Dagblaðið Vísir - DV - 15.04.2016, Blaðsíða 6

Helgarblað 15.–18. apríl 20166 Fréttir
Fastir í sandi í höfninni
n Höfnin á Kópaskeri fyllist af sandi n Komast ekki á sjó á fjöru n Of dýrt að dýpka
H
öfnin á Kópaskeri er að fyllast
af sandi. Þess eru dæmi að
þurft hafi að nota smábáta,
sem eru á grásleppu- og
þorskveiðum við Kópasker,
til að draga aðra báta á flot svo þeir
komist til veiða. Sveitarstjórnar-
maður í Norðurþingi segist hafa reynt
að tala fyrir framkvæmdum við höfn-
ina en segir að því sé borið við að
verk efnið sé dýrt.
Nú er svo komið að aðeins hluti
bryggjunnar er nothæfur og erfitt
getur verið fyrir stærri sem smærri
báta að athafna sig. Heimamönnum
svíður að á sama tíma séu tveir
stórir dýpkunarprammar að störfum
hinum megin Öxarfjarðar, þar sem
verið er að búa til stórskipahöfn
vegna framkvæmda á Bakka.
Þurfa að sæta lagi
Um tíu bátar stunda nú veiðar frá
Kópaskeri. Á vorin hrygnir bæði
grásleppa og þorskur á svæðinu og
báta drífur að. Aflabrögð hafa að
undanförnu verið prýðileg, sérstak-
lega á grásleppu. Tíðin hefur verið
með besta móti, miðað við árstíma.
Það sem varpar skugga á vertíðina
eru hafnarskilyrðin. Þegar stendur á
fjöru í stórstreymi er ástandið í höfn-
inni mjög slæmt og bátar hafa þurft
að sæta lagi til að komast til veiða.
Þetta staðfestir hafnarvörður í
samtali við DV. „Það er að fyllast
hérna. Þetta er orðið erfitt fyrir stærri
báta,“ segir Guðmundur Magnússon
í samtali við DV. Hann segir að á stór-
streymisfjöru setjist bátarnir margir
hverjir á kjölinn. „Þetta er vont fyrir
bátana, þeir draga sanddrullu inn í
síur og annað.“
Guðmundur segir að þrjú ár séu
síðan dæluskip kom síðast í höfnina.
Það hafi hins vegar bara dælt í tvo
daga og lítið hafi áunnist. Jafnharðan
hafi runnið ofan í holurnar sem
grafnar hafi verið. Mun meira þurfi
til. „Þetta er dapurt ástand en mér
skilst að það standi til að gera eitt-
hvað.“ Hann staðfestir að sjómenn
láti í sér heyra vegna stöðu mála.
Geta sig hvergi hreyft á fjöru
Grímseyingurinn Sigurður
Hennings son gerir nú út frá
Kópaskeri. „Ég er með 15 tonna bát.
Þetta er alveg á mörkunum þar sem
ég ligg uppi við bryggjuna,“ segir
hann í samtali við DV. Þeir bátar
sem séu innan við sig sitji oft bara á
botninum þegar fjari. Hann segir að
aðalbryggjan sé ekki nothæf nema
að hluta og að fjögurra báta flot-
bryggja rúmi aðeins tvo. „Hitt er bara
sandur.“ Sigurður segir mörg dæmi
þess að bátar hafi þurft að bíða í einn
til tvo tíma til að komast frá bryggj-
unni. Þeir standi oft á kilinum og geti
sig hvergi hreyft.
Farartálminn Jökulsá á Fjöllum
Þórir Örn Gunnarsson, rekstrarstjóri
hafna í Norðurþingi, segir í sam-
tali við DV að málið hafi verið tekið
fyrir á síðasta hafnarnefndarfundi.
Ákveðið hafi verið að fara í vinnu
með Siglingastofnun við að skoða
hvað hægt sé að gera. Leirinn í höfn-
inni sé svo fínn að illa hafi gengið
að fá hann til að tolla í dæluskipinu,
sem síðast var fengið til að dýpka.
Honum skoli jafnharðan út aftur.
Hann segir að það sama myndi gilda
um dýpkunarpramma sem notaður
er við stórskipahöfnina.
Þórir segir að til tals hafi komið að
senda langarma gröfur á vettvang en
brýrnar á svæðinu, sérstaklega yfir
Jökulsá á Fjöllum, komi í veg fyrir að
hægt sé að flytja stórvirkar vinnuvél-
ar á Kópasker. Því sé mönnum vandi
á höndum.
