Skólavarðan - 01.12.2008, Blaðsíða 7
SKÓLAVARÐAN 7.TBL. 8. ÁRG. 2008
Hluti af starfi mínu sem launafulltrúi KÍ
er að leiðbeina félagsmönnum sem eru
að fara í fæðingarorlof og margir nýta sér
þá þjónustu. Fæðingarorlofslögin taka
sífelldum breytingum, nú síðast 1. júní
2008, og eiga þær við um börn sem fæðast,
eru ættleidd eða tekin í varanlegt fóstur 1.
júní 2008 og síðar.
Að mörgu þarf að huga áður en farið
er í fæðingarorlof, t.d. þarf að fylla út
tvenns konar eyðublöð, annars vegar
eyðublaðið „Tilkynning um fæðingarorlof“
þar sem starfsmaðurinn setur fram óskir
sínar um tilhögun fæðingarorlofsins og
hins vegar „Umsókn um greiðslur úr
Fæðingarorlofssjóði“ sem sent er til sjóðsins.
Þessi eyðublöð og aðrar upplýsingar um
fæðingarorlof má nálgast á vef KÍ www.ki.is
Þar er einnig hægt að finna „Spurt & svarað“
sem eru algengustu spurningar og svör sem
safnað hefur verið saman á einn stað, m.a.
um fæðingarorlofið.
Samkvæmt fæðingarorlofslögunum á
móðir rétt á þriggja mánaða fæðingarorlofi
og faðir einnig. Sá réttur er ekki
framseljanlegur á milli foreldra (nema við
sérstakar aðstæður) þannig að kjósi annað
þeirra að nýta ekki sjálft sinn rétt fellur hann
niður. Þá eiga foreldrarnir þrjá mánuði til
viðbótar sameiginlega sem þeir geta ráðið
hvernig þeir nýta. Yfirleitt er sveigjanleiki
á tilhögun fæðingarorlofs. Hægt er að taka
það í einu lagi, skipta niður á fleiri tímabil
eða vera í minnkuðu starfshlutfalli samhliða
fæðingarorlofi. Náist ekki samkomulag um
óskir starfsmanns á hann jafnan rétt á að
taka fæðingarorlof í einu lagi.
Breytingar á fæðingarorlofslögunum
Þann 1. júní sl. breyttust fæðingarorlofslögin
þannig að greiðslur til foreldra í fæðingarorlofi
eru nú 80% af meðaltali heildarlauna og skal
miðað við tólf mánaða samfellt tímabil sem
lýkur sex mánuðum fyrir fæðingardag barns
eða þann dag sem barn kemur inn á heimili
við frumættleiðingu eða töku í varanlegt
fóstur. Margir vilja vita hvað þeir komi til með
að hafa í tekjur í fæðingarorlofinu og geta
þeir þá farið inn á vef Fæðingarorlofssjóðs
www.faedingarorlof.is þar sem er reikniforrit
sem umsækjendur geta notað til að áætla
þær greiðslur sem þeir fá frá sjóðnum í
fæðingarorlofinu.
Fæðingarstyrkir til félagsmanna í
fæðingarorlofi
Afgreiðsla fæðingarstyrkja til félagsmanna
í fæðingarorlofi hefur hingað til verið í
gegnum Fjölskyldu- og styrktarsjóð en um
næstu áramót mun KÍ taka yfir sinn hluta af
sjóðnum. KÍ hefur verið aðili að FOS hingað til
ásamt BHM og BSRB. Ekki eru fyrirhugaðar
neinar breytingar á úthlutunarreglum þegar
sjóðurinn flyst alfarið yfir til KÍ. Hægt er að
sækja um fæðingarstyrk fyrir þá foreldra sem
a) hafa verið starfandi hjá vinnuveitanda og
greitt hefur verið fyrir í sjóðinn síðustu sex
mánuði fyrir fæðingu barns, b) hafa gildan
ráðningarsamning í upphafi fæðingarorlofs
og c) taka að lágmarki þriggja mánaða
fæðingarorlof. Styrkirnir eru jafnháir til karla
og kvenna en hliðsjón höfð af starfshlutfalli.
Upphæðin er kr. 170.000 (fyrir skatt) m.v.
100 % starfshlutfall.
Mikilvægt er að merkja við á
eyðublaðinu „Umsókn um greiðslur úr
Fæðingarorlofssjóði“ að starfsmaður vilji
greiða til KÍ í fæðingarorlofinu, annars tapar
hann öllum félagslegum réttindum, þ.m.t.
rétti í Vísindasjóði/Endurmenntunarsjóði,
Orlofssjóði og Sjúkrasjóði. Þetta atriði
gleymist oft og kemur ekki í ljós fyrr en
viðkomandi kennari ætlar að nýta sér þau
réttindi sem aðild að KÍ veitir.
Ég hvet alla sem eru í vafa um einhver
atriði varðandi fæðingarorlofið eða annað
að hafa samband. Bæði er hægt að senda
mér tölvupóst á netfangið ingibjorg@ki.is og
hringja til mín í síma 595 1111.
Ingibjörg Úlfarsdóttir
launafulltrúi KÍ
Fæðingarorlof
Ingibjörg Úlfarsdóttir
launafulltrúi KÍ
Lj
ós
m
yn
d
:
S
te
in
un
n
Jó
na
sd
ót
ti
r
KjARAMÁL