Fréttablaðið - 14.12.2002, Blaðsíða 22

22 14. desember 2002 LAUGARDAGUR
Fréttablaðið leitaði álits hjá sér-
fróðu fólki í þeim tilgangi að finna
besta og jafnframt versta jólalag-
ið, því ekkert er ljós án skugga.
Miðað er við íslensk lög en sum
jólalög eru reyndar þess eðlis að
Íslendingar hafa slegið eign sinni
á þau. Í því samhengi leikur flytj-
andinn stórt hlutverk, hvort held-
ur er til góðs eða ills. Elínborg
Halldórsdóttir, eða bara Ellý í
Q4U, segist ekki fara varhluta af
jólalögunum núna í desember.
Börnin reyna rækilega á geð-
heilsu hennar með því að spila
Snæfinn Snjókarl í sífellu og þá
ekki síður Ég hlakka svo til, ég
hlakka svo til... Ellý er þeirrar
skoðunnar að sannarlega megi of-
spila lög þannig að þau beri ekki
sitt barr.
Dóp og jól ríma ekki
Karl Örvarsson tónlistarmaður
tekur undir það og bendir á að
jólalög séu framleidd í stórum stíl
enda eftir nokkru að slægjast fyr-
ir tónlistarmenn því spilun jóla-
laga sem ná í gegn sé gegndarlaus
í desember. Karl hitti sjálfur á
tóninn þegar hann söng lagið Jóla-
stund með Stuðkompaníinu um
árið. „Jólastundin hefur, í blank-
heitum tónlistarmannsins á Ís-
landi, bjargað jólagjöf fyrir kon-
una mörg undanfarin ár. Allar út-
varpsstöðvar spila þetta lag en
síst þó Rás 2. Því miður er sú út-
varpsstöð notuð sem skráningar-
viðmiðið og borgað samkvæmt
því. Ég hlýt að benda á að Jóla-
stundin er miklu meira spiluð en
opinberar tölur segja um og hefur
jólagjöfin til konunnar rýrnað af
þeim sökum með árunum.“
„Maður gerir ekki jólalag til að
græða pening,“ segir Bubbi
Morthens hneykslaður. Bubbi hef-
ur aldrei samið jólalag en nú gæti
farið að bresta á með jólaplötu frá
Bubba. Hann segist hafa verið
dópaður á árum áður og því ekki
beint í jólagírnum. „Þetta er ára-
langur prósess að mínu viti, mað-
ur þarf að upplifa þetta með börn-
unum, skórinn úti í glugga, ganga
í kringum jólatré og svo framveg-
is. Nú er ég búinn að vera edrú í
nokkur ár og fer að senda frá mér
jólaplötu.“ Aðspurður um bestu
jólalögin nefnir Bubbi plötuna
Hátíð í bæ með Hauki frænda.
Hún er Jólaplatan með stóru Joði
að mati Bubba og hann nefnir til
sögunnar titillagið og Ef hjá hon-
um pabba einn fimmeyring ég
fengi. Það vandast málið þegar
kemur að hinum verri lögum:
„Ekki gera mér það. Ég er orðinn
grand old man og bara get ekki
fengið mig til þess.“ Og sjálfur
Bubbi Morthens hlýtur að komast
upp með það þó það teljist til tíð-
inda að hann hafi ekki lengur geð
í sér að stíga á líkþorn.
Bestu jólalögin ekki endi-
lega jólalög
Tónlistarsérfræðingurinn Jón-
atan Garðarsson segir gríðarlega
mikið til af jólalögum og mörgum
ágætum. Hann nefnir lag sem
reyndar komst ekki á lista hans:
Þessi blessuð jól eftir Gísla
Helgason við texta Iðunnar
Steinsdóttur. „Þetta er lítil perla
sem einhvern tíma á eftir að
glitra.“ Erfiðara var að nefna hin
verri – einfaldlega vegna þess að
þau eru svo slæm og því ekki eft-
irminnileg.
Söngkonan og stjarnan Birgitta
Haukdal átti í stökustu vandræð-
um með að velja sinn lista, eink-
um vond jólalög. Hin betri stóðu
einnig í Birgittu. „Þið eruð rosa-
lega vond við mig að leyfa mér
bara að velja þrjú lög. Ég fór í
gegnum plötusafnið mitt og fann
fjölda fínna jólalaga.“ Birgitta
fékk undanþágu stöðu sinnar
vegna og þurfti ekki að velja allra
versta jólalagið. Hún bindur eink-
um jólastemninguna við plötu
með Boney M, eign móður hennar,
sem alltaf var sett á fóninn til að
framkalla rétta andann og þar var
Little Drummer Boy í algjöru
uppáhaldi.
Óli Palli, tónlistarstjóri og dag-
skrárgerðarmaður, spilar um
þessar mundir jólalög í gríð og
erg á Rás 2 og merkilegt nokk,
hann er ekki kominn með leið á
þeim. „Ég hef alltaf haft gaman af
jólamúsík, sem pirrar mig ekki
eins mikið og marga aðra. Mér
finnst að allir tónlistarmenn ættu
að gera jólaplötu.“ Óli Palli kemur
með athyglisverðan punkt í þessa
umræðu og bendir á að bestu jóla-
lögin séu oft ekki jólalög upphaf-
lega og nefnir sem dæmi White
Christmas og Fairytale of New
York. „Þá er og merkilegt að þau
jólalög sem yfirleitt eru flutt á
jólatrésskemmtunum eru mörg
hver dönsk að uppruna og leikin
þar á sumarskemmtunum.“
jakob@frettabladid.is
Bestu og verstu jólalögin:
Blessuð jólalögin
gleðja og... ergja
Enginn kemst hjá því að
heyra jólalögin nú um
stundir nema loka sig af
einhvers staðar utan al-
faraleiðar. Lögin ýmist
gleðja, kæta og koma
mönnum í réttu stemn-
inguna eða reyna veru-
lega á taugar fólks.
