Bændablaðið - 09.07.2015, Blaðsíða 12

12 Bændablaðið | Fimmtudagur 9. júlí 2015
„Það eru mennirnir sem eru
gull þjóðanna og dýrmætustu
afurðirnar í hverju landi,“
sagði vitur kona forðum. Þessi
orð koma mér í hug þegar einn
öflugasti bóndi í mínu héraði
fagnar áttræðisafmæli sínu og
hélt vinum sínum margra daga
hátíð að fornum sið.
Björn Sigurðsson í Úthlíð í
Biskupstungum er þjóðkunnur
maður og af honum eru til
margar þjóðsögur. Björn er gildur
bóndi og í dag einn öflugasti
ferðaþjónustubóndi landsins.
Úthlíð er landnámsjörð og þar
bjó Þorgerður dóttir Ketilbjarnar
hins gamla á Mosfelli. En hin merka
ætt Árnesinga, Haukdælaætt, var
frá honum komin og voru margir
þeirra manna bestu og farsælustu
menn landsins svo sem feðgarnir
Ísleifur og Gissur, biskupar í
Skálholti. Sagt var að úr Gissuri
hefði mátt gera víkingahöfðingja
og væri hann vel til þess fallinn eða
konung og væri hann vel til þess
fallinn eða biskup sem og varð og
var hann einn sá farsælasti af öllum
biskupum landsins.
Lífsglaður víkingahöfðingi
Björn í Úthlíð er svipmikill bóndi
og víkingahöfðingi, hann er
lífsglaður og hefur allt sitt líf horft
fram á veginn hiklaus og djarfur,
með Birni er gaman að vera í leik
og starfi. Björn er foringi okkar
Haukdælanna og við nefnum
hann oft Jarlinn í Úthlíð en þá
nafnbót bar Gissur frændi okkar
Þorvaldsson.
Ágústa Ólafsdóttir, eiginkona
Björns, var frá Hjálmholti í Flóa
og voru samfarir þeirra góðar
eins og sagt var hér áður fyrr, allt
fór saman, barnalán og búskapur
góður.
Ágústa er látin og reisti Björn
eina fallegustu kirkju landsins,
Úthlíðarkirkju, til minningar um
konu sína og Gísli Sigurðsson,
bróðir hans, teiknaði kirkjuna.
Björn er því kirkjubóndi en þeir
eru nú ekki margir eftir í landinu.
Í Úthlíðarkirkju fara fram margar
athafnir fjölskyldunnar og vina
og einnig þeirra skógarmanna í
Úthlíðarskógi, en þar eiga margir
helgireit eða lítið himnaríki og njóta
þess að safna kröftum og búa við
brjóst náttúrunnar.
Byggir brú milli þéttbýlisins og
sveitamenningarinnar
Það eru menn með kjark og stórhug
Björns í Úthlíð sem vísa veginn,
horfa til nýrra búskaparhátta og taka
utan um „manninn, manneskjuna,
sem þráir að eignast fjölbreyttara líf
en að lifa eingöngu í bæ eða borg.
Björn á sinn þátt í því að kalla menn
á ný til búsetu í sveitinni og þannig
byggir hann brú á milli þéttbýlisins
og sveitamenningarinnar. Til
hamingju, Björn í Úthlíð,
með lífsstarf þitt og vináttuna
sem einkennir þig og þann
drengskaparmann sem þú hefur
að geyma. „Fögur sál er ávallt ung
undir silfurhærum.“ Íslandi allt.
Fundarstjórn forseta,
hvað er það?
Sagt er að í vetur hafi hið nýja
þing mátt þola 2.500 ræður um
fundarstjórn forseta. Og öllum ber
eigi að síður saman um að ekkert sé
að fundarstjórn forsetans, Einars K
Guðfinnssonar, sem er velviljaður
og vænn drengur og verðugur þess
bæði vegna reynslu og starfsaldurs
að bera það tignarorð að vera
forseti Alþingis.
Þegar Alþingi var endurreist
1845 roðaði af nýjum degi og
skáldin sungu lofsöngva lýðræðinu
og frelsisþrá kúgaðrar þjóðar. Ekki
þótti Jónasi Hallgrímssyni gott
þegar hún Snorrabúð var orðin
stekkur. Hann vildi sjá „snarorða
snillinga að stefnu sitja, þjóðkjörin
prúðmenni þingsteinum á. Og að:
„Traustir skulu hornsteinar hárra
sala.“
Virðing Alþingis vex ekki við
þetta nýja „ræðuníð“, það fer æðstu
stofnun landsins illa. Ég væri að
skrökva ef ég segði að þetta væri
síst verra fyrri siðum í málþófi.
Ég viðurkenni að ég roðnaði fyrir
hönd þings og þjóðar að horfa upp
á þennan nýja sið og fannst að
Alþingi væri orðið „hrafnaþing,“
þar sem hver krunkaði upp í annan.
Ber skylda til að bæta
umræðuhefð
Nú er það skylda hinna vænstu
manna í hverjum þingflokki að
ná saman um betri umræðuhefð
en þessa. Bæði stjórn og
stjórnarandstaða skaðast af þessu
rugli um fundarstjórn forseta sem
málið snýst alls ekki um, og báðir
aðilar bera ábyrgð á umræðunni,
meiri- og minnihlutinn, stjórn og
stjórnarandstaðan. Almenningur
þolir ekki þessa vitleysu og mér
er til efs, að svona nokkuð gerist í
nokkru öðru landi sem við viljum
jafna okkur við. Eitt er víst að
þingmennirnir sjálfir eru ekkert
verr gerðir af guði en við þessir
gömlu, en sumarið ber að nýta til
þess að haustþing beri svipmót
af reisn og drengskap. Alþingi
verði ekki Snorrabúð eða stekkur
leiðindanna heldur „hornsteinar
hárra sala“.
