Rit Mógilsár - 01.03.2004, Side 45

45
stjórnendur verða stöðugt að vinna áfram að verkefninu og halda
félagslegum tengslum virkum. Þau verða að hagnýta félagslegan auð til
að samþætta aðila í verkefninu og dreifa upplýsingum jafnt innan þess
og utan. Félagsleg tengsl eru ekki staðnaðar formgerðir heldur virk ferli
sem verður að vinna að ef þau eiga að virka sem skilvirkir farvegir
upplýsinga.
Í þessari ritgerð hefur verið gerð grein fyrir samfélagslegum
breytingum sem íbúar Fljótsdals hafa staðið frammi fyrir, þeim
bjargráðum sem þeir hafa tekið til við og ljósi varpað á hvernig fólk
vinnur bjargráð og hvað skiptir máli í þeim ferlum. Að lokum er
mikilvægt að undirstrika það að einstök bjargráð líkt og
Héraðsskógaverkefnið leysa í sjálfu sér ekki vanda svæða eða
staðbundinna samfélaga. Það er fólkið sem sameinast um að vinna að
þeim sem tekur á aðstæðum sínum sjálft með aðstoð bjargráða. Þegar
kemur að því að skapa árangursrík bjargráð verður að hafa í huga
hvernig ætlunin er að vinna þau og hvaða þættir skipta þar máli. Það
skiptir engu hversu góð hugmynd að verkefnum er ef framkvæmd þeirra
bregst. Félagsleg tengslanet og hagnýting félagslegs auðs skiptir þar
höfuðmáli.

8 ÞAKKIR

Rannsóknin sem ritgerðin byggir á var styrkt af Nordic Research School
on Local Dynamics sem er norrænt net framhaldsnema sem miðar m.a.
að því að efla rannsóknir í dreifbýli á norðurslóðum. Jafnframt var
rannsóknarverkefnið styrkt af Rannsóknarnámssjóði Rannsóknarráðs
Íslands og Starfsmenntunarsjóði BHM. Mér var úthlutað
fræðimannaíbúð að Skriðuklaustri í Fljótsdal í október 2001 og var það
sérlega mikilvægt fyrir vettvangsvinnu mína. Kann ég öllum þessum
aðilum bestu þakkir fyrir.
Leiðbeinendur við rannsóknina voru dr. Unnur Dís Skaptadóttir,
dósent við mannfræðiskor og dr. Karl Benediktsson, dósent við jarð- og
landfræðiskor, og þakka ég þeim fyrir gott samstarf og leiðbeiningu.
Fjölmargir aðrir aðstoðuðu við vinnu og frágang ritgerðarinnar og síðar
þessarar útgáfu. Ég þakka þeim öllum. Síðast en ekki síst vil ég
sérstaklega þakka viðmælendum mínum og öðrum þátttakendum í
rannsókninni.