Morgunblaðið - 02.10.2020, Blaðsíða 12

12 FRÉTTIRInnlent
MORGUNBLAÐIÐ FÖSTUDAGUR 2. OKTÓBER 2020
Guðmundur Sv. Hermannsson
gummi@mbl.is
Vikan hefur verið annasöm hjá fé-
lögum í Feldfjárræktarfélaginu
Feldfé en þeir hafa komið saman í
fjárhúsum í Vestur-Skaftafellssýslu
til feldfjárskoðunar og valið bestu
lömbin til áframhaldandi undan-
eldis.
„Við vorum að skoða eiginleika
skinnsins og háragerðina á lamb-
inu, því þegar verið er að rækta fé
til skinnaframleiðslu þarf að vera
lítið þel og mikið, fíngert og hrokk-
ið tog. Þetta er tímafrekt en
skemmtilegt,“ sagði Kristbjörg
Hilmarsdóttir, bóndi á Þykkva-
bæjarklaustri í Álftaveri. Þar voru
valin þrjátíu lömb til ásetnings.
Kristbjörg segir að feldfjárrækt-
endur á Íslandi séu ekki margir en
þeim fari þó fjölgandi. Og það tekur
tíma að ná árangri, Kristbjörg hef-
ur ræktað feldfé í áratug og segist
nú í fyrsta skipti virkilega ánægð
og stolt af lambahópnum sínum. Ís-
lensku feldfjárræktendurnir rækta
eingöngu grátt fé en það er sjald-
gæfur litur á heimsvísu og því eru
gráu skinnin verðmætari en mó-
rauð eða flekkótt svo dæmi sé tek-
ið.
Skinnaframleiðslan á Þykkva-
bæjarklaustri er ekki stór í sniðum
og skinnin eru ekki ódýr enda eru
þau flest send til Svíþjóðar þar sem
þau eru krómsútuð og fylgt sé
ströngum gæðastöðlum við fram-
leiðsluna. Kristbjörg segist einkum
selja skinnin til ferðamanna og þau
eru til ýmissa hluta nytsamleg.
Þannig sé til dæmis gott að leggja
þau í barnavagna því þau haldi vel
hita á börnunum og einnig sé hægt
að þvo krómsútuðu skinnin í þvotta-
vél.
Stofninn næstum útdauður
Upphaf feldfjárræktar á Íslandi
má að sögn Kristbjargar rekja til
ofanverðrar 20. aldar þegar reynt
var að brydda upp á nýjungum í
sauðfjárrækt. Í kjölfarið var leitað
að gráu íslensku fé sem hentaði til
skinnaframleiðslu að sænskri fyr-
irmynd. Slíkir fjárstofnar fundust í
Skaftafellssýslu, á Vestfjörðum og
Snæfellsnesi. Tilraunin mistókst og
feldfjárstofnarnir voru nánast
horfnir um aldamótin.
„Þegar ég byrjaði á þessu árið
2010 voru ef til vill til um 200 ær
eftir af þessum stofni á nokkrum
bæjum í Vestur-Skaftafellssýslu,“
segir Kristbjörg og bætir við að
það sé einkum Guðna Má Sveins-
syni á Melhól á Meðallandi að
þakka að stofninn lifði af. Það
feldfé, sem nú er verið að rækta sé
að mestu leyti ættað þaðan, „þar er
vaggan,“ segir Kristbjörg.
Ferðamenn koma aftur
Þau Kristbjörg og Sigurður Arn-
ar Sverrisson, maður hennar, reka
fjárbú og ferðaþjónustu á Þykkva-
bæjarklaustri. Kristbjörg segir að
vissulega hafi verið minna að gera í
vor og sumar en undanfarin ár.
„En þegar maður hefur verið
svona lengi í þessu er í aðra rönd-
ina gott að fá smá frí. Og ég held að
þegar ferðamaðurinn fær að koma
til Íslands aftur fyllist allt hér um
leið. Fólk er svo heillað af landinu.“
Annasöm vika hjá feldfjárræktendum
 Grár feldfjárstofn
var næstum útdauð-
ur hér á landi en
dafnar nú vel
Morgunblaðið/Jónas Erlendsson
Lömbin metin Kristbjörg Hilmarsdóttir, Þórdís Bjarnleifsdóttir, Elísabet S. Jóhannsdóttir, Sigurlaug Steingrímsdóttir og Guðmundur Gíslason, öll félagar
í Feldfjárræktarfélaginu Feldfé, skoða álitlegan feldfjárlambhrút í fjárhúsinu í Þykkvabæjarklaustri í Álftaveri í Vestur-Skaftafellssýslu.
Fíngert tog Heppilegur feldur til skinnaframleiðslu þarf að hafa lítið þel og mikið, fíngert og hrokkið tog.
Fyrir
líkama
og sál
L augarnar í Reykjaví k
w w w. i t r. i s
„Það kom mér skemmtilega á óvart
að þótt þetta væri gert núna, eftir að
önnin er hafin, eru samt sjö ung-
menni að flytja inn í kvöld. Mér
finnst það segja heilmikið um þörf-
ina,“ sagði Einar Freyr Elínarson,
oddviti Mýrdalshrepps og formaður
starfshóps Samtaka sunnlenskra
sveitarfélaga, í samtali í fyrradag um
opnun heimavistar við Fjölbrauta-
skóla Suðurlands á Selfossi.
Skólinn samdi við Valdimar Árna-
son, eiganda Selfoss Hostel, um að
rekin verði heimavist fyrir skólann í
hluta af húsnæði ferðaþjónustu hans
að Austurvegi 28. Fram til áramóta
verða 10 herbergi ásamt tilheyrandi
aðstöðu og 15 eftir áramót. Eigandi
Selfoss Hostel tekur einnig að sér
gæslu.
Einar Freyr segir að ungmenni af
austurhluta starfssvæðis skólans,
Rangárvallasýslu og Vestur-Skafta-
fellssýslu, eigi vegna fjarlægðar frá
Selfossi ekki kost á að nýta sér al-
menningssamgöngur til að sækja
skólann. Til að tryggja aðgang
þeirra þurfi að vera hægt að bjóða
upp á heimavist. Heimavist hafi ver-
ið rekin lengi vel en fyrir nokkrum
árum hafi samningi um hana verið
sagt upp. Síðan hafi verið mikill
þrýstingur á að bjóða upp á þetta úr-
ræði á ný.
Starfshópur sveitarfélaganna sem
Einar var í forsvari fyrir kannaði
vilja sveitarstjórna og samþykktu
allar ályktun þar sem skorað var á
skólann og ráðherra að beita sér í
málinu. Einnig var fundað með Lilju
Alfreðsdóttur menntamálaráðherra.
Að undangenginni þarfagreiningu
var ákveðið að taka húsnæði á leigu.
Einar á von á því að full þörf verði
fyrir þau 15 herbergi sem samið hef-
ur verið um en ekki sé víst að þörfin
komi að fullu í ljós fyrr en eftir tvö til
þrjú ár. helgi@mbl.is
Heimavist rekin
á ný á Selfossi
 FSu leigir hluta hostels fyrir nema
Ljósmynd/Valdimar Árnason
Heimili Heimavistin verður í hluta
Selfoss hostel við Austurveg.