskólagarðinum á þessum tveimur árum. Þarna sýndust
ráfa um ýmsir sérkennilegir fuglar, sem áttu eftir tveggja ára nám að koma út
sem afburðarmenn.
Nanjing, fyrrum höfuðborg Kína.