Skessuhorn - 03.10.2018, Blaðsíða 26

MIÐVIKUDAGUR 3. OKTÓBER 201826
Harbour Hostel er til húsa í næst-
elsta steinhúsinu í Stykkishólmi, við
Hafnargötu 4. Húsið var upphaf-
lega byggt sem íshús og hýsti seinna
bókabúð og ritfangaverslun lengst
af. Gistiheimilið eiga hjónin Sigríð-
ur Jóhannesdóttir og Skarphéðinn
Berg Steinarsson með fjórum systk-
inum sem öll eru úr Stykkishólmi.
„Það var í raun tilviljun að við keypt-
um þetta hús með fleirum. Við sáum
möguleika á að koma þarna fyrir
gistiheimili og létum verða af því.
Að vísu þurfti að gera margvíslegar
breytingar á húsinu og það gerðum
við með þáverandi meðeigendum
okkar,“ segir Sigríður í samtali við
Skessuhorn. Hostelið opnaði í byrj-
un maí árið 2013 og er því rétt yfir
fimm ára gamalt.
Afslappað og þægilegt
andrúmsloft
Sigríður og Skarphéðinn hafa fengist
við ýmislegt í gegnum tíðina. Áður
en Sigríður kom að rekstri starfaði
hún meðal annars í verslun og þar
á undan við kennslu. Skarphéðinn
hefur verið í ýmsum rekstri tengdum
ferðaþjónustu undanfarin ár. „Lengst
af önnuðumst við reksturinn saman,
við hjónin, en núna er Skarphéðinn
kominn í annað starf og hef ég því
umsjón með rekstrinum. Við erum
hins vegar með frábæra starfsmenn
sem hafa reynst okkur mjög vel í
daglegum rekstri. Við erum einstak-
lega heppin með fólkið okkar,“ seg-
ir Sigríður. Á sumrin starfa um fimm
manns á hostelinu en á veturna eru
það færri.
Herbergin sem eru í boði eru tíu
talsins og mismunandi að stærð.
Hægt er að bóka tveggja, fjögurra,
átta manna eða tólf manna herbergi.
Alls eru rúmin 46 og er vinsælt fyr-
ir hópa sem þekkjast að koma í gist-
ingu sem og einstaklinga sem þekkj-
ast ekkert, en eru þá á sínu eigin
ferðalagi. „Andrúmsloftið á hostel-
inu er mjög afslappað og þægilegt.
Hér spjalla gestir saman, lesa eða
fá sér bjórglas á setustofunni. Í eld-
húsinu er oft meira fjör þegar gestir
af ýmsum þjóðernum eru að elda og
reglulega berst ljúffengur matarilm-
ur um húsið,“ segir Sigríður glöð.
„Hér hafa gestir kynnst vel, mynd-
að sterk vinabönd og í sumum tilvik-
um ákveðið að ferðast saman í fram-
haldinu. Það var einu sinni sem ástin
kviknaði á milli tveggja gesta og þeir
yfirgáfu hostelið saman á rósrauðu
skýi. Á Harbour Hostel getur allt
gerst og enginn dagur er eins.“
Upphaflega byggt
sem íshús
Dagbjört Höskuldsdóttir er fyrrum
eigandi steinhússins við Hafnargötu.
Dagbjört er vel kunnug sögu húss-
ins og gaf sér tíma með blaðamanni
Skessuhorns til að rifja upp sög-
una sem byrjaði snemma á 20. öld.
„Húsið er sagt byggt 1915,“ byrjar
hún frásögn sína. „Hér var félag sem
hét Ísfélag Stykkishólms og bygg-
ir þetta svokallaða íshús. Þetta voru
hús sem voru höfð með miklum og
þykkum veggjum sem náðu að ein-
angra vel.“ Íshúsið fer síðar í eigu
Thors Jensens, sem var athafnamað-
ur mikill um Suður- og Vesturland
og átti eignir víða. Síðan þá var hús-
ið alltaf kallað Íshús Thors Jensens.
„Í þá daga fóru menn upp í tjarnir
á veturna, hjuggu ísblokkir og fluttu
þær inn í þetta íshúsið. Þetta lengdi
geymslutíma á kjöti og fiski,“ útskýr-
ir Dagbjört.
Árið 1936 flytja til Stykkishólms
þau Sesselja Konráðsdóttir, sem ráð-
in var til bæjarins sem skólastjóri
og kennari, og maðurinn hennar
Jón Ólafur Eyjólfsson. „Þau hjónin
kaupa íshúsið og byggja ofan á það
þessa hæð hér og hluta af efri hæð-
inni sem var eins og kassi upp úr
miðjunni. Þetta var mjög sérstakt
og þannig var húsið lengi. Þau sem
sagt búa í húsinu og eiga heilmikið af
börnum. Þekktastur var líklega Eyj-
ólfur Konráð Jónsson heitinn, þing-
maður með meiru. Þau ala hér upp
sín börn, útbúa síðan verslun akk-
úrat þar sem við erum núna,“ segir
Dagbjört og lítur yfir rýmið þar sem
viðskiptavinir Kaffi Nú, sem einnig
er til húsa á hostelinu, drekka kaffið
sitt. „Þetta var bóka- og ritfanga-
verslun lengst af. Að auki var Jón lag-
inn rakari og klippti menn og snyrti
þangað til þau hjónin fluttu burtu.