„Ég er algjört jólabarn. Í stað-
inn fyrir að baka smákökur bjó
ég til jólalög. Ég á svo góða vini
sem baka handa mér smákökur,“
segir Ingibjörg Þorbergs, sem
sigraði stórglæsilega í þessari
óformlegu könnun Fréttablaðsins.
Hún átti í harðri keppni við sjálfa
sig því Hin fyrstu jól og Jólakött-
urinn voru hnífjöfn og teljast
samkvæmt þessu bestu jólalögin.
„Þetta er aldeilis flott. Hin
fyrstu jól er sennilega þekktara
lag, hefði ég talið. Einhver sagði
við mig: Er þetta eftir þig? Ég
hélt að þetta væri eftir Irving
Berlin eða einhvert amerískt tón-
skáld. Þetta er fyrsta jólalagið
sem var gefið út sem ekki var
beinlínis sálmur.“
Tage Ammendrup bað Ingi-
björgu um að gera jólalag fyrir
hartnær hálfri öld en hann rak þá
hljómplötuútgáfuna Drangey.
Kristján frá Djúpalæk gerði
texta við í hvelli en þá var Ingi-
björg með barnatíma í útvarpinu.
Ingibjörg gerði seinna lög við
texta Jóhannesar úr Kötlum og
hringdi Jóhannes í Ingibjörgu og
boðaði hana á sinn fund á skrif-
stofu sína hjá Máli og menningu.
Þar lýsti hann yfir ánægju með
lögin. „Mér þótti ákaflega vænt
um það. Hann lét mig hafa Ingu
Dóru vísur sínar og bað mig að
semja lög við þær, sem ég og
gerði, en það hefur reyndar aldrei
komið út á plötu.“
Verðugt verkefni er fyrir tón-
listarmenn að skoða nótnabók
Ingibjargar en ekki hefur helm-
ingur laga hennar verið gefinn út.
Hróður þessa snjalla lagahöfund-
ar hefur borist út fyrir landstein-
ana en hún fékk nýlega senda
spólu frá jóladagskrá BBC í Skot-
landi en þar voru lög hennar tek-
in til flutnings. „Ofboðslega hafði
ég gaman af því. Þarna eru kátir
krakkar að syngja og gera það
vel.“ ■
INGIBJÖRG ÞORBERGS
Hinar góðu viðtökur Jóhannesar úr Kötlum, sem
samdi Jólaköttinn, glöddu Ingibjörgu mjög.
Jólalög í staðinnfyrir smákökur
„Mér er gersamlega fyrirmun-
að að skilja þetta fólk,“ segir
Skúli Gautason um álitsgjafa
Fréttablaðsins en lag hans Jóla-
hjól hlaut afgerandi kosningu
sem versta jólalagið. Næstu lög á
lista yfir hin „verri“ lög náðu
ekki að keppa við Jólahjólið að
neinu marki. Helst var að jóla-
trésskemmtunarlögin, sem einnig
hlutu slæma útreið, næðu að ógna
lagi Skúla.
Niðurstaðan kemur nokkuð á
óvart sé tekið tillit til vinsælda
lagsins. Höfundurinn tekur þó
tíðindunum með gleði í hjarta:
„Alltaf skemmtilegra að vera
umdeildur en að allir séu á einu
máli.“
Skúli samdi Jólahjól árið 1984
og það því orðið lögráða. Skúli
segir það veita sér ómælda gleði
að heyra fólk raula lagið fyrir
munni sér á götum úti. Það eru
ríkulegustu launin. Sá tími ársins
er skammur sem lagið er í spilun
og STEF-gjöldin ekkert sem máli
skiptir í bókhaldinu. „Nei, ég
skammast mín ekki fyrir lagið og
finnst reyndar notalegt að heyra
það. Ég hef samið mörg lög sem
ég hef fengið leiða á en það á
ekki við um Jólahjólið.“
Skúli hefur samið tvö önnur
jólalög sem bíða útgáfu og verður
forvitnilegt að fylgjast með gengi
þeirra því fullyrða má að Jólahjól
sé með vinsælli jólalögum á Ís-
landi og hefur verið lengi. ■
Skammast mínekki fyrir lagið
SKÚLI GAUTASON
Flemtri sleginn þegar honum
bárust tíðindin. Hann skilur ekki hvers
vegna Jólahjólin „sigra“ í flokki verri laga
því sjálfur er hann ekki búinn að fá leið á
þessu lagi sínu öfugt við mörg önnur sem
hann hefur samið.
Nóvember – Desember
Jólahlaðborð
frá 29. nóvember
Skötuveisla
23. desember
Velkominn í jólahlaðborðið okkar
Einar Geirsson
Yfirmatreiðslumaður
Opnunartími
Hádegi mán. – föst. 12.00 – 14.00
Kvöld alla daga frá 18.00
tveir fiskar
( við Reykjavíkurhöfn )
Geirsgata 9 • 101 reykjavik
sími 511 - 3474
netfang restaurant@restaurant.is
heimasíða www.restaurant.is