Skólavarðan - 01.09.2007, Blaðsíða 3

3
FORMANNSPISTILL
SKÓLAVARÐAN 6.TBL. 7. ÁRG. 2007
Formaður og varaformaður KÍ og formenn aðildarfélaga KÍ skiptast á um
að skrifa formannspistla í Skólavörðuna. Félögin á bak við formannspistlana
eru: Félag framhaldsskólakennara (FF), Félag grunnskólakennara (FG),
Félag leikskólakennara (FL), Félag stjórnenda í framhaldsskólum (FS), Félag
tónlistarskólakennara (FT), Skólastjórafélag Íslands (SÍ).
Sigrún Grendal
Lj
ó
sm
y
n
d
:
k
e
g
Svæðisþing tónlistarskóla fóru fram í fimmta sinn í haust og hafa
tvö af þremur þingum verið haldin þegar þetta er skrifað. Við
skipulagningu þinganna var reynt að tefla fram blöndu af praktík
og fagpólitík og þeir aðilar sem fara með málefni tónlistarfræðslu
voru kallaðir að umræðuborðinu. Það er okkar hlutverk sem
fagstéttar að kynna okkur stefnur og strauma í kringum okkur og
vera virk í stefnumótun um nám og kennslu í tónlistarskólum. Í
þessu skyni fengum við kynningu á fyrirkomulagi tónlistarfræðslu
í Minnesota á svæðisþingunum sem virkaði vel til að kynda
undir umræðum um aðalnámskrá tónlistarskóla sem tekin var til
umfjöllunar þar.
Tæki samtímans til að þróa menntakerfið
Umræðan þróaðist svo áfram þar sem svokallaður „Vegvísir
fyrir listfræðslu“, gefinn út af UNESCO, var kynntur og ræddur.
Ágúst Einarsson rektor við Háskólann á Bifröst kynnti skýrsluna á
þingunum en inntak hennar lýtur að því að listfræðsla þurfi að
vera miðlæg í menntakerfum. Fulltrúar menntamálaráðuneytis
og sveitarfélaga voru fengnir til að tjá sig um inntak hennar
og má nefna að menntamálaráðherra, Þorgerður Katrín
Gunnarsdóttir, flutti erindi á einu þinganna og tók að því loknu
þátt í pallborðsumræðum um efnið.
Við, sem trúum á mikilvægi og gildi listfræðslu, eigum að
miðla þeirri sýn að listfræðsla sé tæki samtímans til að þróa
menntakerfið áfram í upphafi nýrrar aldar. Það er sameiginlegt
hagsmunamál allra hópa og þar á fagfólk frá öllum skólagerðum,
foreldrar, háskólasamfélagið og hið opinbera að stilla saman
strengi. Ég tel brýna þörf á að skapa samstarfsvettvang með nýja
nálgun á hlutina.
Miðstöð menningar og lista í námi
Það er vert að nefna að stjórnvöld í Noregi hafa nýverið gefið út
áætlun um „skapandi nám“ sem miðar að því að
• auka vægi listfræðslu og menningar í öllu grunnnámi
- frá leikskóla
• styrkja getu til að miðla menningu og listum í námi
• þróa fjölbreyttar kennsluaðferðir og kennslufræðileg
verkfæri
• örva og skrá list og menningarlega þætti í uppeldi og
menntun
• gera það mikilvægasta í menningu og listum í fjölmenningar-
samfélaginu aðgengilegt.
Í upphafi árs var sett á laggirnar Miðstöð menningar og lista í
námi, sem ætlað er stórt hlutverk við að koma þessari áætlun í
framkvæmd. Þessar aðgerðir ríma við boðskap Vegvísis UNESCO
og hvet ég alla áhugasama um þróun menntakerfisins okkar til
að kynna sér skýrsluna.
Skapandi atvinnugreinar – fjórða víddin
Í kynningu sinni á fyrrnefndum Vegvísi á svæðisþingum tón-
listarskóla kom Ágúst Einarsson meðal annars inn á að skapandi
atvinnugreinar væru framtíðin, þær ættu rætur í menningu og
menning ætti rætur í listum. Hann sagði 21. öldina vera öld
skapandi atvinnugreina, þær væru fjórða víddin í atvinnuháttum
nútímans en áður hefði hagkerfinu verið skipt í þrennt, þ.e.
frumframleiðslu, iðnað og þjónustu. Um fjórðungur af íslenskum
vinnumarkaði starfar við skapandi atvinnugreinar.
Heimurinn er á sífelldri hreyfingu í orðsins fyllstu merkingu og
aðeins eitt sem við getum verið viss um, það er að heimurinn mun
halda áfram að hreyfast! Það eru spennandi tímar framundan og
ég hlakka til að eiga frjóa umræðu með ykkur félögum mínum í
Kennarasambandi Íslands um menntakerfi framtíðarinnar.
Sigrún Grendal
Fjórða víddin í atvinnuháttum nútímans
Listfræðsla miðlæg í menntakerfum