Skessuhorn - 31.08.2016, Blaðsíða 31

MIÐVIKUDAGUR 31. ÁGÚST 2016 31
Klettagörðum 15 | 525 7700 | flytjandi.is
DAGLEGA Á FERÐINNI MEÐ
VÖRUR UM ALLT LAND
Eimskip Flytjandi veitir samræmda flutningaþjónustu
um land allt og eru áfangastaðirnir 80 talsins.
Víkingur Ó. tók á móti ÍR í lokaleik
sumarsins í A riðli 1. deildar kvenna
í knattspyrnu síðastliðinn föstudag.
Bæði lið höfðu fyrir leikinn tryggt
sér sæti í úrslitakeppni 1. deildar
svo aðeins var leikið um sæti í riðl-
inum. Með sigri hefðu Víkingskon-
ur tryggt sér annað sætið og þar
með leik gegn Hömrunum í úr-
slitakeppninni. En ÍR vann leik-
inn á föstudag með tveimur mörk-
um gegn einu og Víkingur mætir
því Grindavík í fyrsta leik úrslita-
keppninnar.
ÍR komst yfir strax á 5. mínútu
leiksins þegar Andrea Rún Ólafs-
dóttir skoraði eftir hornspyrnu. En
Víkingskonur jöfnuðu hins vegar
metin þegar rúmur hálftími hafði
verið leikinn. Samira Suleman slapp
ein inn fyrir vörn gestanna og klár-
aði færið af miklu öryggi. Þegar um
tíu mínútur lifðu leiks skoruðu ÍR-
ingar sigurmarkið og aftur var það
eftir hornspyrnu. Marktilraun Lilju
Gunnarsdóttur hafði viðkomu í
varnarmanni Víkinga áður en bolt-
inn fór yfir línuna og 2-1 sigur ÍR
staðreynd.
Víkingur endar því í 3. sæti A
riðils með 28 stig og mætir Grind-
vík í úrslitakeppni 1. deildar, þar
sem leikið er um laust sæti í efstu
deild að ári. Fyrri leikur Víkings og
Grindavíkur í þeirri viðureign verð-
ur leikinn á Ólafsvíkurvelli laugar-
daginn 3. september.
kgk
Víkingskonur mæta Grindavík
í úrslitakeppninni
Sigurmark ÍR var skorað eftir hornspyrnu á 80. mínútu. Boltinn hafði við-
komu í varnarmanni Víkings áður en hann hafnaði í netinu. Ljósm. af.
ÍA tók á móti Víkingi R. í 17. um-
ferð úrvalsdeildar karla í knatt-
spyrnu á sunnudag. Skagamenn
voru betra lið vallarins allan leik-
inn og unnu að lokum sigur með
tveimur mörkum gegn engu. Fyrsta
mark leiksins kom strax á fjórðu
mínútu leiksins. Skagamenn press-
uðu Víkinga hátt og unnu bolt-
ann ofarlega á vellinum. Þórð-
ur Þorsteinn Þórðarson sendi fal-
lega fyrirgjöf utan af kanti beint á
kollinn á Garðari Gunnlaugssyni
sem var einn og óvaldaður á fjær-
stönginni og átti ekki í vandræðum
með að skora. Víkingar fóru beint í
sókn eftir markið og hugðust svara
strax. Þeir fengu ágætt færi en Ár-
mann Smári lokaði vel á skotið og
bægði hættunni frá. Skömmu síðar
var Albert Hafsteinsson nálægt því
að auka forystu Skagamanna. Hann
fékk góða sendingu frá Halli Flosa-
syni utan af kanti en skallaði bolt-
ann í þverslána.
Skagamenn voru mun sterkari
það sem eftir lifði fyrri hálfleiks en
leikmenn Víkings virtust áhuga-
lausir. Engan þurfti því að undra að
næsta mark var Skagamanna. Ár-
mann Smári tók aukaspyrnu fyr-
ir aftan miðju og sendi boltann inn
í teig Víkinga. Garðar tók boltann
niður og lagði hann út á Tryggva
Hrafn Haraldsson sem þrumaði
honum viðstöðulaust í hornið niðri.
