Strandapósturinn - 01.06.1979, Qupperneq 35

lentu þeir í sömu laut og áður er getið. Einn bátanna brotnaði
svo mikið að hann var talinn gjörónýtur.
Strax var hafist handa um endurbyggingu fjárhúsanna, og
þeir voru margir sem lögðu þar hönd að verki. Veggir voru
hlaðnir úr torfi. Stungin var hnaus og strengur ristur. (Þetta var
hægt að framkvæma af því jörð var þýð.) Timburþil var sett að
framan og járn á þak.
Bóndinn á Óspakseyri hafði árið áður en þetta skeði tekið á
leigu jörðina Krossárbakka sem þá losnaði úr ábúð. Hús öll þar
stóðu uppi og heyið af túninu látið í hlöðu þar. Þarna var
Óspakseyrarféð haft á meðan að fjárhúsin voru endurbyggð.
Heyið í hlöðunni sem skriðan lenti á varð ónýtt, að mestu sökum
vatns og moldar. Einnig nokkrar tunnur af fóðursíld sem stóðu
norðan við hlöðuna.
Tjón bóndans á Óspakseyri og kaupfélagsins þar varð mikið af
þessum náttúruhamförum. Ég veit ekki til þess að tjón það er
þarna varð hafi verið bætt. Á þessum tímum náðu engar trygg-
ingar til tjóna af völdum náttúruhamfara nema verið getur að
hægt hafi verið að tryggja sig gegn slíku með sérstakri tryggingu.
Síðan þetta skeði hef ég oft átt leið um Bitrufjörðinn og alltaf
verður mér litið upp eftir Eyrarhlíð. Ég hef ekki ennþá fengið
fulla skýringu á því hvernig skriðufall gat myndast þarna. Stað-
hættir benda sannarlega ekki til slíks. Að vísu var vatnsagi mikill
og jörð þýð, en samt er þessi atburður lítt skiljanlegur.
3
33