Morgunblaðið - 14.11.2019, Blaðsíða 16

16 FRÉTTIRInnlent
MORGUNBLAÐIÐ FIMMTUDAGUR 14. NÓVEMBER 2019
Sigtryggur Sigtryggsson
sisi@mbl.is
Mjög mikill áhugi var hjá félags-
mönnum Búseta á að tryggja sér
íbúðir í nýbyggingum við Keilu-
granda í Vesturbæ Reykjavíkur, en
þær verða tilbúnar til afhendingar á
næsta ári. Í boði voru 78 íbúðir af
ýmsum stærðum.
Opnað var fyrir umsóknir 16.
október og umsóknarfresti lauk 30.
október. Alls bárust 662 umsóknir í
fyrstu úthlutun. Hver umsækjandi
getur sótt um fleiri en eina íbúð og
forgangsraðað.
Samkvæmt upplýsingum Ágústu
Guðmundsdóttur, markaðsstjóra
Búseta, er staðan sú að 65 af 78
íbúðum eru seldar. Því eru enn
lausir til umsóknar 13 búseturéttir,
sem eru auglýstir undir formerkj-
unum fyrstur kemur fyrstur fær.
Fólk getur því gengið í félagið í
dag, sótt um einhverjar af þessum
13 íbúðum og gengið frá samningi.
Um er að ræða stúdíó, tveggja,
þriggja og fjögurra herbergja íbúð-
ir.
Yfir 80% íbúða seldust strax
Bjarni Þór Þórólfsson, fram-
kvæmdastjóri Búseta, segir að þrátt
fyrir að nú sé heldur rólegra á fast-
eignamarkaðnum á höfuðborgar-
svæðinu hafi sala á Keilugranda
gengið vel og það verði að teljast
gott að yfir 80% íbúðanna hafi selst
á einni viku. Hann bendir á að stað-
setningin í Vesturbænum sé einstök
og hvergi hafi verið slegið af kröf-
um hvað gæði íbúðanna varðar.
Hluti íbúðanna 78 á reitnum eru
svokallaðar stúdíóíbúðir, sem ekki
síst eru ætlaðar þeim sem eru að
kaupa sína fyrstu íbúð. Búsetu-
réttur í þeim íbúðum kostar undir
fimm milljónum króna og mánaðar-
legt búsetugjald er frá 110 þúsund
krónum.
Í boði er fjármögnunarleið, í sam-
starfi við viðskiptabanka Búseta,
sem gerir fólki kleift að flytja í nýja
íbúð fyrir 2,3 milljónir króna. Þá er
miðað við 50% fjármögnun búsetu-
réttar á 4,6 milljónir króna. „Verk-
efnið var m.a. hugsað sem hag-
kvæmur og aðgengilegur kostur
fyrir ungt fólk til að eignast sitt
fyrsta heimili með viðráðanlegum
hætti í vönduðum húsum,“ segir
Bjarni Þór.
Aldursdreifing kaupenda að íbúð-
unum við Keilugranda er nokkuð
jöfn en athygli vekur að af þeim
hópi eru 22 á aldrinum 20-25 ára.
Að sögn Ágústu eru í dag rúm-
lega 5.100 félagsmenn í Búseta.
Rúmlega 1.000 af þeim eru búsetu-
réttarhafar. Hluti af félagsmönnum
er börn og ungmenni yngri en 18
ára sem búa að því síðar að eiga
lágt félagsnúmer. Aðrir vilja vera í
félaginu upp á seinna tíma ef fjöl-
skylduaðstæður breytast og/eða
vilja binda minna fjármagn í eign
þegar þeir eru komnir á efri ár.
Bjarni Þór segir að talsverður
fjöldi ungs fólks, jafnvel fyrir tilstilli
foreldra, gerist félagsmenn í Bú-
seta. Félagsmenn geta keypt bú-
seturétt þegar þeir eru orðnir lög-
ráða, 18 ára að aldri. „Þegar íbúðir,
eins og þessar á Keilugranda, koma
í sölu eru margir ánægðir að hafa
verið félagsmenn lengi og þar með
haldið sínu númeri og borgað hóf-
legt árgjald, 5.500 krónur fyrir full-
orðna og hálft gjald fyrir börn. Að
geta eignast sitt fyrsta heimili með
þessum hætti er nokkuð sem marg-
ir kunna að meta,“ segir Bjarni.