Var það hans fyrsta mark fyrir ÍA í
efstu deild.
Síðari hálfleikur var fremur
bragðdaufur framan af. Skagamenn
stjórnuðu gangi mála og Víking-
ar virtust ekki líklegir til neinna af-
reka. Besta færi síðari hálfleiks fengu
Skagamenn á 71. mínútu. Skaga-
menn unnu boltann við eigin víta-
teig. Tryggvi Hrafn geystist af stað
með knöttinn, fór framhjá hverjum
Víkingsmanni á fætur öðrum og lét
vaða frá vítateigsjaðrinum en skot-
ið fór hársbreidd framhjá. Glæsi-
legur sprettur og Tryggvi óheppinn
að skora ekki.
Úrslitin sem fyrr segir 2-0 sig-
ur Skagamanna. Þeir hafa nú unnið
átta af síðustu tíu leikjum sínum og
sitja í 5. sæti deildarinnar með 28
stig eftir 17 leiki. Næst mæta þeir
botnliði Þróttar sunnudaginn 11.
september.
kgk
Öruggur sigur Skagamanna
Tryggvi Hrafn Haraldsson skoraði annað mark Skagamanna í leiknum gegn
Víkingi R. Var það hans fyrsta mark fyrir ÍA í efstu deild. Ljósm. gbh.
Víkingur Ólafsvík mætti FH í 17.
umferð úrvalsdeildar karla í knatt-
spyrnu á Ólafsvíkurvelli á sunnu-
dag. Heimamenn hafa átt erfitt
uppdráttar upp á síðkastið eftir frá-
bæra byrjun í mótinu en FH trón-
ir sem kunnugt er á toppi deild-
arinnar og stefnir hraðbyri að Ís-
landsmeistaratitlinum. Leikurinn
fór fremur hægt af stað. FH-ing-
ar voru meira með boltann og létu
hann ganga á milli sín en Víking-
ar biðu átekta. Fyrsta alvöru færi
leiksins kom ekki fyrr en á 30. mín-
útu og það var gestanna. Varnar-
menn Víkinga virtust hafa gleymt
sér og Atli Guðnason fékk bolt-
ann óvaldaður á fjærstöng en skaut
beint á markið og Christian Libe-
rato varði auðveldlega. Gestirnir
úr Hafnarfirði voru áfram sprækari
og komust yfir á 42. mínútu. Jo-
nathan Hendrickx tók hornspyrnu
sem sveif alla leið á fjærstöng þar
sem Atli Viðar Björnsson var einn
á auðum sjó og átti ekki í vand-
ræðum með að koma boltanum á
netið. Gestirnir fóru því með eins
marks forystu inn í leikhléið.
Leikmenn Víkings mættu
ákveðnir til síðari hálfleiks, beittu
löngum sendingum og reyndu
að jafna metin. Hrvoje Tokic átti
skemmtilega tilraun þegar hann
tók boltann viðstöðulaust eftir háa
sendingu fram völlinn en skot hans
rétt yfir markið. Það voru hins veg-
ar FH-ingar sem bættu við marki á
62. mínútu og aftur var það eftir
hornspyrnu. Hendricks spyrnti og
Hafnfirðingar fjölmenntu í mark-
teig Víkinga. Eftir mikinn atgang
á fjærstöng kom Emil Pálsson
boltanum í átt að marki. Liberato
greip boltann og hljóp með hann
frá markinu en línuvörðurinn lyfti
hins vegar flaggi sínu til marks um
að boltinn hafi farið yfir línuna.
Dómari leiksins dæmdi markið því
gott og gilt en Víkingar allt ann-
að en sáttir.
