Skólavarðan - 01.04.2009, Blaðsíða 30

30
SMIÐSHöGGIÐ
SKÓLAVARÐAN 3.TBL. 9. ÁRG. 2009
Börn eru sýnd á mismunandi hátt í fjöl-
miðlum. Gjarnan er sagt frá því ef börn hafa
staðið sig vel í keppni eða skarað fram úr
á einhvern hátt. Stundum eru börn fengin
í stutt viðtöl í sjónvarps- eða útvarpsþætti
og þá gjarnan til að draga fram „krúttleika“
þeirra og það hversu einlæg og skondin þau
eru í svörum sínum. Umfjöllun fjölmiðla um
íþróttaiðkun barna er samt ekki mikil miðað
við allan þann fjölda barna sem stundar
íþróttir og þau fjölmörgu barnamót sem
haldin eru í ýmsum íþróttagreinum. Ég hef
átt í rökræðum við fólk um hvernig umfjöllun
fjölmiðla um íþróttaafrek ungra barna skuli
háttað en ég tel ekki heppilegt að börnum
sé hampað í fjölmiðlum sem sigurvegurum
eða afreksmönnum. Sumum finnst sjálfsagt
að sagt sé frá þeim bestu og tíundað hverjir
vinna, hlaupa hraðast, skora mest og svo
framvegis en ég vil frekar að fjölmiðlar veki
athygli samfélagsins á því sem börn eru
að fást við, til dæmis með þátttöku sinni í
íþróttaviðburðum. Segja frá hvernig börnin
hafa verið að æfa og gleði þeirra yfir að taka
þátt. Prýða svo fréttina með myndum af
þátttakendum, ekki endilega sigurvegurum.
Við eigum að venja börnin okkar á að meta
sjálf sinn eigin árangur en ekki gera þau háð
því að fá viðurkenningu fjölmiðla.
Það er ekki bara í sambandi við íþrótta-
sigra eða þegar einhver skarar fram úr
sem umfjöllun fjölmiðla um börn er mér
hugleikin. Um daginn bauðst okkur í
skólanum þar sem ég starfa að birta frétt
á tiltekinni heimasíðu um skólaþróunardag
sem haldinn var í skólanum. Með fréttinni
sendum við inn mynd sem að okkar viti var
mjög lýsandi fyrir getu barns og fannst okkur
myndin sýna margt stórkostlegt. En það er
skemmst frá því að segja að sá sem birti
fréttina fannst myndin á engan hátt nógu
góð og vildi frekar mynd af börnum að leik.
Hann einfaldlega skipti á myndinni okkar
og annarri mynd sem hann átti sjálfur og
honum fannst eiga betur við. Eftir rökræður
við þennan mann var svo okkar mynd sett
inn og hans mynd tekin út. Þetta vakti
mig vissulega til enn frekari umhugsunar
um hvernig börn eru sýnd í fjölmiðlum og
mismunandi sýn okkar á það hvernig því
skuli háttað. Myndin okkar var af verki sem
barn vann af mikill nákvæmni, verkið sást
og hendur barnsins þar sem það vann að
verkinu. Við vildum veita vinnu og afrakstri
barna athygli en honum þótti meira um vert
að birta mynd af börnum að leik.
Við sem störfum í leikskólum verðum vör
við það á hverjum degi hversu hæfileikarík
og getumikil börn eru. Þau takast á við
ný og ögrandi viðfangsefni og eru alltaf
að læra og afreka eitthvað nýtt. Oft koma
augnablik þar sem við verðum vitni að
einhverju afar merkilegu í þroskaferli barns
og þá langar mann til að láta heiminn vita
hversu stórkostleg viðfangsefni barna geta
verið. Það eru þessir viðburðir sem vert er
að vekja athygli á og hefja til vegs og virð-
ingar í samfélaginu. Með því móti er ef til vill
möguleiki á að virðing fyrir leikskólum sem
menntastofnunum vaxi og mikilvægi frum-
bernskunnar í þroska barnsins verði öllum
ljóst. Í apríl 2008 fór ég ásamt nokkrum
samstarfsmönnum mínum til Reggio Emilia
sem er bær á Ítalíu. Þar kynntumst við
samfélagi sem ber mjög mikla virðingu
fyrir börnum og verkum þeirra. Við komum
til Reggio Emilia með lest og þegar gengið
var um undirgöng frá lestarteinunum blöstu
við okkur ljósmyndir af verkum barna á
veggjum ganganna. Hvergi var að sjá myndir
af börnunum sjálfum heldur var verkum
þeirra hampað. Þetta voru okkar fyrstu kynni
af bænum en það má segja að myndirnar
í göngunum hafi verið einkennandi fyrir þá
virðingu sem börnin og verk þeirra í þessum
bæ. Þetta vil ég sjá í auknum mæli hér á
landi. Börn eru svo miklu meira en lítil, sæt,
skondin og krúttleg. Þau eru hæfileikaríkar
manneskjur sem þroskast og dafna með
því að takast á við umhverfið, rannsaka og
reyna sig í félagi við aðra. Því skulum við
veita athygli.
Alda Agnes Sveinsdóttir
Höfundur er skólastjóri Stekkjaráss.
Stundum eru börn fengin í stutt viðtöl í sjónvarps-
eða útvarpsþætti og þá gjarnan til að draga fram
„krúttleika“ þeirra og það hversu einlæg og skondin
þau eru í svörum sínum.
Börn, afrek þeirra og umfjöllun fjölmiðla
Alda Agnes Sveinsdóttir
framlag.is
Lj
ós
m
yn
d
ir
f
rá
h
öf
un
d
i.