Þá tóku Sigurður Jónasson og kona
hans, Svava Oddsdóttir, við rekstr-
inum. Þau efldu verslunina talsvert,
ráku hér hörkuverslun og seldu bæk-
ur, leikföng, vefnaðarvöru, fatnað og
skó. Ég var eins og húsköttur í búð-
inni hjá þeim, alltaf að skoða bæk-
ur,“ segir Dagbjört og hlær. Þeg-
ar aldurinn var farinn að segja til
sín hjá Svövu og Sigurði tók dóttir
þeirra, Ingveldur Sigurðardóttir, við
rekstrinum ásamt Kristni Gestssyni
manni sínum. Dagbjört festi síðan
kaup á húsinu og versluninni árið
1995. „Ég og maðurinn minn, Ey-
þór Ágústsson, keyptum húsið og
breytum því að innan ásamt búðinni.
Búðin var skemmtileg. Við að vísu
vorum ekki með vefnaðarvörur en
það var allt mögulegt selt hjá okkur.
Stundum komu meira að segja gaml-
ir strákar sem könnuðust vel við sig
í húsinu og rifjuðu upp þegar Jón
var að klippa þá í gamla daga,“ seg-
ir Dagbjört glöð. „Maðurinn minn
lést 2011 og ég rak verslunina í hálft
annað ár, eftir það treysti ég mér
ekki að reka svona stórt hús.“
Þetta hús er næstelsta steinhúsið í
Stykkishólmi en Dagbjört segir það
ennþá ráðgátu hver hannaði húsið.
„Ég hef ekki fengið upp hvort það
var arkitekt á bakvið húsið eða ekki.
Það er ekki í fasteignaskrám. Ég er
búin að spyrja afkomendur fyrri
eiganda og fleiri,“ segir Dagbjört.
Húsið var mjög nýtískulegt á þeim
tíma sem það er reist í mjög sérstök-
um kastalastíl. Það hafa alltaf verið
skiptar skoðanir á húsinu enda sker
það sig heldur betur út innan um öll
timburhúsin í bænum. „Gömul hús
hafa sögu og það er svo skemmti-
legt,“ segir Dagbjört að endingu.
„Færri á ferðinni í
sumar“
Sigríður segir reksturinn hafa
gengið ágætlega í sumar þó svo að
hafa orðið vör við örlitla fækkun
á gestum frá síðasta sumri en ætla
má að mikil væta í sumar hafi áhrif
þar. „Það virðast vera aðeins færri
á ferðinni í sumar heldur en síð-
ustu ár og það virðist vera staðan
víða á svæðinu í kring. Aftur á móti
eru aðrar árstíðir betri en á síðasta
ári. Það er mest af erlendum ferða-
mönnum sem bóka gistingu hjá
okkur og lítið um Íslendinga. Hér
hefur komið fólk af öllum þjóðern-
um en gestir frá Suður-Evrópu eru
fjölmennari á sumrin. Heilt yfir eru
Bandaríkjamenn áberandi og fjöl-
mennastir,“ segir Sigríður.
Í sumar opnaði kaffihúsið Kaffi
Nú í húsinu og hefur gengið vel.
„Hugmyndin kviknaði vegna þess
að nokkrir af starfsmönnum okkar
höfðu áhuga á að reyna fyrir sér með
slíkt. Þetta var reynt um tíma í hús-
inu en var síðar lokað. Við vildum
samt sem áður reyna aftur og það
hefur gengið vel,“ segir Sigríður um
kaffihúsa reksturinn.
Nú fer að líða að enda vertíðar-
innar þetta árið og hyggst Sigríður
loka hostelinu frá nóvember og fram
í febrúar á næsta ári. Þannig hefur
því yfirleitt verið háttað og gerir Sig-
ríður ráð fyrir að hafa það svipað í ár.
glh
„Á Harbour Hostel getur allt gerst og enginn dagur er eins“
Sigríður Jóhannesdóttir ræðir reksturinn í einu elsta steinhúsi Stykkishólms.
Næstelsta steinhúsið í Stykkishólmi hýsir nú hostel og kaffihús.
Sigríður ásamt samstarfsfólki sínu. Ljósm. aðsend.
Það sem er nú hugguleg setustofa var einu sinni verslunarrými.
Kaffi Nú var sett á laggirnar fyrr í sumar og hefur verið vel tekið.
Alls eru 46 rúm á Harbour Hostel.
Dagbjört Höskuldsdóttir er fyrrum eigandi hússins og þekkir vel til sögu stein-
hússins.