Guðni Ágústsson, fyrrverandi landbúnaðarráðherra:
Af höfðingjum og
fundarstjórn forseta
Fréttir
Hjörtur Már Benediktsson,
garðyrkjubóndi í Hveragerði,
gerir það gott í garðyrkjunni.
Hann hefur opnað grænmetis-
markaðinn sinn sjötta árið í röð
við hlið leikhússins. Markaðurinn
verður opinn allar helgar í sumar.
„Ég rækta allt úti grænmetið
sjálfur en kaupi gróður húsa-
afurðirnar. Á meðal tegunda er
blátt blómkál, rauðrófur, hnúðkál,
rauðkál ásamt öllu þessu gamla
góða,“ sagði Hjörtur Már.
/MHH
Grænmetismarkaðurinn í Hveragerði
opinn allar helgar í sumar
Vigdís Finnbogadóttir, fyrrverandi
forseti Íslands, mætti í Hveragerði
nýlega og gróðursetti þar þrjú
falleg birkitré með aðstoð þriggja
ungmenna í Vigdísarlundi sem er
við aðalgötuna í bæjarfélaginu.
Þetta var gert í tilefni þess að
nú eru liðin þrjátíu og fimm ár frá
því að hún var kjörin forseti en því
embætti gegndi hún í sextán ár.
Á stærri myndinni er Vigdís með
gróðursetningarfólkinu og Aldísi
Hafsteinsdóttur bæjarstjóra. Þetta
eru þau Sóldís Anna Guðjónsdóttir,
sem náði framúrskarandi árangri
við útskrift í 10. bekk í vor, en
hún gróðursetti fyrir hönd stúlkna,
Bjartur Geirsson, sem hlaut 1.
verðlaun í smásagnakeppni Félags
enskukennara á Íslandi og sendiráðs
Bandaríkjanna, en hann gróðursetti
fyrir hönd drengja og loks er
það Sunna Siggeirsdóttir en hún
gróðursetti fyrir hönd komandi
kynslóða en hún er með barn í
móðurkviði, sem er væntanlegt í
heiminn 9. ágúst. /MHH
Vigdís Finnbogadóttir, fyrsti kvenforseti heimsbyggðarinnar:
Gróðursetti tré í Vigdísarlundi
Hjörtur Már ásamt dætrum sínum, þeim Helgu og Örnu, ásamt barnabarninu, Katrínu Lindu, sem standa vaktina með
honum í Grænmetismarkaðnum þegar mikið er að gera. Þau eru í bolum, sem Félag gulrófnabænda lét framleiða
fyrir félagsmenn sína í fyrra en á þeim stendur: „Ertu rófulaus? Við björgum því“.
Vigdís Finnbogadóttir með aðstoðarfólki að gróðursetja. /MHH
Gefið hefur verið út fuglastígskort
fyrir Norðurland vestra, en á
því eru merktir alls 17 staðir
sem þykja áhugaverðir fyrir
fuglaskoðunaráhugamenn.
Svæðið nær allt frá Borðeyri
í vestri að Þórðarhöfða í
austri. Verkefnið er unnið af
Ferðamálasamtökum Norðurlands
vestra í samvinnu við Selasetur
Íslands, Ferðamálafélag V-Hún.,
Ferðamálafélag A-Hún., Félag
ferðaþjónustunnar í Skagafirði
og Ferðamáladeild Háskólans
á Hólum. Verkefnið er styrkt af
Vaxtarsamningi Norðurlands vestra
og hefur verkefnastjórn verið á
höndum Selaseturs Íslands.
Einn af vaxtarbroddum
ferðaþjónustunnar
Á vef Selasetursins segir að vonir
séu bundnar við að fuglastígurinn
muni efla ferðamennsku á
Norðurlandi vestra með því að víkka
út þann hóp ferðamanna sem þangað
kemur sem og lengja þann tíma
sem ferðamenn sækja landsvæðið
heim. Stígurinn geti verið einn af
vaxtarbroddum ferðaþjónustunnar
og lengt ferðamannatímabilið
snemma á vorin þegar til dæmis
tún á Norðurlandi vestra fyllast af
helsingjum, álftum og gæsum og á
haustin þegar fuglar koma saman í
stórum hópum til að undirbúa sig
undir flugið á vetrarstöðvarnar.
Norðurland vestra sé mjög vel til
fuglaskoðunar fallið og sé aðgengi
að fuglategundum sem þyki
eftirsóknarverðar til skoðunar gott.
Vinna við verkefnið hefur staðið
í á þriðja ár. Sumarið 2014 var Ellen
Magnúsdóttir fuglafræðingur ráðin
til starfa og skoðaði hún vænlega
staði og taldi tegundir sem þar sáust.
Staðirnir voru valdir eftir athuganir
hennar, en athygli vakin á því að
ýmsir fleiri áhugaverðir staðir komi
einnig til greina. Stefnt er að því að
fjölga stöðum jafnt og þétt í síðari
útgáfum á kortinu. Sótt hefur verið
um styrki til áframhaldandi athugana
á fuglum á svæðinu til að halda
áfram að þróa stíginn.
Kortinu verður dreift til
ferðaþjónustuaðila á svæðinu,
en einnig á einni af stærstu
fuglasýningum heims í Bretlandi
næsta haust. /MÞÞ
Fuglastígskort fyrir Norðurland vestra:
Landsvæðið vel til fuglaskoðunar fallið
Bændablaðið
á bbl.is og líka á Facebook