Skessuhorn - 27.11.2019, Qupperneq 14
MIÐVIKUDAGUR 27. NóVEMBER 201914
Umhverfis- og auðlindaráðherra
áformar að leggja á vorþingi fram
frumvarp til laga um þjóðgarð á
miðhálendi Íslands. Áformin um
frumvarpið hafa nú verið kynnt og
sett í samráðsgátt stjórnvalda til
umsagnar. Frestur til að skila um-
sögn er til og með 4. desember
2019. Drög að frumvarpi um þjóð-
garðinn munu einnig verða kynnt í
samráðsgátt þegar þar að kemur.
Eins og kunnugt er hefur þver-
pólitísk nefnd um undirbúning
að stofnun þjóðgarðsins unnið að
áherslum sem frumvarpið mun
byggja á. Andstaða við frumvarp-
ið er engu að síður töluverð meðal
sveitarfélaga á landsbyggðinni sem
líta á það sem afsal skipulagsvalds
að færa umráð hálendisins til ríkis-
stofnunar. Engu að síður er kveðið
á um stofnun þjóðgarðs á miðhá-
lendinu í stefnuyfirlýsingu ríkis-
stjórnarinnar og umræddri þver-
pólitískri nefnd var komið á fót
um stofnun hans. Nefndin hefur
verið að störfum síðan vorið 2018.
Nefndinni var m.a. ætlað að skil-
greina mörk þjóðgarðsins, setja
fram áherslur um skiptingu land-
svæða innan hans í verndarflokka,
gera tillögur að helstu áherslum í
stjórnunar- og verndaráætlun og
atvinnustefnu fyrir þjóðgarðinn,
taka afstöðu til stjórnskipulags
hans, fjalla um svæðisskiptingu og
rekstrarsvæði og greina tækifæri
með stofnun þjóðgarðs á byggða-
þróun og atvinnulíf. Nefndin hefur
nú kynnt í samráðsgátt stjórnvalda
hugmyndir að einstökum þáttum
sem hún hefur fjallað um. Síðustu
tvö áhersluatriði nefndarinnar voru
kynnt í samráðsgátt í október, ann-
ars vegar umfjöllun um fjármögnun
og hins vegar áherslur í lagafrum-
varpi.
mm
Vilhjálmur Egilsson lætur af störf-
um sem rektor Háskólans á Bif-
röst næsta vor, en hann hefur gegnt
starfinu síðan 2013. „Meining-
in er að ég hætti í lok skólaársins.
Ég var upphaflega ráðinn 2013 og
fyrsta ráðningin var til fjögurra ára.
Hún var síðan framlengd um þrjú
ár. Ástæðan er sú að ég verð 67 ára
núna í desember og er að færast á
lífeyrisaldur. Að minni hálfu snerist
málið um að finna heppilegan tíma-
punkt til að stíga inn í þennan nýja
kafla í lífi mínu. Þá urðu allir ásátt-
ir um að ég framlengdi til þriggja
ára og samningurinn minn rennur
því út eftir þetta skólaár sem nú er
hafið, sem er bara mjög viðeigandi
að mínum dómi,“ segir Vilhjálmur
í samtali við Skessuhorn.
Alltaf liðið vel á Bifröst
Vilhjálmur er að útbúa sér te þeg-
ar síminn hringir. Hinum megin á
línunni er sá er þetta ritar. Rektor-
inn dýfir pokanum í heitt vatnið og
gengur að skrifborðinu á skrifstofu
sinni áður en samtal okkar heldur
áfram. Hann tyllir sér í stólinn og
lætur fara vel um sig og hefur orð
á því að honum hafi alltaf liðið vel
á Bifröst. „Starfið sem rektor hef-
ur verið mjög ánægjulegt og gef-
andi. Sérstaklega hefur mér þótt
ánægjulegt að hafa fengið tækifæri
til að búa hér á Bifröst, í þessu fal-
lega umhverfi. Ég hef notið þessa
tíma og því að vera hluti af samfé-
laginu hér í Borgarbyggð. Ég held
að það skipti miklu máli fyrir skól-
ann að rektor sé búsettur á staðn-
um og mér hefur fundist þetta góð-
ur hluti af mínu lífi, að búa á Bif-
röst,“ segir hann.
Breytt staða skólans
„Fyrstu þrjú skólaárin eftir að ég tók
við voru mjög erfið,“ rifjar rektor-
inn upp. „Við vorum að takast á við
að mínu mati ósanngjarnan niður-
skurð á framlögum ríkisins til skól-
ans, auk þess sem við þurftum að
afskrifa skólagjöld frá fyrri tíð sem
ekki höfðu innheimst. Samtals töp-
uðust því um 250 milljónir fyrstu
þrjú árin, sem er mjög há upphæð í
samhengi skólans,“ segir Vilhjálm-
ur. „En með hjálp góðra manna, þar
sem þingmenn kjördæmisins voru
fremstir í flokki, náðist að hækka
framlögin frá ríkinu í upphæðir
sem eðlilegar geta talist, samhliða
fjölgun nemenda. Síðustu þrjú ár,
frá 2017, hefur skólinn verið rek-
inn með góðum afgangi og horfur
fyrir næsta ár eru góðar. Fjárhags-
lega staða skólans hefur því vænk-
ast mjög á þessum tíma frá 2017,“
segir hann.
