Fréttablaðið - 13.12.2014, Page 64

FÓLK|HELGIN
KEMST Í HÁ-
TÍÐARSKAP
„Það komast allir
í hátíðarskap á
þessum tónleikum.
Það kostar ekki
mikið á tónleikana
sem gerir öllum
kleift að sækja þá.
Heilu fjölskyldurn-
ar koma saman og
njóta.“
Mikið er lagt í tónleikana eins og endranær. Fram koma barnakórar, bjöllukór, dans-
arar og ungir hljóðfæraleikarar. Hulda
Björk Garðarsdóttir óperusöngkona er
annar tveggja einsöngvara á tónleik-
unum að þessu sinni. Þetta er í fyrsta
skipti sem Hulda syngur á jólatón-
leikum Sinfóníuhljómsveitarinnar en
hún hefur nokkrum sinnum sungið á
tónleikum hennar við ýmis tækifæri.
„Það hefur verið yndisleg upplifun
að fara í gegnum æfingar fyrir þessa
tónleika. Ég hef ekki áður verið við-
stödd jólatónleika og skil vel núna að
aðsóknin hafi aukist ár frá ári. Boðið er
upp á mikla fjölbreytni og margt hæfi-
leikaríkt fólk sem kemur fram. Fegurðin
er margbreytileg á sviðinu. Þar utan er
einnig sungið á táknmáli sem eru mikil
mannréttindi fyrir þann hóp sem þarf á
því að halda,“ segir Hulda. „Það hefur
verið virkilega mikill hátíðleiki á æfing-
unum og ég hlakka óskaplega til þegar
áhorfendur mæta í hús.“
HELDUR Í HEFÐIR
Þegar Hulda er spurð hvort hún sé
jólabarn, svarar hún því játandi. „Ég
er alin upp á Akureyri og held í hefðir.
Handsker laufabrauð með stórfjöl-
skyldunni sem við höfum lengi gert og
lærðum af ömmu minni og afa. Einnig
baka ég Sörur með saumaklúbbnum
mínum. Mér finnst aðventan vera stór
hluti af jólahátíðinni og hin síðari ár
hef ég lært að njóta hennar. Það er svo
mikil eftirvænting í loftinu. Ég vil hafa
fáa en góða jólahluti í kringum mig,“
segir Hulda sem á tvö börn og eitt
barnabarn.
Hún segist sjóða hangikjöt á Þorláks-
messu og stundum hefur það verið
borðað heitt þann dag og síðan aftur
á jóladag. „Ég hef tekið upp þann sið
frá æsku minni að hafa lambahrygg á
aðfangadag. Mér finnst það dásemdar-
hefð og fjölskylda mín er ánægð með
það.“
GÓÐAR MINNINGAR
Hulda segist eiga góðar minningar
frá jólum þegar hún var að alast upp.
Þó minnist hún þess að faðir hennar,
Garðar Karlsson, barna- og tónlistar-
kennari, hafi oft verið þreyttur þegar
jólin komu loks. „Pabbi gaf mikið í starf-
ið sitt, enda var það honum hjartfólgið.
Hann stjórnaði kórum í Eyjafjarðarsveit
og lagði mikinn metnað í allt það sem
hann tók sér fyrir hendur. Hann féll
frá fyrir þrettán árum, langt um aldur
fram,“ segir Hulda. „Margir minnast
hans með hlýju,“ bætir hún við.
Hulda stundaði söngnám í Eyjafirði
og hélt síðan áfram í Söngskólanum í
Reykjavík. Áframhaldandi nám stund-
aði hún við Hochschule der Künste
í Berlín og Royal Academy í London
þaðan sem hún lauk einsöngvaraprófi.
Hún segist alltaf hafa komið heim um
jólin á meðan á námi stóð. Hulda hefur
tekið þátt í mörgum óperum bæði hér
á landi og erlendis. Fyrir hlutverk sitt
sem Anne Trulove í The Rake’s Pro-
gress hlaut hún tilnefningu til Grímu-
verðlaunanna árið 2007. Hulda söng
hlutverk Mimìar í La Bohème hjá Ís-
lensku óperunni síðastliðið vor.
„Fyrir fjórum árum var ég að syngja
í Óperunni í Malmö í Svíþjóð og þá var
sýning annan í jólum. Fjölskylda mín
var með mér og við eyddum jólunum
ytra. Það var mjög sérstakt. Til dæmis
kom okkur mjög á óvart að verslanir
voru ekki opnar lengur á Þorláksmessu
en á venjulegum degi. Svíarnir eru ekk-
ert að versla á síðustu stundu. Íslenska
Þorláksmessuhefðin finnst mér þó
alltaf svolítið sjarmerandi.“
JÓLASTEMNING
Á jólatónleikunum ætlar Hulda að
syngja lögin Nóttin var sú ágæt ein og
Jólastemning við texta Ómars Ragnars-
sonar. „Þetta er gamalt erlent lag,“ seg-
ir hún. „Loks syngja allir saman Heims
um ból,“ segir Hulda en einnig syngur
á tónleikunum Kolbrún Völkudóttir
söngkona. „Það komast allir í hátíðar-
skap á þessum tónleikum. Það kostar
ekki mikið á tónleikana sem gerir öllum
kleift að sækja þá. Heilu fjölskyldurnar
koma saman og njóta.“
Helgin hjá Huldu fer að mestu í jóla-
tónleikana en síðan tekur við undir-
búningur jólanna og kaup á jólagjöfum.
„Ég hlakka mikið til helgarinnar og að
njóta hátíðleikans á tónleikunum.“
■ elin@365.is
HÁTÍÐLEG UPPLIFUN
JÓL Mörgum þykir jólatónleikar Sinfóníuhljómsveitarinnar ómissandi á
aðventunni. Tónleikarnir verða sífellt vinsælli hjá öllum aldurshópum og nú
verða þeir fernir. Hulda Björk Garðarsdóttir syngur einsöng á tónleikunum.
HELDUR Í HEFÐIRNAR Hulda Björk er alin upp á Akureyri og segir að þar séu ríkar jólahefðir sem hún hefur haldið í. MYND/GVA
ht.is
Engin venjuleg upplifun
Við kynnum
Philips Ambilight
9000 sjónvörpin