Þess má geta að framburður
Jökuls ár er ástæða þess að höfnin
fyllist af sandi og leir. „Það hefur
ekkert verið ákveðið að loka þessu.
Við viljum helst halda þessu opnu
en þetta er verkefni sem leysa þarf
til framtíðar – hvernig best sé að gera
þetta,“ segir Þórir. Hann segir að mál-
ið sé á frumstigi.
Brothætt byggð
Kópasker er á lista yfir brothættar
byggðir en það er verkefni á vegum
Byggðastofnunar sem ýtt var úr vör
2012, með það að markmiði að efla
þær byggðir sem veikast standa á
landinu. Stofnunin hefur fengið
150 milljónir til ráðstöfunar verk-
efna í þessum byggðum en staða
mála á Raufarhöfn, næstu byggð við
Kópasker, varð kveikjan að verkefn-
inu. Þó að útgerðin á Kópaskeri telji
ekki marga báta og sé auk þess árs-
tíðabundin, skipta tíu litlar útgerðir
miklu máli.
Undir það tekur Olga Gísladóttir,
fulltrúi í meirihluta Sjálfstæðisflokks,
Vinstri grænna og óháðra í sveitar-
stjórn Norðurþings. Í fyrstu línu mál-
efnasamnings sem fulltrúar flokkanna
undirrituðu árið 2014, er kveðið á um að
„áfram verði stuðlað að uppbyggingu
fjölbreytts atvinnulífs, samhliða því að
styrkja stoðir grunnatvinnuveganna í
sveitarfélaginu.“
Reyni að berjast fyrir þessu
Olga, sem er búsett skammt frá
Kópaskeri, segir að höfnin skipti
Kópasker jafn miklu máli og hafnir
stærri og smærri sveitarfélaga allt
landið um kring. Hún sé hluti af hag-
kerfinu í þessari brothættu byggð.
Sú innspýting sem fylgi sjómönnum
sé mikilvæg verslun, heilsugæslu
og annarri þjónustu á svæðinu. „Ég
reyni að berjast fyrir þessu og það er
ekki þannig að þetta sé ekki rætt. En
þetta þykir óhemju dýrt,“ segir Olga
í samtali við DV. Hún segist aðspurð
hrædd um að ekkert verði gert í bráð.
Olga bendir á að mikið púður fari í
framkvæmdir við Bakka á Húsavík –
og það sé svo sem eðlilegt – en fleira
þurfi að gera.
Einn viðmælandi DV hafði að orði
– í gamni og alvöru – að þess væri
ekki langt að bíða að hægt væri að
fá sér göngutúr út að bauju. Heima-
menn óttast að verði ekki gripið til
aðgerða geti bátar einfaldlega ekki
lagt að bryggju. Olga segir að ekki
komi til greina að loka höfninni. „Þá
gæti sá síðasti allt eins slökkt ljósin,“
segir hún við DV. n
Málið á frumstigi Málefni hafnarinnar voru tekin fyrir á síðasta hafnafundi í Norðurþingi.
Aðeins hluti bryggjunnar er nothæfur og bátar lenda í vanda á fjörunni. Mynd inGa siGuRðaRdóttiR
Baldur Guðmundsson
baldur@dv.is
sandur og leir Um tíu bátar eru nú við veiðar frá
Kópaskeri. Þessi mynd var tekin í fyrra en ástandið er
að verða svipað nú. Báturinn á myndinni situr á sand-
inum. Annar bátur ætti, ef allt væri eðlilegt, að komast
að bryggjunni framan við þennan. Mynd haukuR MaRinósson
„Ég reyni að berjast
fyrir þessu og það
er ekki þannig að þetta
sé ekki rætt. En þetta
þykir óhemju dýrt.
HÖFÐABAKKA 3 / 110 REYKJAVÍK / SÍMI 587 2222 / litlagardbudin.is / Við erum á Facebook
Ræktaðu þitt eigið!
Í Litlu garðbúðinni
færðu það sem þú þarft
Laugardaginn
16. apríl
verður opið
kl. 12-16.
Auður
Rafnsdóttir
kynnir bókina
sína Kryddjurtarækt fyrir
byrjendur kl. 12-14
og gefur góð ráð.