Strandapósturinn - 01.06.2020, Qupperneq 100

99
öldur sjávar yfir þetta sker, en á fjöru kemur það upp og þá er auðvelt að
sjá það frá ströndinni. Grímur Benediktsson frá Kirkjubóli skrifaði eftir-
farandi sögu um skerið Sesselju í óbirtri örnefnaskrá:
Sesselja: 600-700 metra frá landi á Hundatanga er sker sem heitir
Sesselja. Sú saga er sögð um hvernig það nafn er til komið.
Fyrir langa löngu sendu sveitaryfirvöld á Selströnd sem nú heitir
Kaldrananeshreppur menn á báti yfir Steingrímsfjörð að Kirkjubóli
með sveitarómaga, telpu Sesselju að nafni, sem sveitaryfirvöld á Sel-
strönd töldu að ætti að vera á framfæri Tungusveitar. Sveitaryfirvöld
í Tungusveit neituðu að taka á móti telpunni og skipuðu mönnunum
að fara með hana til baka og ráku þá út í bátinn aftur og skipuðu
þeim að róa til baka.
Þegar þeir eru komnir nokkuð frá landi fara þeir að ræða vandann,
sem þeir eru komnir í, að hafa ekki getað rekið það erindi, sem fyrir
þá var lagt og eru hræddir við að koma með telpuna aftur til baka.
Taka þeir þá eftir skerinu rétt hjá bátnum og ákveða að setja telpuna
á skerið og skilja hana þar eftir. Með aðfallinu fer skerið í kaf og
drukknaði telpan þar. Heitir skerið síðan Sesselja.
Sesselja undan ströndinni á Kirkjubóli. Í forgrunni er Hundatangi, í baksýn
Gautshamar og Kokkálsvíkurhöfn. Ljósmynd: Jón Jónsson