Skólavarðan - 01.03.2005, Blaðsíða 24

24
SKÓLAVARÐAN 2.TBL. 5. ÁRG. 2005
Aðalfundur Félags framhaldsskólakennara
var haldinn 25. febrúar sl. á Grand Hóteli.
Elna Katrín Jónsdóttir fráfarandi formaður
FF setti fundinn og sagði m.a: „Aðalfundur
FF mun fást við mörg stórmál. Félagið
horfir gagnrýnum augum á vinnubrögð
menntamálaráðherra við að koma í kring
áformum sínum um að stytta námstíma til
stúdentsprófs með því m.a. að skerða nám
í framhaldsskólum og með aðferð sem ef
að líkum lætur mun leiða til þess að margir
framhaldsskólakennarar missa vinnuna.
Félagið telur margt í þeirri aðferðafræði
óskynsamlegt og höfðar sterkt til mennta-
málaráðherra að endurskoða áformin
og reyna að ná sátt við skólasamfélagið
um breytingar sem raunverulega bæta
menntun í landinu. Kjarasamningum er
enn ólokið og einhverjar brekkur eftir í
samningum við samninganefnd ríkisins
ef að líkum lætur. Félagið gagnrýnir harð-
lega niðurskurð á framlögum á árinu 2005
til endurmenntunar framhaldsskólakenn-
ara á sama tíma og þörf fyrir símenntun er
meiri en nokkru sinni fyrr.“
Baráttujaxl lætur af formennsku
Meðal gesta við setninguna voru
Þorgerður K. Gunnarsdóttir menntamála-
ráðherra, Ingibjörg Guðmundsdóttir for-
maður Félags framhaldsskóla og Halldóra
Friðjónsdóttir formaður BHM sem allar
ávörpuðu fundinn.
Ingibjörg sagði m.a: „Þau þáttaskil
verða á þessum fundi að baráttujaxlinn
Elna Katrín lætur nú af formennsku í FF.
Ég vil þakka henni kærlega fyrir mikil og
góð störf fyrir framhaldsskólakennara og
framhaldsskólann. Ég met mikils öll okkar
samskipti, hún ber einlæga umhyggju
fyrir velferð framhaldsskólans, er ein-
staklega hreinskiptin og leggur mikinn
metnað í allt sem hún gerir. Kærar þakkir
Elna Katrín fyrir allt sem þú hefur gert
fyrir okkur.“
Hart deilt á áform
ráðherra um styttingu
Framsöguerindi um þessi áform héldu
Katrín Jakobsdóttir þingmaður VG,
Magnús Ingólfsson kennari í Borgarholts-
skóla og Sölvi Sveinsson verðandi skóla-
stjóri VÍ. Katrín rakti margt sem fer for-
görðum ef styttingin verður framkvæmd
sem boðað er. Hún lagði áherslu á að
framhaldsskólaárin væru þýðingarmikið
mótunartímabil og þar öðluðust margir
mikilvægan félagsþroska. Magnús rakti
sögu hugmyndarinnar frá því hún kom
fyrst fram fyrir um áratug. Niðurstaða
hans var sú að raunveruleg ástæða fyrir
styttingunni væri sparnaður í skólakerfinu.
Sölvi Sveinsson kom víða við í erindi sínu
og sagði m.a. að einungis lítið brot grunn-
skólakennara hefði BA/BS og UK-próf, en
það væru lágmarks menntunarkröfur sem
gerðar væru til þeirra sem kenna grunná-
fanga í framhaldsskólum. Hann minnti á
að Íslendingar væru á litlu málsvæði og
því væri góð tungumálakunnátta þeim sér-
lega mikilvæg. Hann lýsti yfir áhyggjum af
skerðingu tungumálakennslu.
Miklar umræður spunnust eftir fram-
söguerindin. Enginn þeirra sem tók til
máls var hlynntur áformum um styttingu.
Elna Katrín sagði til dæmis að svikist hefði
verið um að efna til opinnar umræðu um
þetta stóra mál við skólasamfélagið og
almenning í landinu. Í fundarlok var sam-
þykkt harðorð ályktun um þessi áform.
Elna Katrín og Oddur Jakobsson sögðu
frá stöðu mála í kjaraviðræðum en fram
kom í máli þeirra að búist væri við nýjum
kjarasamningi innan skamms.
Ný stjórn tekur nú við stjórnartaumum
í FF undir forystu Aðalheiðar Steingríms-
dóttur. Hana skipa: Ásdís Ingólfsdóttir,
Haukur Már Haraldsson, Magnús Ingólfs-
son og Þórunn Friðriksdóttir. Varamenn
eru Agnes Karlsdóttir, Hjálmar Jóhannes-
son og Ágúst Ásgeirsson.
Allar upplýsingar um kjör fulltrúa til
trúnaðarstarfa innan FF má lesa á heima-
síðu KÍ www.ki.is
GG
AÐALFUNDUR FF
Félagið skorar á menntamálaráðherra
að endurskoða áform um styttingu
Aðalheiður Steingrímsdóttir er nýr
formaður Félags framhaldsskólakennara
Á aðalfundi FF. Meðal gesta sem ávörpuðu fundinn var Þorgerður Katrín Gunnarsdóttir.
Elna Katrín Jónsdóttir fráfarandi formaður FF.