Víkingar gerðu hvað þeir gátu
og voru nálægt því að komast í
dauðafæri þegar 20 mínútur lifðu
leiks. Þorsteinn Már vann boltann
af miklu harðfylgi og hann og To-
kic voru komnir tveir á móti ein-
um við miðlínu vallarins. Sending
Þorsteins misheppnaðist hins veg-
ar og fór beint í varnarmann FH-
inga.
Víkingar komust ekki lengra og
náðu ekki að minnka muninn, alltaf
vantaði herslumuninn upp á sókn-
araðgerðir þeirra. Úrslit leiksins
því tveggja marka sigur FH. Vík-
ingar sitja nú í 9. sæti deildarinnar
með 19 stig eftir 17 leiki, einu stigi
á undan næsta liði og fimm stigum
fyrir ofan fallsæti. Þar situr Fylkir
sem er einmitt næsti mótherji Vík-
inga. Liðin mætast á Fylkisvelli
sunnudaginn 11. september í gríð-
arlega mikilvægum leik.
kgk
FH-ingar fagna markinu umdeilda en Víkingar mótmæla. Erfitt var að sjá hvort
boltinn fór yfir línuna en dómari leiksins fylgdi merki línuvarðarins og markið
stendur. Ljósm. af.
Víkingur tapaði fyrir toppliði FH
Miðvikudaginn 24. ágúst lauk
þrettándu umferð Pepsi deild-
ar kvenna í knattspyrnu. Þá léku
Skagakonur gegn Fylki á Akranes-
velli í mikilvægum fallbaráttuslag.
Aðeins tveimur stigum munaði á
liðunum fyrir leikinn; Fylkir var í
sjöunda sæti með tíu stig og ÍA í
því níunda með átta stig. Það var
því mikið undir hjá Skagakonum
sem hefðu með sigri getað lyft sér
upp úr fallsæti. Leiknum lauk þó
með sigri Fylkis með einu marki
gegn engu og færist Fylkir þar
með fjær botninum. Skagakonur
eru enn í baráttunni um að halda
sæti sínu í deildinni því þrátt fyrir
tapið eru þær enn aðeins tveimur
stigum frá liði Selfoss sem er í átt-
unda sæti.
Jafnræði var með liðunum í fyrri
hálfleik. Ekki var mikið um færi
og voru bæði lið þétt til baka og
beittu háum boltum fram á við og
virtust ekki ætla að gefa færi á sér.
Besta færi hálfleiksins kom eftir 36
mínútna leik. Skagakonur fengu þá
aukaspyrnu út á hægri kanti. Auka-
spyrnan var virkilega góð og Meg-
an Dunnigan náði fínum skalla
sem fór rétt yfir markið. Leikurinn
var markalaus þegar dómari leiks-
ins flautaði til hálfleiks.
Skagakonur komu grimmari inn
í síðari hálfleikinn og náðu að skapa
sér nokkur góð færi. Á 49. mínútu
skoraði Megan fyrir Skagakonur
en markið var dæmt af vegna rang-
stöðu og voru Skagakonur alls ekki
sáttar við þann dóm.
Skagakonur héldu áfram að
sækja að marki Fylkis en náðu ekki
að skora. Það var Eva Núra Abra-
hamsdóttir sem skoraði fyrsta og
eina mark leiksins á 76. mínútu.
Eva fékk boltann rétt fyrir fram-
an miðjubogann á vallarhelmingi
ÍA. Hættan virtist lítil en Eva sá að
Ásta í marki ÍA stóð framarlega og
vippaði boltanum af þrjátíu metra
færi yfir Ástu.
Eftir markið náðu Skagakonur
ekki að skapa sér mikið og land-
aði Fylkir því þremur mikilvægum
stigum. ÍA leikur næsta leik í dag
(miðvikudag) klukkan 17:00 gegn
ÍBV á Akranesvelli. bþb
Leikurinn var mikill baráttuleikur enda mikið í húfi fyrir bæði lið.
Ljósm. Guðmundur Bjarki.
Skagakonur töpuðu í
mikilvægum fallbaráttuslag