Á sama tíma hefur nemendum
við skólann einnig fjölgað mikið.
„Nú á haustönn eru hér nálægt 700
nemendur, sem er það mesta sem
hefur verið í minni tíð. Á undan-
förnum árum hefur verið byggt upp
mjög öflugt meistaranám við skól-
ann, hann sótt fram í fjarnámi og
við teljum okkur vera leiðandi á því
sviði meðal íslenskra háskóla,“ seg-
ir rektorinn.
Mennta leiðtoga
„Alltaf höfum við lagt áherslu á að
efla námið stöðugt, bæði að inni-
haldi og gæðum og verið óhrædd
við að stíga fram með nýjungar, sér-
staklega í fjarnáminu. Teljum við að
kennsluaðferðirnar okkar séu mjög
góðar miðað við það sem gengur
og gerist,“ segir hann. „Enda höf-
um við náð góðum árangri á þess-
um tíma og það hefur verið sameig-
inlegt verkefni stórs hóps af fólki
við skólann, fólks sem hér hefur
starfað og sömuleiðis nemenda sem
hafa hjálpað til við að bera út hróð-
ur skólans eftir útskrift. Það eru
margir sem hafa lagt hönd á plóg
til að skila þessum árangri,“ seg-
ir Vilhjálmur en bætir því við að
slíkt verkefni sé viðvarandi. „Við
erum alltaf að þróa kennsluna og
bæta hana, sem og upplifun nem-
enda. Við leggjum mikið upp úr því
að þjálfa okkar kennara og fylgjast
með því að þeir geri vel. Að passa
upp á gæði kennslu er verkefni sem
hefur hvorki upphaf né endi,“ segir
hann. „Til dæmis höfum við nýlega
fjárfest í nýjum kerfum í innviðum
kennslunnar. Til dæmis nemenda-
skrárkefinu Uglu, sem er notað í
opinberu háskólunum og kennslu-
kerfinu Canvass, auk nýs prófakerf-
is. Allt er þetta gert með því mark-
miði að kennslan verði árangursrík-
ari og til að bæta upplifun nemenda,
auðvelda þeim námið án þess að
létta það, þannig að kennslan verði
árangursríkari og fólk nái þeim ár-
angri sem það stefnir að í sínu
námi. Það síðan hjálpar nemend-
um þegar námi lýkur og þeir koma
út á vinnumarkaðinn,“ bætir hann
við. „Í þessu samhengi er gaman að
rifja það upp að við teljum það vera
hlutverk skólans að mennta leið-
toga fyrir atvinnulífið og samfé-
lagið. Þróun skólans á undanförn-
um árum hefur mjög styrkt hann í
þessu hlutverki sínu, sem er einmitt
upphaflega hlutverkið sem honum
var markað fyrir hundrað árum síð-
an,“ segir rektorinn ánægður.
Mun ekki leiðast
eftir starfslok
Sem fyrr segir er ráðgert að Vil-
hjálmur láti af störfum í lok skóla-
ársins og starf rektors hefur verið
auglýst laust til umsóknar. Komi
til þess að stjórnin ráði rektor sem
hún vill láta taka við fyrir þann tíma
segir Vilhjálmur ekkert því til fyr-
irstöðu af sinni hálfu, slíkt sé sam-
komulagsatriði stjórnar og nýs
rektors. En hvað tekur við hjá Vil-
hjálmi þegar hann hættir á Bifröst?
„Ég er ekki farinn að skipuleggja
mig þannig. Ég hef ýmis járn í eld-
inum sem ég held áfram að sinna
og ef engar áhyggjur af því að hafa
ekki nóg að gera,“ segir hann. „Það
kemur alltaf að því að fólk fari á líf-
eyri og ég kvíði þeirri stund ekki.
Ég á barnabörn úti um allt og það
verður ágætt að fá góðan tíma til
að sinna fjölskyldunni. Þá eigum
við hús úti í Tyrklandi og hver veit
nema við dveljum meira þar. Ég
mun hafa nóg og gera og mun ekki
leiðast. Ég vonast bara til að halda
góðri heilsu sem lengst og er og
verð þakklátur fyrir allt það góða
sem lífið ber í skauti sér,“ segir Vil-
hjálmur Egilsson að endingu.
kgk
Kynna í samráðsgátt áform um Miðhálendisþjóðgarð
Vilhjálmur Egilsson kveður Bifröst í vor
„Starfið verið mjög ánægjulegt og gefandi“
Nemendum við skólann hefur fjölgað
mikið síðustu ár og eru nú nálægt
700 talsins og hafa aldrei verið fleiri í
rektorstíð Vilhjálms. Ljósm. úr safni/
Háskólinn á Bifröst.
Vilhjálmur Egilsson, rektor Háskólans á Bifröst, hér í miðju ávarpi við útskrift nemenda vorið 2017.
Ljósm. úr safni/ James Einar Becker.
Horft yfir Bifröst í Borgarfirði. „Sérstaklega hefur mér þótt ánægjulegt að hafa
fengið tækifæri til að búa hér á Bifröst, í þessu fallega umhverfi,“ segir Vilhjálmur
Egilsson. Ljósm. úr safni.