Allar áætlanir stóðust
Hann segir að Búseti hafi kapp-
kostað að sýna varfærni í öllum
undirbúningi og áætlunargerð varð-
andi Keilugrandaverkefnið. Verkið
standist áætlanir varðandi tíma-
ramma og fjárhæðir.
Fram kemur á heimasíðu Búseta
að um sé að ræða húsnæðis-
samvinnufélag að norrænni fyr-
irmynd sem bjóði upp á um 1.100
íbúðir á höfuðborgarsvæðinu.
Kaup á búseturétti sé valkostur
fyrir þá sem vilja mun meira öryggi
og festu en einkennir leigumark-
aðinn en vilja ekki endilega kaupa
fasteign. Búseturétthafi þurfi ekki
að hafa áhyggjur af viðhaldi utan-
húss og öðru sem fylgir því að eiga
og reka fasteign.
Einungis búseturétthafi getur
ákveðið að selja búseturéttinn. Ef
hann ákveður að selja er búsetu-
rétturinn uppreiknaður á grundvelli
vísitölu neysluverðs.
Íbúðir við Keilugranda ruku út
 Búseti seldi 65 af 78 íbúðum fyrstu vikuna sem þær voru í sölu  Hluti íbúðanna stúdíóíbúðir sem
m.a. voru ætlaðar fyrstu kaupendum  Gerir fólki kleift að flytja í nýja íbúð fyrir 2,3 milljónir króna
Nýbyggingar Búseta Unnið er á fullu við húsin, sem eiga að verða tilbúin næsta sumar. Í baksýn má sjá Melana og
íþróttasvæði KR við Frostaskjól. Við Keilugranda stóð áður vöruskemma fyrir saltfisk, sem rifin var árið 2017.
Tölvumynd/A2F arkitektar
Keilugrandi Framhlið stærstu byggingarinnar. Gott útsýni er yfir Flóann.
Ágústa
Guðmundsdóttir
Bjarni Þór
Þórólfsson
Ljósmynd/Búseti
Fjögur tilboð bárust í smíði nýrrar
brúar yfir Kvíá í Öræfum, en tilboð
voru opnuð hjá Vegagerðinni í vik-
unni. Þegar fyrst var auglýst eftir
tilboðum í verkið í júní í sumar barst
ekkert tilboð. Því auglýsti Vega-
gerðin verkið á nýjan leik.
Spennt ehf. Reykjavík bauð best
eða rúmar 360 milljónir. Var það að-
eins yfir áætluðum verktakakostn-
aði, sem var 340,7 milljónir. Þing-
vangur ehf., Reykjavík átti næst-
lægsta tilboðið, 369,5 milljónir.
Tilboð frá Ístaki hf. og Eykt ehf.
voru talsvert hærri.
Hin nýja brú á hringvegi verður
32 metra löng í einu hafi. Hún mun
leysa af hólmi eldri einbreiða brú,
sem tekin var í notkun 1974. Land-
stöplar nýrrar brúar verða steyptir,
grundaðir á boruðum stálstaurum
innfylltum með steypu. Yfirbygging
brúar samanstendur af lokuðum
stálbitum með steyptu gólfi. Vega-
tengingar verða 400 metrar, beggja
vegna við brúna.
Enn eru margar einbreiðar brýr á
hringveginum, með tilheyrandi
slysahættu. Átak hefur verið gert til
að fækka þessum brúm. sisi@mbl.is
Morgunblaðið/Ásdís
Einbreið Átak hefur verið gert undanfarin ár til að fækka þessum brúm.
Fjögur tilboð í smíði
brúar yfir Kvíá
DUXIANA Reykjavik | Ármuli 10 | Reykjavik | +354 5 68 99 50 | www.duxiana.is
GÆÐI OG ÞÆGINDI
SÍÐAN 1926
DUX 1001 - VÍÐÞEKKT ÞÆGINDI
Byggt á fyrsta DUX rúminu sem var framleitt árið 1926, þetta er sannarlega það sem draumar eru byggðir á.